JOHAN 12

Jesuh Cu Bethani Khua Ah Zimui Leih Haw

(Mt 26:6-13; Mk 14:3-9)

1Kaltan Puainak tuk ni luk sap ten Jesuh cu Bethani khua Lazaras innah hawh hi. Bethani khua cu thihnak pen a thawhtik lehmi Lazaras i khua hi. 2Mahlai ah takeih bawl haw in, Martha in nadeh bawmin, Lazaras cu Jesuh i elah khung hi. 3Mary in zimui mantambel cawi in, Jesuh i ke noihin, a sam tuah nawt lalaih hi. Zimui ngim cu innsung hempoh nam bengbung khawng hi.#Lk 7:37-38; 4Jesuh i nungzuitu lak pen amah a zuaktu tuk pa Judah Iskariot in, 5“Hi zimui hi zuak ahin, tangka za thum laih man tuk si. Zuakin ca-ngah pia ahin, pha saw tukma maw?” tin ti hi. 6Hi bangin a ngaihsutnak cu mi ca-ngahte a hehpih hangin kha ma hi. Amah khi nguca pa, tangka dip puatu hi a, tangkate cu zelkuh mek hi.

7Mahnaven Jesuh in, “Bawl hih hen! Ka luang vui ni ten a bawl tuk ca in bawl ta oh hen, 8Mi ca-ngahte cu nohtei lakah um leleng haw tuk hi. Kei cu um leleng tuk mang,” ti hi.#Daan 15:11;

Lazaras Thah Tum Haw

9Judah mi honpi ten Bethani khua ah Jesuh um hi tih a zak haw ten mahlai ah hawh haw hi. Jesuh a um hang bek hei hi ngawlin thihnak pen a tholehmi Lazaras zo nuam thah bok haw hi. 10Mah hangin Thiampi Sang ten Lazaras vang cu thatcih tukin thu ngaisung haw hi. 11Itahim titale Lazaras i thu hangin amuh lampuitu lehlam nunghek zamin, Jesuh a up saw haw hangin hi.

Sunglawizet In Jerusalem Ah Tum

(Mt 21:1-11; Lk 19:28-40)

12A zingten Kaltan Puai bawl tukin a hengtu mi honpi ten Jesuh cu Jerusalem khua ah hung tuk hi tih thu za haw hi. 13Mah hangin tumcehte la in, amah muak tukin hawh haw hi. “Pathian cu thangphat un! Topa minin, a hungmi cu Pathian in thupha pia tahen. Pathian in Israel kumpipa cu thupha pia tahen!” tin nging zetin au haw hi.#Saam 118:25-26;

14Lai Thiangtho sungah,

15“Zion khuapi,

na thinsu pahsun hi.

Na kumpipa hung li hi.

Laakno humah khungin

hung li hi,”

tin a tih haw bangkekin

Jesuh cu laakno humah

khung hi.#Zek 9:9;

16Mah hunlaihin, a nungzuitu ten a sullam imah thei haw ma hi. Mahnaven minthannak tuah a thawhleh nungten, ama thu ah Lai Thiangtho in hi bangin hilhin, amu ca tukin hi bangin bawlsak hi tih khi thei pheng haw hi.

17Jesuh in Lazaras cu khansung pen tulin tin samin, thihnak pen a thawhlehtik laih khin Jesuh i el a umtu ten hi thu umdante cu midang tei lakah hilhleh sawlawn pepel haw hi. 18Nalamdang ngengpite a bawlnak hangin mi tampi ten amah cu na muak haw hi. 19Mahten Farasi ten, “Imah tileh thei ma toh si hung maw! Zo unna, leihummi hempoh ten amah zui zo haw!” tin pa khat le pa khat tidun li haw hi.

Grik Ten Jesuh Zei Haw

20Puai sungah Pathian bia tukin Jerusalem a hawhtu mi honpi tei lakah Grik mi khenkhat tel kha bok haw hi. 21Galilee peng, Bethsaida khua mi, Filip lakah, “Sazapa, Jesuh mu nuam ung,” tin ti haw hi.

22Filip cu Andru lakah hawhin hilh hi. A pa nih haw in hawh haw a, Jesuh lakah hilh haw hi. 23Jesuh in, “Mihing Capa cu minthannak ngengpi a ngahnak tuk hun heng zo hi. 24Thutak hilh ing; leisung a, cinmi anci cu a muat masa ma tale amah cu cang khat bekno leng tuk hi. A thih hihta ceng ten anci dang tampi piangtik thei hi. 25Akua hei hihen a nunnak a ittu cu, a nunnak bo lawh tuk hi. Hi leihum a nunnak a huatu in kumkhua nunnak co tuk hi.#Mt 10:39; Mk 8:35; Lk 9:24; 17:33; 26Akua hei hihen ka na a dek nuamtu ten ka nungzuitute hi haw tuk hi. Itahim titale ka nadektu cu keimah tuah um kawm thei tuk hi. Keima nadektu cu ka Pa in pahcoihnak pia tuk hi.

Jesuh In A Thih Tuk Hilh

27Jesuh in, “Atu-in ka lungmu haksa hi. Itin ti kam nang? Pa aw hi huncan cu ka humah hengtik pahsun, tin ti tung maw? Itahim titale hi cimnak huncan cu a thuak tuk hihimin, ka hunnak cu hi zo hi. 28Pa aw, na minthangtikin,” ti hi. Mahten van pen aw ngingin, “Minthannak cu pia zo ing. Thangtik nawm tuk laih ing,” ti hi.

29Mi honpi ten mah aw cu a zak haw ten, “Vanthum bang um si,” tin ti haw hi. A khenkhat ten, “Vancungmi in amah otpih hi,” tin ti haw hi.

30Mahnaven Jesuh in, “Hi aw hin a hilhmi thu cu keima ca hi ngawlin nangmuh tei ca hi. 31Atu-in hi leihum thu a khen hun le leihum uktu neh huncan hi tuk toh hi. 32Lei pen khaitohin ka um ten mi hempoh ka lakah pui khawng tung,” ti hi. 33Hi a tihnak cu a thih ten iti bang thihnak thuak tuk him tih a langtik nuamnak hi.

34Mi honpi ten, “Keimuh Daan, ‘Khrih cu kumkhua catngawlin nung leng tuk hi,’ tin hilh hi. Mah ahimata iti bangin Mihing Capa cu khaitohin um tuk tin ti thei nge cim? Mihing Capa tihmi cu akua him?” tin ti haw hi.#Saam 110:4; Isa 9:7; Ezk 37:25; Dan 7:14;

35Jesuh in, “Nohtei lakah khuavaknak hun demno sung um tuk laih hi. Khuavaknak nohtei lakah a umlaihin, khuathimnak nohtei humah a heng tuk ngawlin mailamah nawt leleng un hi. 36Khuavaknak na neih laih uhin, vaknak i mi na hih theihnak tukin vaknak cu na um un hi,” tin don hi. Hi thu a hilh ceng ten amuh tei lak pen tulin ngelh den hi.

Mipi Ten Um Haw Ma

37Mahti bangin nalamdang ngengpi tamzet cu a mitmuh haw hihimah bawl li naven amah cu um haw ma hi. 38Hihi cu profet Isaiah i,

“Topa, ka hilh uhmi thu

akua in um him?

A koi lakah him, Topa i

huham a langtik?”

tin, a hilhmi thu

a cangkimnak tukin hi.#Isa 53:1;

39Mah hangin a up theih ngawlnak haw hi. Itahim titale Isaiah lelengin,

40“Pathian in, a mit haw cawtikin,

a lungmu haw bingtik hi.

Mah ahimata,

khua muleh kha sual

haw tuk a, a lungmu haw in

thei kha sual haw tuk hi.”#Isa 6:10;

41Isaiah in hi thu a hilhmi cu Jesuh in sunloihnak co zo tih amuh hangin hi.

42Hiti bangin hi thu a piang vangin Judah thuneitu tampi ten Jesuh cu um haw hi. Mahnaven Farasi ten Biakinn pen hawlvawk tuk a lau haw hangin langtaak zetin awn ngam haw ma hi. 43Mihing tei mitmaipha muh tuk cu Pathian i mitmaipha muh tuk sangin deih saw haw hi.

Jesuh Awnkamin Thukhennak

44Jesuh in nging zetin, “Kei a umtu cu keimah um hi ngawlin keimah a tiiktu Pa vang umcih bok haw hi. 45Keimah a mutu cu keimah a tiiktu Pa vang mucih bok haw hi. 46Akua hei hihen keimah a umtute cu khuathim sungah a um khak haw ngawlnak tukin, vaknak tuah hung zo ing. 47Ka thu za leng napi in, a ngaingawltute cu kei in thukhen tuk mang hi. Leipi thukhen tukin hung hi kha mang hi. Leipi nunpan tukin hung hi saw ing. 48Keimah lawlin ka thu a pom nuam ngawltu tei ca in, thukhentu tuk cu um leng hi. Ka hilhmi thu hi ni nungdawlbel ten a thukhentu hileh tuk hi. 49Hi thu hi thuman hi. Itahim titale keima thu in hilh mang hi. Keimah tiiktu pa i thupiaknak bangin hilh ing. 50Hilh tuk ci tin, a tiikmi thu cu kumkhua nunnak piatu hi tih khi thei ing. Mah hangin ka hilhmi thu cu ka Pa in hilh tuk ci tin, a tihmi thu khi hi,” ti hi.

Zur Zeit ausgewählt:

JOHAN 12: NBF1

Markierung

Kopieren