LUKA 13

Sualsik Ngawlte Thi Tuk

1Mi khenkhat ten Jesuh lakah, Galilee mitei Pathian lak a, biakpiaknak a bawl haw laihin, Pilat i thah mitei thu cu hilh haw hi. 2Jesuh in; “Galilee mite cu mahti bangin thah a hih haw hangin a dang Galilee mite sangin sual saw haw hi tin ngaisung uh cim? 3Mah kha moh ma! Ciang zetin hilh ing. Na sualnak uh sikin, na nundan uh na khel cuang ma uh tale amuh bangin thi khawng bok tuk uh ci. 4Siloam a, inn sangpi a cim laihin, mihing sawm le liat a delh hup thu khi iti bangin ngaisung uh cim? Mahti bangin a thih haw hangin Jerusalem a um midang sangin sual saw haw hi tih khi langtik hi, tin ngaisung uh cim? 5Mah kha moh ma! Ciang zetin hilh ing: na sualnak uh sikin, na umdan uh na khel uh ma tale amuhte bangin thi khawng leleng tuk uh ci,” tin ti hi.

A Ngah Ngawlmi Theikung Tehkipnak

6Jesuh in amuh tei lakah tehkip thu hi bangin hilh hi. “Nidang laihin mi pa khatin, a huan sungah theipi kung pa khat phut hi. A ngah le ngah ngawl veh lehcet naven mu awng ma hi. 7Mah hangin huan cingtu pa i lakah, ‘Zo in, kum thum sung pikpekin, hi theikung a ngah le ngah ngawl veh leleng naveng a ngah mu awng mang hi. A kung hi phukin! Ita leingam pha eilal li tuk him?’ tin ti hi. 8Mahnaven huan cingtu pa in, ‘Topa kum khat sungno cu zo hihin hi. A kimkotin lei cek nang inna, leidawm leih teh hih nang. 9Mai kumah a ngah tale lungdamhuai hi tuk a, a ngah ma tale phuk lehtik pohin,’ tin hilh hi.”

Sabbath Ni In Numei Damtik

10Vei khat cu Sabbath ni-in, Jesuh in pumkhawm innah thuhilh hi. 11Mahlai ah dawi ngilo i khalhsiatmi numei pa khat um hi. Mah dawi ngilo in kum sawm le kum liat sung ngolin bawl hi. A elte kuntik ngah khawng hangin camzetno in ding thei ma hi. 12Mah nu cu Jesuh in amuh ten samtulin, “Numei nu aw na natnak pen luat zo toh ci,” tin au hi. 13A humah khutsuanin thupha piak ceng ten tina nu cu thakhat dingtoleh thei in, Pathian thangphat hi.

14Pumkhawm inn cingtu upa pa khat cu Sabbath ni-in, Jesuh in, mi a damtik ten a thinuk mahtakin, mipi tei lakah, “Nadehnak tukin ni luk um hi. Hi ni luk sungah hungin, damduntik unna, Sabbath ni ah hung pahsuh un,” ti hi.#Suah 20:9-10; Daan 5:13-14;

15 Topa in, “Noh mi ultungte akua hei hihen Sabbath ni-in, na khui uh le na cipuh uhte a khau dukin, a inn haw pen tui innakah hawhpih khawng uh ci. 16Atu-in hilai ah Abraham casuan sung pen kum sawm le kum liat sung Satan i hetcipmi um hi. Himi hi Satan bawlsiatnak sung pen Sabbath ni-in luattik tukmi hi ma maw?” tin ti hi. 17A donlehnakin, a ngal cu zakca zetin bawl hi. Mipi cu thasiahhuai tampi a bawl hangin lungdamzet haw hi.

Ankam Ci Tehkipnak

(Mt 13:31-32; Mk 4:30-32)

18Jesuh in, “Pathian Uknak cu ituah bangve him? Ituah teh kim kam nang? tin ti hi. 19Mi pa khatin ankam ci la in, a lo sungah a vawhmi tuah bangve hi. A vawhmi cu po in, khangto a, thingkungah suak hi. A kangkak humah vano ten bu sa haw,” tin hilh hi.

Naman Tehkipnak

(Mt 13:33)

20Jesuh in, “Pathian Uknak cu ituah bangve him? ti leleu hi. 21Numei pa khatin naman demno cu la in, sangvut kho khat sungah sawhin, a sangvut cu thawhtik khawngmi naman tuah bangve,” ti hi.

Kongka Cawngcik

(Mt 7:13-14, 21-23)

22Jesuh cu Jerusalem lam zuanin, a hawh laihin, khua pa khat nung pa khat pal pepel a, thuhilh thah pepel hi. 23Mi Pa khatin, “Topa nunpatnak a ngahtu tuk hi mihing demno bek tuk maw?” tin dong hi.

Jesuh in hi bangin don hi. 24“A cawngcikmi kongka pen tum tuk hantiam un hi. Itahim titale mi tampi ten mahlai sung tum tuk cu hantiam li haw naven tum thei haw tukma hi. 25Inn neitu bawi cu tho in, kongka a khah hangin pualamah dingin kongka cu kiu in, ‘Topa kong hon zazalin hi,’ na ti uh hei in, ‘Ilai pen hung uh cim tih hei thei mang hi,’ tin don tuk hi. 26Mahten noh ten, ‘Nangmah tuah an min, tui min ei lang khat si ung! Ka khuasung uhah hei in, thu na hilh lih khi!’ tin tituk uh ci. 27Mahnaven, ‘Ilai pen hung uh cim tih hei thei kha mang hi. Noh mipha ngawlte, ka nel pen tai khawng un!’ tin ti memek tuk hi.#Saam 6:8; 28Noh cu a pualamah vawkin, um tuk uh ci a, Abraham, Isaak, Jakob le profet hempoh cu Pathian Uknak sungah mu tuk uh ci. Mah hun ten kap le au in, ha ngawileh tuk uh ci.#Mt 22:13; 25:30;#Mt 8:11-12; 29Nisuahnak lam le nitumnak lam pen hei hihen, saklam le hanglam pen hei hihen, mi hung haw tuk a, Pathian Uknak puai ah khung khawm haw tuk hi. 30Mah hun ten atu a nungdawlbelte cu masabelleh haw tuk a, a masabelte cu nungdawlbelleh haw tuk,” ti hi.#Mt 19:30; 20:16; Mk 10:31;

Jesuh In Jerusalem It

(Mt 23:37-39)

31Mahlai takin Farasi mi khenkhat cu Jesuh lakah hung haw in, “Herod in nangmah that nuam hi. Mah hangin hilai mun pen tai in, mundangah hawhin,” tin ti haw hi.

32Jesuh in, “Hawhta unna, mahmi cingne pa i lakah, ‘Tuni le zingten khawhuai hawlvawk tung a, tina damtik tung. A ni thumnak ten ka nadeh ceng tung,’ tin ti hi,” tin hilhta un hi. 33Mahnaven tuni, zing le zinglawi cu hawh pepel hih tung hi. Jerusalem khuasung sialngawl mundangah profet pa kha khat a thih tuk cu hi thei ma hi.

34“Jerusalem, Jerusalem aw! profet thatin, nangma lak a, Pathian hahmite khi suang tuah sep hum ci. Akpi in, a canote a ha nuai ah a uap bangin na mihingte vei tampi ka khut tuah hup nuam naveng phal awng ma ci. 35Mah hangin na Biakinn uh cu munlopin cang tuk hi. Ciang zetin hilh ing. ‘Topa i minin, a hungmi tei humah Pathian i thupha um hi,’ ti in, na hilh theih hun a hen laklawh ka mel mu tukma toh uh ci,” ti hi.#Saam 118:26;

Zur Zeit ausgewählt:

LUKA 13: NBF1

Markierung

Kopieren