MARKA 15

Pilat Lakah Jesuh Hawhpih

(Mt 27:1-2; 11-14; Lk 23:1-5; Jn 18:28-38)

1Zingtungno in thiampi upate cu upa dangte, Daan zilhtute le thukhentu Khonsil upate tuah manlangzet tawkdunin thu ngaisung khawm haw hi. Jesuh cu thik taicin tuah khihin hawhpihin Pilat khutah hen haw hi. 2Pilat in, “Judah kumpipa cim?” tin dong hi.

Jesuh in, “Na tihnak bangin hizuh ing hi,” tin don hi.

3Thiampi upa ten a phunkimin sual nawn haw hi. 4Mah hangin Pilat in, “A thu haw hi don tukma cim? Sual a notnak haw hempoh hi ngai hemin,” tin ti lehleu hi.

5Jesuh cu a ot nuam leleng ngawl toh hangin Pilat cu amthong hi.

Jesuh Thah Tukin Soncat

(Mt 27:15-26; Lk 23:13-25; Jn 18:39-19:16)

6Kaltan Puai bawlsial ten Pilat in thawngta mi lak pen mipi tei ngetmi cu a hahsak dan hi. 7Mahlai takin, Barabbas a tih haw mithatpa, ngalthotik thei pa cu ngalthotik thei dangte tuah thawngah khia haw hi. 8Mi honpite cu tulin kumsial a bawlsa haw bangin thawngta suah tuk vang cu Pilat lakah dong haw hi. 9Pilat in, “Nohtei ca in Judah Kumpipa hah hen tih deih uh cim maw?” tin dong hi. 10A lakah a hentiknak haw cu thiampi upa ten Jesuh a iksik haw hangin hi tih Pilat in ciang zetin thei hi.

11Mahnaven thiampi ten mi honpi cu Barabbas hah saw in, tin Pilat lakah ngen tukin so haw hi. 12Pilat in dong lehleu in, “Mah tih bang ahi tale Judah Kumpipa na tih uhmi hi itin bawl tuk kaw na deih uh?” tin dong hi.

13Amuh ten, “Thinglamteh humah thatin!” tin au haw hi.

14“I sualnak kaw a bawl?” tin Pilat in dong lehleu hi. “Thinglamtehah thatin hi,” tin nase sesemin au haw hi.

15Pilat in mi honpi tei lungdam tuk a deih manin, amu ca in Barabbas cu hah hi. Jesuh cu vattikin thinglamtehah that tukin amu khutah pia hi.

Ngalkap Ten Jesuh Zawnsak

(Mt 27:27-31; Jn 19:2-3)

16Ngalkap ten Jesuh cu ngamuktu bawipa i inntualah tumpihin, mipi dangte vang cu sam bok haw hi. 17Jesuh cu puansan silhtikin, ling tuah bawlmi lukhu cu a lu ah khutik haw hi. 18Mahten upat piaknakin, “Judah Kumpipa a nun khua sau tahen,” tin au haw hi. 19A lu pen ngolh tuah vaatin, cilsiakin le khukdinin, a mai pen a lu kun haw hi. 20Mahti bangin a zotsak celh haw teh puansan a silhtikmi haw cu duklehin, ama puan leng silh lehtik haw hi. Mahten thinglamtehah khet tukin hawhpih haw hi.

Jesuh Thinglamtehah That Haw

(Mt 27:32-44; Lk 23:26-43; Jn 19:17-27)

21Lampi pen Simon a tih haw pa cu tawk haw hi. Amah cu khuano pen khuapi ah a hungmi pa hi a, ngalkap ten Jesuh i thinglamteh cu puatik lo haw hi. (Simon cu Sairin khua mi Alexander le Rufus tei capa hi.)#Rom 16:13; 22Jesuh cu Golgotha tihmi munah hawhpih haw hi. Golgotha cu Lu-nguh mun tihnak hi. 23Mahlai ah sabittui myrrh a tih haw si kha tuah cawhhel sa cu pia haw naven Jesuh in, in nuam ma hi. 24Mah nungten thinglamteh ah khen haw in, a puan cu awngbali sawkin sem haw hi.#Saam 22:18; 25Mahtin a khet haw cu zinglam nazi kuah hi. 26A sual notnak haw lai cu, “Judah Kumpipa,” tihmi hi. 27Amah tuah munkhatin nguca pa nihte cu a taklamah pa khat, a veilamah pa khat thatcih bok haw hi. 28Lai Thiangtho in misual tei lakah amah cu telhcih haw hi, tihmi a kimnak tukin hi.

# Isa 53:12; 29Mi vaktuakte vangin ancim le thincimin, a lu haw satin zawnsak haw hi. “Nangmah cu Biakinn pheletin, ni thum sungin a sa leh thei tuk pa hi sisi maw?#Saam 22:7; 109:25; Mk 14:58; Jn 2:19; 30Atu-in thinglamteh hum pen tolh inna, nangmah le nangmah panduncopin hi!” tin auhsan li haw hi.

31Mahti bangbok lengin thiampi upate le Daan zilhtu ten nuihsanin, “Midangte pan thei naven amah le mah panduncop thei ma hi,” tin zawnsak haw hi. 32Israel Kumpipa Khrih cu thinglamteh hum pen atu loli in, a tolhsuk mu le hung mahten sang tuk hung hi, tin pa khat le pa khat tidun li haw hi.

Thinglamteh humah thahcih bokmi pa nih ten zawnsak bok haw hi.

Jesuh Thihnak

(Mt 27:45-46; Lk 23:44-49; Jn 19:28-30)

33Sunlaihtak nazi sawm le pa nih pen panin mah ngam buppi ah nazi pa thum sung thimzing tung hi. 34Taklam nazi pa thum ten Jesuh cu, “Eloi, Eloi, Lema Sabakthani,” tin nase zetin au hi. A sullam cu, “Ka Pathian, Ka Pathian, ita kei zamsan cim?” tihnak hi.#Saam 22:1;

35Mahlai a ummi khenkhat ten a zak haw ten “Ngai hem un, Elijah sam hi!” tin ti haw hi. 36Mi pa khat cu tai vingvengin puansia khi sabittui sungah nimin, pumpeng lekah a ken ceng ten Jesuh mukah noihto hi, “Ngak hih hem un! Thinglamteh hum pen a khiasuk tukin Elijah hung maw, hung ma hum tih zo hih pah nung?” tin ti haw hi.#Saam 69:21;

37Jesuh cu ngingzet a au celh ten catsukta hi.

38Mahbek ten Biakinn puanzak cu a lulam pen a taw lam tian khen nihin balkek hi.#Suah 26:31-33; 39Thinglamteh mai ah a dingtu ngalbawi pa in Jesuh i thih laih amuh ten, “Hi pa hi Pathian Capa ngangai hi,” ti hi.

40Mahlai a numei khenkhat cu Mary Magdalin, James nauta saw le Josef i nu Mary le Salome na hi haw hi.#Lk 8:2-3; 41Galilee ngam sungah Jesuh a um laihin hi numei ten Jesuh zui in bawmtu haw hi. Mahten Jerusalem ah a hengmi numei dang tampi vang um dalh bok haw hi.

Jesuh Phum Haw

(Mt 27:57-61; Lk 23:50-56; Jn 19:38-42)

42-43Taklam ten Arimathea khua mi Josef heng hi. Amah cu thukhentu khonsil upa lak pen upa zetmi sungtel hi a, Vancung Uknak a heng tukmi khi a ngakhelzet tupa hi. Mah ni cu tuangtip ni hi. (Sabbath ni heng laihngawl tawngkai ni nga ni hi.) Mah hangin Josef cu ngalpha zetin Pilat lakah tumin, Jesuh i luang cu ngen hi. 44Pilat in Jesuh cu thi zo tih a theih ten lamdangsa mahtak hi. 45Ngal bawipa cu samin, “Jesuh cu a thihnak ngei toh maw?” tin dong hi. Jesuh cu thi ciang zo tih ngal bawipa i lak pen a theih ten Pilat in Jesuh i luang cu Josef latik hi. 46Josef in puan nemno lei in, Jesuh i luang cu thinglamteh hum pen lasuk a, puannemno tuah a tuam celh ten suangpi kuatmi khansungah vui hi. Mahten suangpeekpi tuah khan cu a khakta in zam hi. 47Mary Magdalin le Josef nu Mary ten a el pen zo bok haw in, Jesuh luang a koihnak cu mu bok haw hi.

Zur Zeit ausgewählt:

MARKA 15: NBF1

Markierung

Kopieren