NUNGZUITU 6

Bawmtu Upa Salih

1Hunte a ngeideuh nungten thu umtute cu tam dedeuh haw a, Judah mi le Grik awnin, a awntu Judah mitei laklawhah buainak um hi. Grik awn a mangtu Judah miten nisialin, a kulmi leinak tangka a sep haw ten meivong ten a co haw tuk zah co haw ma hi tin, “Phuciak li,” haw hi. 2Mah hangin nungzuitu sawm le pa nih ten umtu hempoh cu munkhatah samkhawmin, “Sum le pai hangin Pathian thu phuannakah a zulzau uh tale pha tukma hi. 3Mah hangin u le naute, nohtei lakah muantakmi, Hawvang Thiangtho tuah a dimmi le cihnak a neimi mihing salih teng unna, amuhte cu hi thu a vaihawmtu tukin koih tuk hung hi. 4Kohte cu ka huncan uh a venghawngin thungetnak le thuhilhnakin mang tuk ung,” ti haw hi.

5Nungzuitu sawm le pa nih tei ngaihsutnak piakmi i humah a venghawng haw in lungkim ten haw a, upnak le Hawvang Thiangtho tuah a dimmi Stefen teng haw; Filip, Prokholas, Nikanor, Timon, Parmenas le Antiok khua pen Gentail mi Judah biaknak sungah a tummi Nikolas teng haw hi. 6A salih haw in nungzuitu tei lakah hawhpih haw a, nungzuitu ten a luhum hawah khutsuanin thunget sak haw hi.

7Pathian thu cu khang pepel hi. Jerusalem khua sungah thu umtute pung dedeuh haw a, thiampi tampi ten a upnak haw cu pom bok haw hi.

Stefen Man Haw

8Pathian i thupha piakmi le huham tuah a dimmi Stefen in mipi tei lakah nalamdang tampi bawl hi. 9Mahnaven sal suak tei sung pen Stefen tuah thu eldunnak piangin, Stefen i thu eltu lak pen, Sairin khua le Alexandria khua pen a hengmi Judah mite vang tel haw hi. Silisia le Asia ngam a, Judah mite hei tel bok haw hi. 10Mahnaven Stefen cu Hawvang Thiangtho in cihnak pia in, a ot ten kuamah in el thei haw ma hi. 11Mah hangin mi khenkhat khi nawhthuh a piak haw hangin, “Moses le Pathian dodalin awn hi tin thei ung hi,” tin ti haw hi. 12Mipi, upate le Daan zilhtu mite khi a thinuk tukvo in, so haw hi. Stefen cu manin khonsil upa tei mai ah hen haw hi. 13Zolthu bawltu tukin mi khenkhat pui haw a, mahmi ten, “Hi pa in ka Biakinn thiangtho uh le Moses Daan hi zawnsak le nautat, in awn leleng hi. 14Hi Nazareth mi Jesuh in hi biakinn hi phialet khawngin, Moses i khan pen keimu khan tian a ummi a pu le pa tei daan vang cu thek khawng tuk hi, tin a ot laih za ung hi,” tin ti haw hi. 15Khonsil tei khopdunnak inn sungah a telmi hempohin Stefen a zoh haw ten a maicang cu vancungmi tei mai bangin mu haw hi.

Zur Zeit ausgewählt:

NUNGZUITU 6: NBF1

Markierung

Kopieren