JOHAN 10

Tuucingtu Tehkipnak

1Jesuh in, “Thutakin hilh ing: Tuu inn sungah tuu kongka pen tum ngawlin kongka dang pen a tumtu cu nguca le damiah hi. 2A kongka pen a tumtu cu a cingkhawitu tuucing hi. 3Kongka cingtu in kongka cu honin, tuu ten a aw khi za haw hi. A tuu cu amu min tek tuah samin pualamah tulpih hi. 4A venghawngin, a kaih suah ceng ten a mailamah hawhhamin, tuu ten a aw a zak haw hangin a nungzui haw hi. 5Midang cu zui nuam kha haw ma hi. Itahim titale a aw za haw ma,” ti hi.

6Jesuh in tehkipnak tuah thuhilh li naven itih nuamnak him tih thei baan haw ma hi.

Tuucing Pha Jesuh

7Mah hangin Jesuh in hi bangin hilhleh hi. Thutakin hilh ing. Keimah cu tuu tei tumnak kongka ing. 8Ka masuan a hungmi hempoh cu nguca le damiah a hih haw hangin tuu ten a aw ngai nuam haw ma hi. 9Kei cu kongka tumnak ing. Keimah tawnin, a hawhtu pawpoh cu nunpatnak ngah tuk hi. Tumtuak, tultuakin hamhing dimdem mu haw tuk hi. 10Nguca ten ngu tuk, that tukin le siatsuah tuk bekin hung haw hi. Mahnaven kei cu nunnak cangkim a neih theihnak haw tukin hung ing.

11Kei cu tuucing pha ing. Tuucing pha in, a tuu tei ca in, a nunnak pia ngam hi. 12Cialcop tuucing pa cu tuucing ngangai a hih ngawl hangin le a neitu ngai a hih ngawl hangin cingnete hung li amuh ten tuute zamsanin tai masabel hi. Mah hangin cingne ten tuu cu manin hilkek khawng haw hi. 13Cialcopmi cu cialcop a hih hangin le tuu tei ca a ngaihsut ngawl hangin tai thong hi. 14-15Tuucing pha cu keimah ing. Pa khi ka theih bangin Pa hei in keimah thei bok hi. Mahti bang bokin ka tuu ten keimah thei haw a, keimah hei in ka tuute thei bok ing. Mah hangin amu ca tukin ka nunnak pia ngam ing. #Mt 11:27; Lk 10:22; 16Hi tuuhon sungah a tel kha ngawlmi tuu dang hei nei ing. Amuhte vang hunpih hihim bok tung hi. Ka aw ngai haw tuk a, tuucing pa khat i angsungah tuuhon khat suak haw tuk hi.

17“Ka pa in kei a ihnak cu ka nunnak ka piak ngam hangin hi. Hi bangin ka phalnak cu ka co kikleh theih tuk hangin hi. 18Ka nunnak cu kuamah in laksak thei haw tukma. Keima phal hangin ka piakmi hi. Piaknak tuk thu hei nei ing a, lakleh theihnak thu vang nei ing. Mahmi cu ka pa in bawl hen tin, a thupiakmi hi,” ti hi.

19Hithu hangin mipi tei sungah khendunnak um leleu hi. 20Mi tampi ten, “A sungah khawhuai umin, sil zo hi, ita a thu ngai li uh kam?” tin ti haw hi.

21Mahnaven khenkhat ten, “Khawhuai a neitu in hi bangin thuson thei tukma hi. Khawhuai a neimi pa in mitcawte cu i bang khua mutik thei tuk him?” tin ti sem bok haw hi.

Jesuh Thu Nial Haw

22Phalbi hun hi a, Jerusalem Biakinn apnak puai bawl hun cu heng hi. 23Jesuh cu Biakinn sung a, Solomon maisap a tih haw mi ah vak kawi li hi. Mahlai takin, 24Mipite khawmdun vut haw in, “Kohte hi ituk tian thinkhamnak pia tuk cim? A ciangin sonin hi. Khrih hi ngangai cim?” tin ti haw hi.

25Jesuh in, “Nohte hilh zo naveng sang nuam ma uh ci. Ka Pa i thu a piaknak hangin ka bawlmi in keima hilh kul ngawlin langtik haw poh hi. 26Mahnaven nohte cu ka tuu na hih uh ngawl hangin umma uh ci. 27Ka tuu ten ka aw ngai haw hi, amuh vang thei ing a, amuh hei in keimah zui haw hi. 28Kumkhua nunnak pia ing a, ituk mahten thileh haw tukma toh hi. Amuh vang ka kut sung pen kuamah in lonsak thei haw tukma hi. 29‘Ka pa in, keimah a piakmi cu ihempoh sangin ngeng saw,’ a hih hangin ka Pa i cinkhawinak sung pen kuamah in lonsak thei haw tukma hi. 30Ka Pa le kei cu pumkhat, sakhat ung,” ti hi.

31Mipi ten Jesuh sehnak tukin suang khul leleu haw hi. 32Jesuh in, “Ka Pa i tiikmi thilpha tamzet nohtei mai ah bawl ing. Hi thilte sung pen i hangin kaw suang tuah sep nuam li in, na um uh?” tin ti hi.

33Amuh ten, “Suang tuah ka seh nuamnakbel uh cu thilpha na bawl hangin hi kha ma hi. Pathian na siatson hangin hi. Nang cu mihing thawthong poh nave cin, nangmah le mah Pathian bangin sondun cop ci!” tin don haw hi.#Thiam 24:16;

34Jesuh in, “Nangmu Daan laibu sungah Pathian in, ‘Nohte cu pathiante hi uh ci,’ tin ngatin um hi.#Saam 82:6;

35Lai Thiangtho i hilhmi cu kumkhua in thuman hi leleng hi, tih cu thei ung hi. Mahten Pathian i, a thuhilhmi mihingte cu ‘pathian,’ tin sam hi. 36Kei cu ka Pa i tenmi le leihumah a tiiksukmi ing. Mahti bang a hih hangin Pathian Capa ing hi, ka tih ten Pathian zawnsak ci, tin na tih theih uh? 37Ka Pa i deihmi thilte ka bawl ma ahin na up tuk uh ngawlmi hi! 38Mahnaven ka bawl ahi tale keimah na um nuam uh ngawl vangin ka bawlmi bek hi na um uh ahin mawi hi; mahten Pa cu ka sungah umin, Pa i sungah kei um ing, tih na theih lelengnak tukin,” ti hi.

39Jesuh cu man awn leleu haw naven amu khut sung pen suakca ngah hi.

40Jesuh cu Jordan ngun ngalkhat lam a, Johan i tuiphumnak a piaknak mun lamah hawhin, mahlai ah cam hi.#Jn 1:28; 41Mipite cu ama lakah hung haw in, “Johan in nalamdang bawl ma naven a thusonmi hempoh cu man khawng hi,” tin ti haw hi. 42Mahlai munah mipi ten Jesuh um haw hi.

Zur Zeit ausgewählt:

JOHAN 10: NBF1

Markierung

Kopieren