LUKA 18

Meivongnu le Thukhentu Tehkipnak

1Jesuh in, a nungzuitu cu lungmu kiam ngawlin thungen leleng un, tih thu a hilh nuamnakin, tehkipnak pa khat hilh hi. 2Amuh tei lakah, “Khua pa khatah Pathian kihca ngawl le mihing hei a maizah thei ngawl thukhentu pa khat um hi. 3Mahlai khua lelengah meivongnu pa khat um a, mah nu in, ‘Keimah langpangtu tuah thu ka neih uhten keimah bawm zalin hi,’ tin atu le tu hungin ngen hi. 4Thukhentu in thu sonsak nuam ngawlin hun ngeipi sung um hi. Mahnaven a dawltabel ten, ‘Pathian kihca ngawlin le mihing hei maizah ngawlmi hi na veng, 5hih meivongnu in keimah a buaitik leleng hangin a thu sonsak tung hi. Ka sonsak ma tale atu le tu hungin dawlbel ten keimah lehlam lungmu cawltik tuk,’ tin ngaisung hi,” tin hilh hi.

6Mahte Topa in amuh tei lakah, “Hi thukhentu pha ngawl pa i awnkam cu ngai uh ci. 7Pathian in bopnak ngenin, sun le zan au litu a mihing tei thukhen sak ngawlin um tuk maw ihim? Amuh bawm tukin a zuancum li tuk maw ihim? 8Ciang zetin hilh ing. Manlang zetin, a phuba laksak tuk hi. Mahnaven Mihing Capa a hunsuk ten upnak neitu mu nave ni maw,” ti hi.

Farasi le Siahkhonte Tehkipnak

9Jesuh in hi tehkipnak cu, kei hi cipzet ing tin, a ngaisung duncop mi le midang hempoh a zawnsaktu tei lakah a hilhmi hi. 10“Vei khat cu mihing pa nih biakinn ah thungen tukin hawh haw hi. Pa khat cu Farasi mi hi a, pa khat saw cu siahkhontu hi.

11“Farasi pa in, a khawla thim deuhah amah nguakcang dingin, hi bangin thungen hi, ‘Pathian aw, kei cu midangte bangin hampumli mang. Zolthu vang son awng mang, nupa sualnak vang ka bawl awng ngawl hangin nangmah thangphat ing a, hilai khin a, siah khontu bang ka hih ngawl hangin, na humah lungdam ing. 12Nipi khatah vei nih ancang leleng ing a, ka ngahmi hempoh sung pen seh sawm seh khat vang manzet pia leleng ing,’ tin thungen hi.

13“Mahnaven siahkhontu cu khawla thimah dingin van hei dakto ngam ngawlin a awmcumin, ‘Maw Pathian aw, kei hehpih zalin; kei cu misual, mikhial ing,’ tin ti hi. 14Ciang zetin hilh ing. Farasi pa hi ngawlin, siahkhontu pa saw khi innah a pin haw ten sual ngaihthiamin um hi. Itahim titale akua hei hihen mah le mah a ultung duntu cu nuainepin um tuk hi. Mahnaven amah le mah a niamkhiat mite cu pahcawi in um tuk,” ti hi.#Mt 23:12; Lk 14:11;

Jesuh In Naupangte Thupha Pia

(Mt 19:13-15; Mk 10:13-16)

15Mi khenkhat ten a cano tei humah Jesuh in, a khutsuanin thupha pia leh tih deihin, Jesuh lakah a canote hawhpih haw hi. Mahti bangin a bawl haw cu nungzuitu ten amuh haw ten liat haw hi. 16Mahnaven Jesuh in naupangte cu samin, “Naupangte ka lakah hung haw tahen: kham pahsuh un hi. Itahim titale Pathian Uknak cu hiti bang teita hi. 17Hi thu hi phawk leng un! nau Akua hei hihen naupangte bangin Pathian Uknak a co sang ngawltu cu mahlai Uknak sungah tum thei awng haw tukma,” ti hi.

Mihau Pa

(Mt 19:16-30; Mk 10:17-31)

18Judea mi hotu pa khatin Jesuh cu, “Mipha Sazapa aw, kumkhua nunnak ka co theihnak tukin i bawl kam nang?” tin dong hi.

19Jesuh in, “Ita mipha tin sam cim? Pathian pa khat sialngawl mipha dang kuamah umma hi. 20Thukham thei ma cim maw? Nupa sualnak bawl pahsun, laithat pahsun, nguca pahsun, zolthu son pahsun, na nu le pa upatin hi,” tih khi si tin ti hi.#Mt 23:12; Lk 14:11;

21Mahmi pa in, “Ka naupang laih pepan hi thukhamte cu ka zui khawng zo mi si,” tin don hi.

22Jesuh in, a zak ten, “Thil pa khat na bawl tuk sam laih hi. Na neihmi hempoh zuakin, na ngahmi sum le pai cu mi ca-ngahte sem inna, vanhumah sum le pai nei tuk ci. Mahceng ten hung inna, ka nungzui in,” ti hi. 23Mahnaven hi thu a zak ten mihauzet a hih hangin a khua ngaizet hi.

24Jesuh in, a thasiazet tih amuh ten, “Mihau tei ca in Pathian Uknak sungah a tum tuk cu izahta haksa him? 25Mihau pa khatin, Pathian Uknak sungah a tum sangin kalauk pa khatin, hio kua sungah a tum tuk khi baih saw,” tin hilh hi.

26Mipi ten mah thu a zak haw ten, “Nunpatnak cu akua in ngah thei tuk him?” tin dong haw hi.

27Jesuh in, “Mihing tei lak pen a cangthei ngawlmi cu Pathian lak pen cangthei,” ti hi.

28Mahten Peter in, “Zo in! Ka innkua uh zamin, nangmah zui ung hi,” tin ti hi.

29Jesuh in, “Hi zuh hi, na tihmi cu man hi. Ciang zetin hilh ing. Akua hei hihen a innkua, a zi, a unau, a nu le pa, a ca naute hei hihen, Pathian uknak hangin a zamsan tale, 30a nunsung hihimah a let tampi in ngah tuk a, a hung tuk laihmi sungah kumkhua nunnak ngah tuk hi,” tin hilh hi.

A Thih Tuk Thu A Vei Thumnak Hilh

(Mt 20:17-19; Mk 10:32-34)

31Jesuh in, a nungzuitu sawm le pa nih cu mundangno ah hawhpihin amuh tei lakah, “Ngai un! Jerusalem ah hawh tuk hung. Mihing Capa i thu profet tei hilh hammi hempoh cu kim tuk hi. 32Gentail tei khutah henpih haw tuk a, amuh ten cekpan bawlnakin mang haw tuk hi. Zawnsakin, cilsiak haw tuk hi. 33Vat haw tuk a, dawlbel ten that haw tuk naven ni thum nungten tho in, nungleh tuk hi.”

34Mahnaven a nungzuitu ten thei zo haw ma hi. A sonnuammi cu amu lak pen selin, a um hangin a otmi i sullam thei haw ma hi.

Jesuh In Mitcaw Damtik

(Mt 20:29-34; Mk 10:46-52)

35Jesuh cu Jerikho khua a hen kuan ten lampi elah khutdawh ngentu mitcaw pa khat khung hi. 36Mi honpi tei hawhthawm a zak ten iti bang thu him? tin dong hi.

37“Nazareth mi Jesuh hung hi,” tin don haw hi.

38Mahpa in, “Jesuh! David Capa kei hehpih zalin,” tin au het hi.

39Mailam a um mi honpi ten mengdenin, tin liat haw naven mitcaw pa in, “David Capa kei hehpih zalin hi,” tin auto nawnawm hi.

40Mah hangin Jesuh cu dingin, “Mitcaw pa khi hilai ah pui un,” tin thupia hi.

A elah a hen ten Jesuh in, 41“I bawlsak tuk deih cim?” tin dong hi.

“Topa, khua muleh nuam ing,” tin ti hi.

42Jesuh in, “Mah ahi tale khua mu lehin! Na upnakin nang damtik zo,” ti hi.

43Thakhat thu in, khua muleh thei a, Jesuh zui in, Pathian thangphat pepel hi. Mi honpi ten amuh haw ten a venghawng haw in Pathian thangphat khawng haw hi.

Zur Zeit ausgewählt:

LUKA 18: NBF1

Markierung

Kopieren