JOHAN 3

Jesuh le Nikodemas

1Judah hotu pa khat, a min Nikodemas a tih haw na um hi; amah cu Farasi mi hi. 2Zan khat cu Jesuh lakah hawhin, “Rabbi,#3:2 Rabbi: tihmi cu ‘Sazapa’ tihnak hi. nang cu Pathian i tiikmi zilhtu hi ci, tih thei ung. Nalamdang na bawl mite hi Pathian tel ngawlin kuamah in bawl thei haw tukma,” ti hi.

3Jesuh in, “Thutakin hilh ing: kua hei hihen hinleh#3:3 Hinleh: tihmi cu ‘humlam pen hinmi’ tihvang tih theih hi. ahi ma tale Pathian Uknak mu thei haw tukma,” ti hi.

4Nikodemas in, “Itin kaw pasal cang cu a hin kikleh theih tuk? A nu i pum sungah tumin, vei nih hin cu hi thei tukma hi,” tin don hi.

5Jesuh in, “Thutak hilh ing: kua hei hihen tui le Hawvang tuah hinleh ahimata Pathian Uknak sungah tum thei tukma hi. 6Mihing cu taksa lam pen a nu le pa i hinmi hi; mahnaven Hawvang lam pen Hawvang i hinmi hi. 7Hin thakleh kul ci ka tihmi hi lamdangsa pahsun. 8Huih cu a nuammun pohah theu hi; a thawm thei naven cin ilai pen hungin ilai lamah hawh tuk him tih cu thei ma ci. Hawvang i hinmi vang mahti bangin hi bok hi,” ti hi.

9Nikodemas in, “Itin kaw mahtibang a hih theih tuk?” tin dong hi.

10Jesuh in, “Nang cu Israel mi lak pen zilhtu pa khat hi sisi, ahi hei thei zo ma cim? 11Thutak hilh ing: ka theih uhmi hilh ung a, ka muh uhmi theitik ung; mahnaven akua hei in, ka thu hilh uhmi pom nuam ma uh ci. 12Hi leihum thu le la hilh naveng sang ma ci, mahtin ahi tale itin kaw vancung thula ka hilh ten na san theih tuk? 13Vancung pen a tolh sukmi Mihing Capa sial ngawl kuamah vancungah a kaitu um haw ma,” ti hi.

14“Moses in phillawn pen ngolh humah daal ngul a khai bangin Mihing Capa vang khai hi bok tuk hi;#Mipum 21:9; 15Mah hangin amah a umtu hempoh cu kumkhua nunnak ngah haw tuk hi. 16Pathian in leihum hi a ih leita hangin a Capa neihcalam pia in, amah a umtu hempoh cu thi ngawlin kumkhua nunnak nei haw tuk hi. 17Itahim titale Pathian in, a Capa a tiik ten leihum thukhentu tukin tiik ma hi. Leihum Nunpantu tukin tiik hi.

18Akua hei hihen Capa a umtu cu thukhennak thuak tukma hi, mahnaven a umngawltu cu Pathian i Capa neihcalam a up ngawl hangin thukhennak thuak zo hi. 19Thukhennak tihmi cu hi tin hi: leihumah vaknak heng naven miten vaknak sangin thimnak deih saw haw hi; itahim titale a bawlmi haw a pha ngawl hangin hi. 20Akua hei in thilpha ngawl a bawltu in, vaknak cu hua in, vaknak sung hei ah hung tukma hi, itahim titale a pha ngawl a bawl mite lang suak kawn tih lauthawng hi. 21Mahnaven a manmi a bawltu cu vaknak sungah hungin, a bawlmi cu Pathian deihmi zui in, a bawlmi hi tih cu mah vaknakin langtik hi.

Jesuh le Johan

22Mah nungten Jesuh cu a nungzuitute tuah Judah pengah hawh haw a, mahlai ah amuhte tuah hun demno sung umin tuiphumnak pia hi. 23Johan vang Aenon tihmi, Salim pen a khawla ngawlnak munah tuiphumnak pia bok hi, itahim titale mahlai ah tui tampi na um hi. Mi tampi a lakah hung haw a, tuiphumnak pia hi. 24Hi thu hi Johan thawng a khiak haw laih ngawlin a piangmi thu hi.#Mt 14:3; Mk 6:17; Lk 3:19-20;

25Johan nungzuitu khenkhatte le Judah mi pa khat pa cu thianthohnak thu ah thu dondun haw hi. 26Mah hangin Johan lakah hawh haw in, “Sazapa Jordan ngun pen nisuahnak lam a, nangmah tuah a ummi pa khi thei laih cim? A thu na son mek lih pa khi? Atu-in tuiphumnak pia li bokin mi tampi a lakah hawh haw hi,” tin ti haw hi.

27Johan in, “Pathian piakmi tih ngawlin kuamah in comi imah nei thei haw tukma hi. 28Keimah loli in, ‘Kei cu Khrih hi mang; a mai a hengham mi ing hi,’ tin ka hilhmi a zatu cu nangmuhte uh ci.#Jn 1:20; 29Huaimi mothak cu a huaitu tangvalpa ta hi; mahnaven zihuaitu tangvalpa i ngualcam, dingin, a aw nging a ngaitu pa cu, tangvalpa i aw a zak ten a lungdamnak cu cangkim hi. 30Amah cu khangto tuk a, kei cu kiamsuk tung,” ti hi.

Vancung Pen A Tolhsukpa

31Humlam pen a hungmi cu mi hempoh sangin ngeng saw hi. Leihum pen a hungmi cu leihum ta na hi a, leihum thu hilh hi; mahnaven vancung pen a hungmi cu ihempoh i humah um hi. 32Amah in, a muhmi le a zakmi thute hilh naven kuamah in, a thu cu pom haw ma hi. 33Mahnaven kua hei in, a thuhilhmi a pomtu cu mahti bangin a pom hangin Pathian cu dik hi tih khohtik hi. 34Pathian i tiikmi cu Pathian in, a Hawvang cangkimnak a piak hangin Pathian i thu cu phuang hi. 35A Pa in, a Capa cu it in, ihempoh a khut sungah pia hi.#Mt 11:27; Lk 10:22; 36Capa a umtu cu kumkhua nunnak nei hi; Capa i thu a eltu cu nunnak nei ngawlin Pathian i dantatnak a humah um tuk hi.

Zur Zeit ausgewählt:

JOHAN 3: NBF1

Markierung

Kopieren