NUNGZUITU 2

Hawvang Thiangtho Heng

1Pentecost ni a hen ten thu umtu hempoh cu munkhatah khawmdun haw hi.#Thiam 23:15-21; Daan 16:9-11; 2Thakhat thu in, van pen huihpi bangin thawmnging hengin, a umnak khan hawah dim khawng hi. 3Mahten lei tuah bangvemi mei alh tul zuazuakin mah khansungah a ummi hempoh cu tawngkha khawng hi. 4A venghawng haw in, Hawvang Thiangtho tuah dim haw a, Hawvangin ot theihnak a piak hangin, awn phundangin awn haw hi.

5Jerusalem khua sungah leihum mun le ngam tihkim pen a hungmi Judah mite a um laihtak haw hi a, biaknak lam hei pen a zuam theizette ngeh haw hi.#2:5 Mah hun laihin, Jerusalem khua sung ummi mihing cu thawng za khat elkim haw tuk hi. Mahnaven Pentecost hunin, mah i let nih cu hi haw tuk hi. 6Awn dang tuah a ot haw mi thawmvang a zak haw ten mi honpi heng khawm haw hi. Thu umtu tei ot cu a hungmi ten amu awn tekin, a zak haw hangin lamdangsa mahtak haw hi. 7Lamdangsa zetin le ngaihsut haksa in, “Hitih bangin a awn litute hi Galilee mite ngeh haw si i tang heng? 8Iti bang heng eimu awn tekin, a zak theih uh? 9Ohte cu Parthia ngam, Media ngam, Elam ngam, Mesopotamia ngam, Judah ngam, Kappadosia ngam, Pontas ngam, Asia ngam, 10Frizia ngam, Pamfilia ngam, Izipt ngam le Libia ngamsung a, Sairin khua el pen a hung mite ung hi. Khenkhatte cu Rom khua pen a hung mite ung hi. 11Judah mi le Gentail mi Judah biaknakah a tum mite ung hi. Khenkhatte cu Crete tui kulh le Arabia ngam pen a hung mite hi. Mahnaven Pathian i thasiahhuai nalamdang a bawlmi thu cu amu awnin, a son haw mi khi eimu awnin za ten hung hi,” tin ti haw hi. 12Thinsu le lamdangsa in, “Itih nuamnak heng?” tin pa khat le pa khat dongdun li haw hi.

13Mahnaven midang ten thu umtute cu nuihsanin, “Hi mite hi zukham misilte haw nei pah!” tin ti haw hi.

Peter i Thuhilhnak

14Mahten Peter cu a dang nungzuitu sawm le pa khatte tuah dingto haw a, aw nging zetin mipi tei lakah thuhilh hi. Ka phunpih Judah mi le Jerusalem a ummite, na venghawngin ngai unna, hi thil i sullam cu hilh tung hi. 15Na ngaihsut uh bangma hi; hi mite hi zukham haw ma hi; zinglam nazi kuah bek laih si. 16Itahim titale profet Joel i sonsa mi a kimnak tuk saw hi. Profet Joel i sonsa mi cu;

17‘Pathian in, ni dawllam ten hitih bangin bawl tung hi;

Mi hempoh tei humah

ka Hawvang leih tung.

Na canu le capa uhten

ka thu cu phuang haw tuk a,

na khangno uhten

muhnak nei haw tuk hi;

na putek le pitek uhten

mangman haw tuk hi.#Joel 2:28-32;

18Hi zuh hi, ka nadektu pano,

numei tei humah mah ni ten,

ka Hawvang leih tung a,

ka thu phuang haw tuk hi.

19Humlam vanah

thasiahhuai bawl tung a,

nuailam leihum hei ah

nalamdang bawl tung hi.

Thisan, meilek le

meikhu sah zetin

um tuk hi.

20 Topa i Ni sunglawi le

ni sunglawi a hen

deuh laihngawlin,

ni thim tuk a,

hade khi thisan bangin

san tuk hi.

21 Topa i min tuah

thungenin,

a nektu hempoh cu

humhim hi haw tuk hi,’

tin’ ti hi.

22“Ka phunpih Israel mite hi thu hi ngai un! Nazareth mi Jesuh cu mihing hi naven Pathian i thuneihnak nei hi, tih cu ama sung pen Pathian in melciknak le nalamdang a bawlmi pen langtik zo hi. Hihi cu nangmuh loli i theihmi hi, itahim titale nangmu lakah a piangmi thilte hi. 23Pathian in ama khuakhan sa bangin nangmu khut sungah Jesuh piak tuk khi a khencat sa hi. Misual tei zotsaknak hangin Jesuh cu thinglamteh humah khenin that uh ci.#Mt 27:35; Mk 15:24; Lk 23:33; Jn 19:18; 24Mahnaven Pathian in thihnak pen tholehtikin thihnak huham sung pen luattik zo hi, itahim titale amah cu thihnak i hetcih lo theih hi ma hi.#Mt 28:5-6; Mk 16:6; Lk 24:5; 25David in ama thu le la cu hi bangin hilh hi.

“Topa cu ka mai ah

mu leleng ing a;

ka elno ah um lengin

lungkham mang hi.#Saam 16:8-11;

26Mah hangin lungdamin,

ka lungmu cu

lungnopnak tuah dim hi.

Mah hangin kei hi

a thi thei mi hi naveng,

muansannak sungah

thinnop zetin cawl tung hi.

27Itahim titale mithi khua ah

zamthong tukma,

muantakmi na salpa cu

khansungah

muat thong tukin phal tukma ci.

28Nunnak mun a hennak

lampi cu lak zo in,

a umpih hangin lungdamnak

tuah dim tung hi,”

29“Ka u le naute, mi minthang a pu uh kumpi David i thu cu nangmu lakah ciang zetin hilh nuam ing. David cu thi in, vui haw hi, a khan cu tuni tian eimu lakah um hi. 30Amah cu profet hi in, Pathian i tepsa mi thu cu thei hi. David bang bokin David i casuan pa kha khat khi kumpi hi tukin Pathian in thutiam hi.#Saam 132:11; 2Sam 7:12-13; 31Pathian in mailam hun ten i bawl tuk tih cu David in mu ham zo hi; mah hangin Khrih a thawhlehnak tuk thu cu hi bangin hilh hi.

“Mithi khua ah amah cu

zamsan tukma hi,

a taksa luangpi khi khansungah

muatta thong tukma,”

ti hi.

32Pathian in Jesuh loli cu thihnak pen tholehtikin, mahmi a theihpihtu tetti cu keimuh hi ung hi. 33A pa, Pathian i taklamah sunglawi zetin hentik hi zo in, a tepsa bangin Hawvang Thiangtho cu a Pa i lak pen co zo hi. Tu a na muh uhmi le na zak uhmi cu eimu humah a leihsukmi ama laksawng hi.#Saam 110:1; 34Itahim titale vanhumah a hengtu cu David kha ma hi; David in;

“Topa in ka Topa i lakah,

na ngal na ke nuai ah,

35Na ke sihnakin a can haw tian

ka taklamah khungin,”

ti hi.

36“Israel mite aw, thinglamteh humah na thah uhmi Jesuh khi, Pathian in Topa le Khrih in bawl zo hi, tih hi ciang zetin, na zak khawng theihnak tukin kul loli,” ti hi.

37Peter i otmi a zak haw ten a lungmu haw cu thatho zetin Peter le a dang nungzuitu cu, “U le naute, i bawl kam nung?” tin dong haw hi.

38Peter in, amuh tei lakah, “Na venghawng uhin, na sualnak uhte sik unna, Jesuh Khrih minin tuiphum un hi, mahten na sualnak uh ngaithiam hi tuk uh ci a, Pathian i laksawng Hawvang Thiangtho ngah tuk uh ci. 39Itahim titale Pathian i thutepnak cu nangmuh le na cate uh le Pathian tuah a kangdun tei lak pen Pathian i sammi hempoh tuah a kaikuah dunmi,” ti hi.

40Peter in awnkam tampi tuah tettikhanin sosuah li hi. “Hi mipha ngawl tei humah a heng tukmi dantatnak pen a luat tukin zuam un,” tin hilh hi. 41Peter i hilhmi cu mi tampi ten a up hangin tuiphum haw hi; mah ni khat sungin, mipum thawng thum bang kim haw hi. 42Nungzuitu tei thuhilh cu ngai haw a, an eih khawmnak le thunget khawmnak tuah pawlkomnak nei leleng haw hi.

Thu Umtu Tei Nundan

43Nungzuitu ten nalamdang le thasiahhuai tampi bawlin mi hempoh tei thin sungah launak le maizahnak dim hi. 44Thu umtu hempoh cu pawlkomdun haw a, thulual zetin, a thil neih haw cu kawmdun haw hi.#Nung 4:32-35; 45Thil a neih haw mi le a neih le lam haw zuakin a ngah haw mi tangka cu amu kulnak bangin semdun khawm haw hi. 46Ni khat nung ni khat Biakinn sungah tawkdun khawm haw in; a inn hawah ante kawmin, niamkhiatnak le lungdam thatuino in, ei langkhat haw hi. 47Pathian thangphatin mi hempoh tei lak pen mitmai pha ngah haw hi. Mahten Topa in, a pawl sung hawah nunpatnak a cotu a dang bet tawto hi.

Zur Zeit ausgewählt:

NUNGZUITU 2: NBF1

Markierung

Kopieren