JOHAN 2

Kanaan Khua Mopuai

1Ni nih nungten Galilee peng Kanaan khua ah mopuai na um hi. Jesuh i nu vang mahlai ah um bokin, 2Jesuh le a nungzuitute vang sam bok haw hi. 3A sabittui haw a bo ten a nu in, Jesuh lakah, “Sabit tui neileh haw ma toh,” tin hilh hi.

4Jesuh in, “Ka bawl tukmi imah hilh hih pahsun; ka hunkim ma laih,” ti hi.

5A nu in, umlawh tei lakah, “A hilh hempoh bawl un,” ti hi.

6Mahlai munah Judah daan a ummi bangin a khut somnak haw tuk tuibeel ngengpi beel luk koih haw hi. Beel pa khatah galan sawm nih pen sawm thum tian va hi. 7Jesuh in umlawh tei lakah, “Hi beel sungah tui a dimin than un,” ti hi. Beel dimlet tian than haw in, 8a lak hawah, “Beel sung a, tui cu suak unna, puai bawlnak a, vaihawmtu pa i lakah na pia un,” ti in, tui cu pia haw hi. 9Mah tui cu sabittui ah cangin, mahmi cu tep hi. Ilai lam pen sabittui heng him tih thei haw ma naven tui a suaktu umlawh ten na thei haw hi. Mah hangin mopa cu samin, 10a lakah, “A kuakua hei in sabit phabel cu amasabelin pia mek haw si, mi tampi a kham deuh haw nungten sabit thawthong pia thei mek haw hi; mahnaven nang cu sabit a ukbel cu a tawp tianin pia thei ci,” ti hi.

11Jesuh in nalamdang a bawl masabelmi cu Galilee peng Kanaan khua ah bawl hi. Mahlai ah a sunloihnak langtikin, a nungzuitu ten um haw hi.

12Mah nungten Jesuh le a nu, a nau le a nungzuitu cu Kapernaum khua ah hawh haw a, mahlai ah dawmlaih sungno cam haw hi.#Mt 4:13;

Biakinn ah Jesuh Hawh

(Mt 21:12-13; Mk 11:15-17; Lk 19:45-46)

13Kaltan puai hunkim awndiak tohin, Jesuh cu Jerusalem ah hawh hi.#Suah 12:1-27; 14Biakinn a hen ten mahlai munah khui, tuu, laileng a zuaktute le tangka thektute cabuai ah a khun haw khi mu hi. 15Mah hangin khau cu hualin, tuu hihen, khui hihen a zuak haw mite cu vatin, Biakinn sung pen hawlvawk khawng hi; sum thektu tei cabuaite vang bungletsak khawngin, a sumnawnte cu thehkehsak khawng hi. 16Laileng a zuaktu cu: “Hilai pen na laileng uhte taipih khawng un! Ka Pa i inn cu na dawl bawlnak uhin, mang toh pahsuh un!” tin thupia hi. 17A nungzuitu ten, “Maw Pathian aw, na inn ka tha ngaihnak uh cu ka lungmu sungah mei alh bangin sa hi,” tin Lai Thiangtho i a tihmi phawkleh haw hi. #Saam 69:9;

18Judah hotute cu hung haw in, “Hiti bang bawl theihnak thunei ing tih langtiknakin, i nalamdang kaw na lak tuk?” tin dong haw hi.

19Jesuh in, “Hi Biakinn hi phelet unna, ni thum sungin saleh thei tung,” ti hi.#Mt 26:61; 27:40; Mk 14:58; 15:29;

20Amuh ten, “Ni thum sungin saleh thei ngai a ni cim maw? Hi Biakinn cu kum sawm li le kum luk sung sakmi hi,” tin ti haw hi.

21Mahnaven Jesuh i hilhmi Biakinn cu ama taksa pumpi a son nuammi hi. 22Mah hangin Jesuh thihnak pen a thawhleh nungten a nungzuitu ten ama taksa pumpi thu hilh hi tih cu theileh haw in, Lai Thiangtho hilhmi le Jesuh hilhmi cu um haw hi.

Jesuh In Mihing Umdan Thei Khawng

23Jesuh cu Kaltan Puai sungin Jerusalem khua sungah a umlaihin, mi tampi ten nalamdang a bawl mite amuh haw hangin amah cu um haw hi. 24Mahnaven, Jesuh in, a muhte cu muang ma hi, itahim titale mihing cu iti bang haw him tih a theih khawng hangin hi. 25A thu haw cu midang tei hilh kul ngawlin a lungmu haw iti bang him tih cu thei khawng pilpial hi.

Zur Zeit ausgewählt:

JOHAN 2: NBF1

Markierung

Kopieren