LUKA 17

Sualnak

(Mt 18:6-7, 21-22; Mk 9:42)

1Jesuh in, a nungzuitu tei lakah, “Sualnak sung a caksuktiktu cu a umngawl cang ngawlmi mahnaven hiti bang a umtiktu cu a ca in lauhuaizet hi. 2Hi naupang pa kha khat a sualtiktu cu a ngawngah cangngawinak suangtum khaihin, tuipi thuanthum sungah vawk ahin ama ca pha saw tuk hi. 3Mah hangin thil na bawl uhmi humah ngalling un!

“Na unau in thil a ti sual tale thuhilh inna, a sikkikleh tale ngaidamin hi.#Mt 18:15; 4Ni khat sungin na humah vei salih tian a sual hei in, na lakah hungin, sual ngai ing, sikleh mahtak ing hi tin a ti tale ngaidamin hi,” ti hi.

Upnak

5Nungzui ten, “Ka muannak uh hi khang taw totikin hi,” tin Topa cu ti haw hi.

6 Topa in, “Noh ten ankam ci tia upnak na nei uh tale hi pulung kung hi na bul bong inna, tuipi thuanthum sungah phutin, tin ti thei tuk uh ci.” Mahten na tihnak uh bangin piang tuk hi.

Nadektu i Dehvo

7“Sontehnakin nangmu sungah pa kha khatin umlawhpa khat nei in, a umlawhpa cu leilet ahimata tuucing bang a hita ahin, inn a pin ten manlangin an ei nawnawmin, ti ni uh cim? 8Ti tukma uh ci! Mah sangin, ‘Ka takeih tuk bawlsakin hi. Na vansilh inna, ka an eih sung keimah cinglengin hi. Mahceng ten nang cu ei pheng tuk lai ci,’ tin ti saw tuk ci. 9Umlawh ten, ‘Hi dekin,’ tin thupiakmi a bawl khawng hangin pahnak awnkam co tak ung hi tin ngaihsut tuk hi sapma hi, hi zuh ma maw? 10Mahti bang lelengin, nangmu humah vang hi bok hi. Bawl un, tin, a tih haw mi na bawl khawng uhten, ‘Kohte cu a nemcuam ngawlmi nadektu ung hi. Ka dehvo uh a dektu bek poh ung,’ tin ti un,” tin hilh hi.

Jesuh In Mi Sawm Khat Damtik

11Jesuh cu Jerusalem lam zuanin, a hawh ten Samaria le Galilee ngamngi pal vawk thah hi. 12Khua pa khat a hen ten mah khua a miphaak sawm khat ten tawk haw hi. Lam khawla thimah ding haw in, 13“Jesuh! Topa! Keimuh hehpihin,” tin au haw hi.

14Jesuh in, amuh ten amuh tei lakah, “Hawhta unna, thiampi ten zociang haw tahen,” ti hi. Amuh cu a hawhlih laihtak haw in dam haw hi.#Thiam 14:1-32; 15Amu sung a, pa khatin, a dam zo khi amuh duncop ten kiklehin, aw ngingzet tuah Pathian thangphat hi. 16Jesuh ke bul, lei ah bokin, lungdam thu hilh hi. Mahpa cu Samaria mi pa hi. 17Jesuh in, “Damnak cotu cu mihing sawm khat si. Adangte ilai ah haw him? 18Ita hi ngamdangmi pa khat bek hi Pathian nelah lungdam thuhilh tukin hung him?” tin ti hi. 19Jesuh in, “Tho inna, hawh ten hi, Na muannakin nang damtik zo,” ti hi.

Pathian Uknak A Hennak

(Mt 24:23-28, 37-47)

20Farasi mi khenkhat ten, “Ituk ten Pathian Uknak heng tuk him?” tin Jesuh dong haw hi. Jesuh in, “Pathian uknak cu mitmuhin hung ma hi. 21Kuamah in, ‘Zo un, hilai hah um hi! Mahlai khah um hi,’ tin ti haw tukma hi. Itahim titale Pathian Uknak cu nangmu sungah#17:21 Na sung uhah um hi: tihmi hi “Noh tei lakah um hi,” le “Noh tei lakah lang tuk hi” tih vangin tih thei hi. um,” ti hi.

22Nungzuitu tei lakah, “Mihing Capa i hun cu ni khat beek mu tale hung tin na thuduhsam hun uh heng tuk naven mu tukma toh uh ci. 23Noh tei lakah, ‘Zo un! Hilai ah um hi. Zo un hilai ah khah um hi,’ tin a titu um haw tuk hi. Mahnaven a zo tukin hawhta pahsuh un hi. 24Khuaphelepin van langlam mawk pen langlam mawk tian, a vak khawng bang bokin Mihing Capa i ni hen ten hi bok tuk hi. 25Mahnaven masabelin amah in nase zetin thuak masa tuk a, tulaih mihing ten pom haw tukma hi. 26Noah khanlaih a, thil umdan bangin Mihing Capa khanah vangin piang tuk hi.#Pian 6:5-8; 27Noah cu timbaw sungah tum a, tuihautungin, a venghawngin, a thih khawng laklawh ei le in haw a, zihuai pasal nei in um haw hi.#Pian 7:6-24; 28Lot khanlaih a, thil umdan bangbokin hi bok tuk hi. Akua na bangin zu le sa ei in um haw tuk a, nate lei le zuakin, anci ciingin inn sa haw hi. 29Lot in Sodom a taisan ni-in, van pen mei le kaat cu nguah bangin zusuk a, mi hempoh thi khawng haw hi.#Pian 18:20-19:25; 30Mihing Capa a langleh ni ten mahtih bangin hi bok tuk hi.

31“Mah ni ten innkuul hum a, ummi ten innsung a thil la tukin tolh haw pahsuh hen a, lo a ummi ten, innah pin haw pahsuh hen.#Mt 24:17-18; Mk 13:15-16; 32Lot zi khi phawk laih uh cim?#Pian 19:26; 33Akua hei hihen ama nunnak a humhimtu cu a nunnak sung tuk naven a nunnak a bo lawhtu in, a nunnak humhim ngah tuk hi.#Mt 10:39; 16:25; Mk 8:35; Lk 9:24; Jn 12:25; 34Thungai in hilh ing. Mah hun ten zaunak pa khat humah mihing pa nih zaukawm haw tuk hi. Mah sung pen pa khat zamin, pa khat la tuk hi. 35Numei pa nih an huan ngel sung pen pa khat cu la tuk a, pa khat cu tang tuk,” ti hi. 36Mi pa nih lo hawh ngel haw tuk a, mah sung pen pa khat cu la in, pa khat cu zam tuk, ti hi.

37Nungzui ten, “Topa aw, mah thute cu ilai lam pen tuk kaw?” tin dong haw hi.

Jesuh in, “Miluang umnak munah mulukolh hulawm haw tuk,” ti hi.

Zur Zeit ausgewählt:

LUKA 17: NBF1

Markierung

Kopieren