NUNGZUITU 9

Paul i Lungtheknak

(Nung 22:6-16; 26:12-18)

1Mah hunin, Saul cu Topa i nungzuitute that tukin thum li hi. Thiampi Sang lakah hawhin, 2Damaskas khua a, pumkhawm inn uktu ten amah khi a theihnak haw tukin laiken tukin ngen hi. A tuptahmi cu mahlai ah Topa i lampi zuitu a um haw tale numei pano ti ngawl man khawngin, Jerusalem ah pui tung, tin ti hi.

3Saul cu Damaskas khua a henkuanno ten thakhatin van pen vaknakin, amah cu kapsuk hi. 4Saul cu lei ah lumin, “Saul, Saul, itahim kei na bawlsiat?” tin aw pa khat za hi.

5Saul in, “Akua nge cim, Topa?” tin dong hi. Mah aw in, “Na bawlsiat lihmi Jesuh ing hi. 6Tho in, khuapi sungah hawh inna, na bawl kulmi hilh haw tuk,” ti hi. 7Saul tuah khual a zintute cu cawl khawng haw a, kam khatno hei awn haw ma hi; aw cu za ten haw naven kuamah mu thei haw ma hi. 8Saul cu lei pen thoto in, a mit hakto naven imah mu thei ma hi. Mah a hih hangin a khut pen kai in, Damaskas khua sungah hawhpih haw hi. 9Ni thum sung cu khua mu thei ngawlin mah hun sung cu imah ei le in ma hi.

10Damaskas khua sungah umtu pa khat Ananias tihmi um hi. Muhnak pa khat nei in, mah a muhnak sung pen Topa in, “Ananias!” tin sam hi.

Ananias in, “Hilai ah um ing, Topa,” ti hi.

11 Topa in, “Na vaithawi inna, Lampi Cam tihmi ah hawhin hi. Judah i innah Tarsas khua mi, Saul tihmi pa um maw tin dongin hi. Amah cu thungen li laihtak hi; 12amah vangin muhnak nei in mah muhnak sungah a mit khua amuhleh theihnak tukin Ananias tihmi pa cu tumin, a lu humah a khutnga in mu hi,” ti hi.

13Ananias in, “Topa, hi pa i thu hi mi tampi ten hilh li zo haw toh hi, Jerusalem khua a, na mihing tei humah thilpha ngawl a bawl lihte vang hilh haw hi. 14Atu hei in thiampi upa tei thuneihnak tuah nangmah a biatu hempoh man tukin Damaskas ah heng si,” ti hi.

15 Topa in, a lakah, “Hawhin hi, itahim titale amah cu Gentail mi, kumpi le Israel tei lakah ka minthangtik tukin le ka nadektu tukin teng zo ing. 16Mahten keima ca in, a thuak tuk mite cu lak tung,” ti hi.

17Mahten Ananias cu hawh a, Saul i umnak innah tumin, Saul i lu humah a khutnga in, “Unau pa Saul, hilai lam na hun laihin, lampi pen nangma lakah a langmi Jesuh Topa amah loli in, na lakah tiik hi. Khua na muhleh theihnak tukin le Hawvang Thiangtho tuah na dim theihnak tukin nangma lakah tiik hi,” ti hi. 18Thakhatin, Saul i mit pen ngasa lip bang cu caakin khua muleh thei hi. Dingto in, tuiphum hi. 19Mahten an ei in, tha neileh hi. Saul cu Damaskas khua a, thu umtu tei lakah ni demno sung um hi. 20A pumkhawm innah hawh haw in, Jesuh cu Pathian Capa hi tih thu phuang hi.

Damaskas Khua Ah Paul In Thuhilh

21A theitu hempoh ten lamdangsa mahtakin, “Jerusalem pen Jesuh a umtu pawpoh a that litu khi amah hi zuh ma maw? Mahti bang lengin hilai munah hei in, umtute manin thiampi upa tei lakah henpih tukin a hungmi hi si maw?” tin dongdun leilui li haw hi.

22Mahnaven Saul i thuhilhmi cu mualnei dedeuhin, Jesuh cu Khrih loli hi tih a sonmi in, mi thin sungah ciangzet tumin, Damaskas khua a ummi Judah miten a thu cu don thei haw ma hi.

23Ni tamthim nungten Judah mite cu tawkdun khawmin, Saul that tukin thuvaikum haw hi.#2Kor 11:32-33; 24Mahnaven a vaikup haw mi cu Saul hilhtu um haw hi. Amah that nuamin khuapi kongka cu a sun a zanin cing haw hi. 25Mahnaven Saul a zuitu ten zan khat cu bawm sungah koihin, khuapi upnak pang awng pen a pualamah khiasuk haw hi.

Jerusalem Ah Saul Heng

26Saul cu Jerusalem ah hawhin, nungzuitute lakah teltum hi. Mahnaven nungzuitu ten nungzuitu hi bok zo tih khi sang thei ngawlin amah cu lauzet haw hi. 27Barnabas in nungzuitu tei lakah hawhpihin, Damaskas lampi pen Topa a tawhnak le Topa in, a lakah a otmi khi ciang zetin hilh hi. Mahten Saul in Jesuh minin Damaskas khua ah ngalpha zetin, a thuphuannak khi son hi. 28Mah hangin Saul cu amuh tei lakah umin, Jerusalem khua sung le khua hempoh ah hawh a, ngalhang zetin Jesuh min tuah thuhilh hi. 29Grik awn mangtu Judah mitei lakah thuhilhin dondun haw naven amuh ten thah tuk ngeh tum haw hi. 30Mahmi cu thu umtu ten a zak haw ten Saul cu Sisaria ah pui haw a, Tarsas ah kuat haw hi. 31Mahten Judah ngam, Galilee ngam le Samaria ngamsung a pawlpite cu ngimtano in um haw hi. Pawlpi cu Hawvang Thiangtho i bopnak tuah cak dedeuhin, mipum vang khang tawto haw a, Pathian kihcano in um haw hi.

Lidda le Joppa Ah Peter Zin

32Peter cu mun hempoh ah hawh kawkawi in, vei khat cu Lidda khua a ummi Pathian i mihing tei lakah zin tukin hawh hi. 33Mahlai ah Aenias a tih haw mi pa tawk hi. Aenias cu a tizawng a, kum liat sung zaunak pen a tho thei ngawlin a na mi hi. 34Peter in, “Aenias aw, Jesuh Khrih in nangmah damtik hi. Tho inna, na zauphah zialin,” ti hi. Thakhatin Aenias cu tho hi. 35Lidda le Sharon a ummi hempoh ten Aenias amuh haw hangin Topa lamah hekkik haw hi.

36Joppa khua ah Tabitha a tih haw mi numei nu umin, thu umtu bok hi. A Grik min cu Dorkas tih hi a, a sullam cu “Sazuk” tihnak hi. A hun neih hempoh cu thilpha bawlnak le mi ca-ngah bopnakin mang hi. 37Mah hunin, mahnu cu nasezet a tina in, thita hi. A luang cu somin, humta khanah koihto haw hi. 38Joppa khua cu Lidda khua pen naino hi. Joppa khua ah a ummi thu umtu ten Lidda ah Peter um tih a zak haw ten mi pa nihte hah haw a, “Manlang zetin keimu lakah hungin hi,” tin thucah haw hi. 39Mah hangin Peter in, a vaithawi in, amuh cu zui hi. A hen ten Peter cu humta khanah puito haw a, mahlai ah meivong ten a kapthah zuanin, a dam laih a, Dorkas i angki le kawt angki a tak mite lak haw hi. 40Peter in, inn khan sung pen tultik khawngin, khukdin thungen hi; mahten Dorkas i luang lamah hekin, “Tabitha, tho in!” tin ti hi. Dorkas cu a mit hakto in, Peter amuh ten khung hi. 41Peter in, phongin dingtik a, meivongte le thu umtu hempoh cu samin, nung zo, tin amu lakah lak hi. 42Mah thu cu Joppa khua sung hempoh ah thangin, mi tampi ten Topa cu um haw hi. 43Peter cu Joppa khua ah savun tuah thil a bawltu Simon a tih haw mipa lakah ni tampi sung caam hi.

Zur Zeit ausgewählt:

NUNGZUITU 9: NBF1

Markierung

Kopieren