LUKA 20

Jesuh i Thuneihnak Dong Haw

(Mt 21:23-27; Mk 11:27-33)

1Ni khat cu Biakinn sungah Jesuh in Thuthangpha a phuan lih laihtakin thiampi upa, Daan thiamte le khuasung upate cu a lakah hungin, 2“Akua i thu tuah kaw hi bang thilte na bawl, keimuh hilhin? Akua in thupia him?” tin dong haw hi.

3Jesuh in, “Thu pa khat dong hih tung a, hilh hih un hi. 4Johan i tuiphumnak piak theihnak thu a neihmi hi Pathian lak pen a hengmi maw, mihing lak pen him?” tin ti hi.

5Amuh ten, “Itin kaw a hilh tuk uh? ‘Pathian lak pen’ tin a don uh ahin, mah tale itakaw Johan i thu na up ngawl uh,’ tin tituk hi. 6‘Mihing lak pen,’ a ti uh ahin, mipi ten ohte suang tuah sep haw tuk hi, itahim titale Johan cu profet hi tin umin muang haw si,’ tin, amuh le muh nialdun het haw hi.” 7Mah hangin amuh ten, “Akua i lak pen ngah him tih thei ma ung hi,” tin don haw hi.

8Jesuh in, “Kei vangin hi thil bawl theihnak, hi akua i lak pen ngah ing him tih thu noh hilh bok tuk mang,” tin don bok hi.

Sabit Huan Nadektu Tehkipnak

(Mt 21:33-46; Mk 12:1-12)

9Jesuh in, hi tehkipnak cu mipi lakah hilh hi; “Vei khat laihin, mi pa khatin sabit huan bawl hi. A sabit huan cu a nadekte saptikin, amah cu khualzinin ngeipi cam hi.#Isa 5:1; 10Sabit ngah lawh hun ten a huan saptu tei lakah lo sapman la tukin a sal pa khat hah hi. Mahnaven huan nadektu ten lo neitu i hahmi salpa cu vatnek haw a, khut thacangin pintik haw hi. 11Mah hangin a dang a sal pa khat hawhtik leleu hi. Mahpa vang cu nadektu ten vat leleu haw a, zakca zetin, a bawl nung haw ten thacangin pintik leleu haw hi. 12Mah nungten a pa thumnak hawhtik leleu hi. Hi pa cu nadektu ten a humah khut ha sualin, huan pualamah vawk haw hi. 13Mahten sabit huan neitu pa in, ‘Itin ti kam nang? Ka capa ihbelmi hawhtik nangin, maisong deuh haw tuk hi,’ tin ngaisung hi. 14Mahnaven nadektu ten a capa amuh haw ten, ‘Hi pa hi huan neitu i capa ngangai hi, that nung inna, hi huan hi eimuta in cang tuk hi,’ tin pa khat le pa khat siamdun li haw hi. 15Mah hangin huan pawlamah vawkin, that haw hi.

“Mahti bang a hih hangin huan nadektu tei humah huan neitu in ihim a bawl tuk?” tin ti hi. 16“Amah loli hungin huan nadektu a thah celh ten nadektu dang tei lakah a huan cu saptik tuk,” ti hi. Hi thu cu mipi in, a zak haw ten, “Hitih bangin ti hihim tukma hi,” tin ti haw hi.

17Jesuh in, a zoh cangcian ceng ten amuh tei lakah, “Lai Thiangtho sungah, #Saam 118:22;

‘Inn satu ten, nemcuam ma ti in,

a vawk haw mi suang cu

khan tian tawphah suangah

cang zo hi,’ tin ngatmi khi

a sonnuammi ihim?

18Akua hei hihen mah suang humah a cak kha tute cu keh bilhbelh haw tuk a, mah suang i khiak ngahte cu noi dihdiah haw tuk,” ti hi.

Siah Piaknak Thu

(Mt 22:15-22; Mk 12:13-17)

19Daan zilhtu le thiampi upa ten a hum haw a, tehkipnak hi amuh otsanin, a hilhmi hi tih a theih haw hangin; mahlai mun loli pen mat tum haw naven mipite a lau sih bok haw hangin man paih ngam bok haw ma hi. 20Mah hangin a mat theih hawnak tukin hun lemcang zei haw a, khenkhat ten Jesuh mitmuhin mipha bang tiamhemin, a zokuhtu tukin nawhthuh pia haw hi. Mah tei lakah, ‘Miphazetno bangin um unna, Rom acozah ngamuktu bawi i nelah henpih theihnak tukin thudong unna, ama kam lala tuah thangsiahnakin mang unna, amah le mah awkdun cop tukin na zuam un hi,’ tin hilh haw hi. 21Zokuhtu ten Jesuh lakah, “Sazapa, mi maison nei po ngawlin cam zetin Pathian thutak cu lamdik a hihnak bangin zilh hi ci, tih cu thei ung hi. 22Rom kumpipa i lakah siah piakmi hi a Daan uhin phal maw phal ma him?” tih thu hilh hihin hi, tin dong haw hi.

23Mahnaven Jesuh in, a ngian haw tih a muh ten amuh tei lakah, 24“Na tangka cang uh lak hem un! A koi mel le min cuang him?” tin dong hi.

Amuh ten, “Kumpipa i mel le min cuang hi,” tin don haw hi.

25Jesuh in, “Hi zuh hi, kumpipa ta cu kumpipa pia unna, Pathian ta cu Pathian pia un,” ti hi.

26Mipi mai ah Jesuh i kam pen sual a mat theih haw ngawl hangin a thu dondante thasiah zetin dai diudeu haw hi.

Thihnak Pen Thawhleh Thudotnak

(Mt 22:23-33; Mk 12:18-27)

27Mihing thihnak pen thawhlehnak um tukma hi, tin a titu Sadusi mi khenkhatte cu Jesuh lakah hawhin,#Nung 23:8; 28“Sazapa aw, Moses in ohtei ca in hi bangin daan thu ngan hi, ‘Mi pa khat cu ca cawi man ngawlin a zi a thihsan tale, a unau pa khatin mah a zi cu huai tuk a, a neih haw mi ca cu mithi pa i cano tin ngaihsut hi tuk,’ ti hi.#Daan 25:5; 29Vei khat laihin, unau salih um haw hi. Upabel cu zi nei naven ca nei man ngawlin thi hi, 30Pa nihnak pa in mah nu cu huai naven ca cawi man ngawlin thi leleu hi. 31A pa thumnak pa vangin huai leleu a, ca cawi man ngawlin thihsanta leleu hi. A unau salih haw in, mah nu cu huai haw naven ca cawi ngawlin thi khawng haw hi. 32A dawlbelnak ten mah numei nu vang cu thi leleu bok hi. 33Hi bangin a hih hangin a thisa thawhleh hun a hen ten mah nu cu akuabel i zi tuk him? A salih haw in huai khawng haw hi,” tin dong haw hi.

34Jesuh in, “Tuhunin numei le pano cu huaidun haw hi. 35Mahnaven thihnak pen thawhtikleh tukin a tak mite le a heng tuk laih mi huncanah nung tukin a tak mite cu huaidunleh haw tukma toh hi. 36Vancungmi bang haw tuk a, thi haw tukma toh hi. Thihnak pen a thawhleh zo haw hangin amuh cu Pathian cano hi haw hi. 37Mahten Moses in, a thi mitei thawhlehnak tuk khi ciang zetin langtik zo hi. Kiakcam kang thu a hilhnakah khin Topa cu ‘Abraham i Pathian, Isaak i Pathian le Jakob i Pathian,’ tin langtik zo hi.#Suah 3:6; 38Pathian cu a thi mitei Pathian hi kha ma hi. A nung mitei Pathian hi. Itahim titale mi hempoh cu Pathian sungah nung khawng haw hi,” tin hilh hi.

39Daan zilhtu khenkhat ten, “Sazapa, na thuhilh cianglehnak phazet hi!” tin ti haw hi. 40Mah hangin Jesuh cu thudong ngamleh haw ma toh hi.

Khrih Thudotnak

(Mt 22:41-46; Mk 12:35-37)

41Jesuh in, “Khrih cu David casuan hi tin itin tih theih tuk him? 42Itahim titale David amah hihimin, Saam Lai Thiangtho sungah:#Saam 110:1;

‘Topa in,

ka Topa i lakah

na ngal hempoh na ke nuai ah,

na sikpek tukin,

43ka koih laklawh ka taklamah

khungin,’ ti hi.

44David in, ‘Topa’ tin, a sam tale Khrih cu David casuan itin hi thei tuk him?” tin ti hi.

Daan Zilhtute Ngallin Piaknak

(Mt 23:1-36; Mk 12:38-40)

45Mi hempoh ten a thuhilh a ngaih haw laih takin Jesuh in, a nungzuitu tei lakah 46“Daan zilhtute na ngalling un. Amuh cu a angki cualpi haw tuah vak kawkawi khi thupi sa mahtak haw hi. Van zuaknak lamtuanah upatnak tuah nuksat piak khi nuam haw hi. Pumkhawm inn le puai bawlnak munah khunnak phabel teng leleng haw hi. 47Meivong zawnsakin, a inn haw tian lonsak haw li naven mi mai pen sau zetin thungen haw hi. A tawh haw tukmi dantatnak cu nase cuang tuk,” ti hi.

Zur Zeit ausgewählt:

LUKA 20: NBF1

Markierung

Kopieren