LUKA 5

Jesuh i Nungzuitu Sam Masabelte

(Mt 4:18-22; Mk 1:16-20)

1Ni khatin, Jesuh cu Genesaret tuipi mawkah dingin, Pathian thu ngai nuamin mi honpi cu a elah nek tukin cuhdun tawtok haw hi. 2Jesuh in tuimawk a, hawmkuang pa nih a khih leng haw cu mu in, ngasa suuk vawktu cu hawmkuang sung pen tulin a suuk cu som li haw hi. 3Jesuh cu hawmkuang pa khat sungah tumin, mah hawmkuang cu Simon ta hi. Tuimawk pen a laizangah, thawntikin mah hawmkuang sungah Jesuh cu khungin, mi honpi cu thu hilh hi.#Mt 13:1; Mk 3:9-10; Jn 21:3;

4Thuhilh a celh ten Simon lakah, “Tui thuknak lamah na hawmkuang cu khinin, na suuk tuah ngasa cu vawk un,” ti hi.

5Simon in, “Topa, zankhua vawk li heng nave ung, imah awk ma si ung. Mahnaven vawkin hi, na ti tale na tihnak bangin vawk tuk ung,” tin ti hi.#Jn 21:3; 6A suuk cu vawksuk poh le ngasa cu a suuk dimin awk haw hi. A ngit leita hangin a suuk haw bal khawng awn hi.#Jn 21:6; 7A ngualcam tei hawmkuang khi a khut cu zaapin, “Bawm un,” tin sam haw hi. Hung haw a, ngasa cu hawmkuang pa nih dimin koih haw hi. A ngit leita hangin a hawmkuang haw cu nim awn hi. 8Hi thute amuh ten Simon cu a khukdinin Jesuh lakah, “Ka nel pen tai in, Topa! Kei cu misualpa ing hi,” tin ti hi.

9Amah le a ngualcam ten ngasa tampi a awh haw hangin lamdangsa mahtak haw hi. 10Mahti bang bokin a suuk vawk pih haw Zebedi capa James le Johan hei in lamdang sazet bok haw hi. Jesuh in Simon lakah, “Lau pahsun; tu pepan mihing tampi mantu hi tuk ci,” ti hi.

11A hawmkuang haw cu tui mawkah a dawh ceng haw ten na hempoh zam khawngin, Jesuh i nungzui haw hi.

Jesuh In Mi Pa khat Damtik

(Mt 8:1-4; Mk 1:40-45)

12Vei khat cu Jesuh in phaaknat vei pa i umnak khua pa khatah heng hi. Mahpa in Jesuh amuh ten a mai ah bokin, “Topa na nuam tale kei cu thiangtik thei ci,” tin ngen hi.

13Jesuh in, a khutzaakin, a zen ceng ten, “Thiangtik nuam ing hi, thiangin,” tin a tih ten thakhatin, a natnak cu dam hi. 14Jesuh in, “Kuamah hilh kha pahsun hi. Mahnaven hawh vingveng inna, thiampi pa in nangmah zo hen na, dam ci tih khi mi hempoh i muh theihnak tukin Moses thupiak bangin biakpiaknak na pia in,” ti hi.#Thiam 14:1-32;

15Mahnaven Jesuh i thu cu mun hempoh ah thang nawnawm hi. A thuson ngai tukin le a natnak haw vang damtik tukin mi tampi ten amah cu zuan dedeuh haw hi. 16Mundangah cangpakno in hawh a, thungen mek hi.

Jesuh In Khut le Ke Zawngpa Damtik

(Mt 9:1-8; Mk 2:1-12)

17Vei khat cu Jesuh i thuhilh lih laihtakin Jerusalem khua le Judea ngam, Galilee ngam khua hempoh pen a hungmi Farasi le Daan zilhtu khenkhat mahlai munah khung bok haw hi. Tina tei damleh theihnak tukin Topa i huham cu Jesuh humah um hi. 18Khut le ke zawngpa cu mihon khat ten a zauphah tuah zawngin, Jesuh i mai ah koih tukin inn sungah hawhpih tuk el haw hi. 19Mihing tam leita hangin a hawh tumnak haw tuk lampi tong ma hi. Mah hangin inn hum kaitohpih haw a innkuul pheletin mi honpi lak, Jesuh i mai kekah a zauphah tuah khesuk haw hi. 20Muannak a neihzia haw khi Jesuh in, amuh ten khut ke zawngpa i lakah, “Unau pa aw, na sualnak ngaihthiam hi zo toh,” ti hi.

21Daan zilhtu le Farasi ten, “Pathian zotsaknak hi bang ngen awntu mihing cu akua him? Sual ngaithiam theitu cu Pathian pa khat bek hi si,” tin pa khat le pa khat tidun li haw hi.

22Jesuh in, a ngaihsutnak haw a theih ten, “Hitih bangin ita thu ngaisung uh cim? 23‘Na sualnak ngaihthiam hi zo hi,’ tih maw ahimata, ‘Tho inna, hawhin hi,’ tih i bang baih saw him? 24Mihing capa in leihumah sual ngaithiam theihnak thunei hi tih thu nohtei lakah langtik tung,” ti hi. Khut ke thi pai lakah, “Tho in, na zauphah la inna, innah pin tan,” ti hi.

25Thakhatin khut ke thi pa cu mi honpi mai ah tho to in, a zauphah le puantomte la in, Pathian thangphat thahin innah pin hi. 26Mihonpi ten lamdangsa mahtak haw hi. Lauthah zetin Pathian cu pahcawi haw in, “Tuni amuh uh mite hi izah thasiahhuai thil him?” tin son li haw hi.

Jesuh In Levi Sam

(Mt 9:9-13; Mk 2:13-17)

27Mah ceng ten Jesuh cu hawhin, siahkhontu Levi a tih haw pa cu a zung sungah khungleng khi mu hi. Jesuh in, “Ka nungzui in,” ti hi. 28Levi in ihempoh zamin Jesuh nungzui hi.

29Levi in, a innah an eih khawmnak nase zetin Jesuh minin bawl hi. A sammi lakah siahkhonte le midang tampi tel haw hi. 30Farasi mi khenkhat le Daan zilhtu khenkhat amu sung a, telmi ten nungzuitu tei humah phu celhculh haw hi. “Ita siahkhontu le misual tuah an min, tui min kil ten thei uh cim?” tin dong haw hi.#Lk 15:1-2;

31Jesuh in, “Tidam ten sibawi kul haw ma hi. Tinate bekin sibawi kul haw hi. 32Mitei maizah mite sam tukin hung kha mang hi. Misual ten a sualnak haw pen sikleh tukin hung ing,” ti hi.

An Cannak Thu

(Mt 9:14-17; Mk 2:18-22)

33Khenkhat ten Jesuh lakah, “Johan i nungzuitu cu an cangin thungen thei li haw hi. Farasi tei nungzuitute hei in mahtih bangin bawlbok haw naven na nungzuitu cu eih le in, lamah amu nuam bangin um haw hi,” tin hilh haw hi.

34Jesuh in, “Mopuai simtu cu moneitu pa amu lakah a um sungin an cangtik thei tukma hi uh ci! 35Mahnaven moneitu tangval pa cu amu lak pen laak hun heng tuk a mahten an cangleh haw tuk,” ti hi.

36Jesuh in amuh tei lakah tehkipnak cu hi bangin hilh hi. “Angki sia dahnak tukin kuamah in puan thak botbal awng haw tukma hi. Botbalin, a mang tale, a puan thakin, puan lun cu dok kekin, bal dedeuh thei hi. 37Sabittui thak khi savun thawl lun sungah kuamah in than awng haw ma hi. Itahim titale sabittui thakin thawl lun pokkehtik tuk a, sabittui cu bua thong tuk a, thawl vang cu siat lawh thong tuk hi. 38Mah sangin sabittui thak khi savun thawl thak sungah thun tuk saw mi hi. 39Sabit tuilun a in celh haw ten sabittui thak khi inleh nuam awng haw ma hi. ‘A lun uk saw hi,’ tin ti haw, tih thu hilh hi.”

Zur Zeit ausgewählt:

LUKA 5: NBF1

Markierung

Kopieren