Īmbōmbo Sya Batumịgwa 8

Saulị ịkukifwima ikipānga

1Umwene Saulị jope alinkuti bājị̄le papo banngogịle. Lelo mụ̄sị gūgo, po bulinkwanda ubufwimịgwa ubukulūmba fịjo nkipānga kya mụ Jelụsalemụ. Po papo abị̄tikị bōsa balinkubalanịla mfịsu fya mụ Jụtaị na Samalịja, balinkusyala bene ba batumịgwa. 2Abāndu abatị̄la Kyala balinkunsyila Sịtefanị, balinkunndilila īfwa īngulūmba. 3Pakabalilo kāko umwene Saulị alinkugela fị̄jo ukukipyụta ikipānga, alinkwịngila nnyụ̄mba nnyụ̄mba, alinkubakwaba abị̄tikị abanyāmbala na bakị̄kulu alinkubị̄galila nnyụ̄mba ja bannyololo.

Ilịbāngilị lịkulumbililịgwa mụ Samalịja

4Abị̄tikị bala babalanị̄le, bo balinkubūka mbujo bōsa balinkulūmbilila ilịsyu. 5Lolị Fịlịpụ jo alinkusụlụka ukubūka nkāja ka Samalịja, alinkumfụmụsya Kilisịtị kumyabo. 6Ifyene ifịlūndilo fya bāndu fịlinkupilikisya nindụmbụla jimojēne isị ājobaga Fịlịpụ, fịlinkupilika nukufịbona ifị̄ka ifị āpelaga. 7Namanga bị̄ngị aba bāli niīmbepo īnyalị, balinkwaga sịkusōka bo sịkukụ̄ta fị̄jo; kangi bị̄ngị aba bakokonyēle naba bākwemaga balinkubūmbuluka ịtolo. 8Po papo lulinkujamo ulusekelo ulukulūmba nkāja mụmo.

9Lelo ālimo umụ̄ndu jumo uju āli jo Sịmonị īngamụ, uju ātalịlemo nkāja kala, jo ābōmbaga amānjele nukubaswịgisya abāndu ba mụ Samalịja, bo ịkwịjoba ukuja jo mụ̄ndu jumo unkulūmba; 10uju abāndu bōsa ịtolo abanāndi nabakulūmba bampilikaga, balinkuti: Uju jo ju maka ga Kyala aga bịkuti makulūmba. 11Bampilikisyaga fịjo, papo amasịku ga mịngị ābaswịgisyaga namānjele gāke. 12Lelo bo bammwịtị̄ke Fịlịpụ apa ālūmbililaga īndumị īnụnụ ija butwa bwa Kyala ningamụ ja Jesụ Kilisịtị, po papo balinkōsịgwa abanyāmbala na bakị̄kulu. 13Jope na Sịmonị alinkwịtika. Lelo bo ōsị̄gwe alinkummūmilila Fịlịpụ alinkuswịga bo ịkufịbona ifị̄ka nifị̄swigu ifịkulūmba ifị fyapelịgwaga.

14Lelo abatumịgwa bala bāli mụ Jelụsalemụ bo bapilị̄ke ukuti abenekāja ka Samalịja balyambilị̄le ilịsyu lya Kyala, po balinkubatumila ba Petelị na Johanị. 15Abēne bo basụlwịke, balinkubasūmila ukuti bāmbililege Mbepo Mwịkemo; 16namanga ākāli ukunsololokela umụ̄ndu najumo mmyabo, lolị bālyosị̄gwe ịtolo mụngamụ ja NTWA Jesụ. 17Abēne balinkubabīkapo amaboko, po papo balinkwambilila Mbepo Mwịkemo. 18Umwene Sịmonị bo asịbwene ukuti bịkwambilila Mbepo Mwịkemo, bo abatumịgwa bịkubīkapo amaboko, po papo alinkubatwalila īndalama ba Petelị na Johanị alinkuti: 19Nanịne mụ̄mbēge amaka gagaga, ukuti uju linga ngummbīkapo amaboko, āmbililege Mbepo Mwịkemo.

20Umwene Petelị alinkummwamụla alinkuti: Būkaga nindalama syako kubupyụtịgwa, namanga kwịnogona ukukikaba ikikūngilwa kya Kyala. 21Ukaja nakamēnya kangi ukaja nikijabo nakimo mụnōngwa jijiji, papo īndụmbụla jako jikagoloka nkyenị mwa Kyala. 22Po lelo gwịlātege kumbị̄bị syako isị, unsūmege UNTWA ukuti akuswege īnyịnogono sya mụndụmbụla jako. 23Namanga ngubwene gwị̄swile akabịnị akakāli bo īnyongo kangi ugwe ulimpịnyịgwa gwa mbị̄bị. 24Umwene Sịmonị alinkwamụla alinkuti: Amụ̄sụmilege jujumwe ku NTWA, ukuti sịngānyāgaga nasịmo isị mụjobịle.

25Abēne lolị ba Petelị na Johanị bo bālisịsịmịkị̄sye nukulijoba ilịsyu lya NTWA, po papo balinkugomoka ukubūka mụ Jelụsalemụ, balinkulūmbilila īnōngwa īnụnụ ntwaja tu twịngị twa Basamalịja.

Fịlịpụ numfụle gwa ku Ịtyopịja

26Po papo ugwandumị gwa NTWA alinkummbūla Fịlịpụ alinkuti: Sụmụka ulabilege kwịtōngo kunsebo ugu gukusụlụka ukufụma ku Jelụsalemụ, gukulabịla ku Gasa, ugwa ndungalāngala. 27Umwene alinkusụmụka alinkubūka. Po papo alinkummbona umụ̄ndu gwa mụ Ịtyopịja, umfụle, ulịfụmụ gwa Kandake umalafyale unkị̄kulu gwa mụ Ịtyopịja, uju ālindililaga ikyuma kyake kyosa, jo ālisịle mụ Jelụsalemụ nkwịpụ̄ta. 28Lilino lelo āgomokaga ukubūka kukāja, ātūgēle pị̄geletị lyake, ābalaga kalata gwa Jesaja unkụ̄ngụlụka. 29Po papo īmbepo alinkummbūla Fịlịpụ alinkuti: Būkaga segelela, ulongosanị̄ege niịgeletị ilyo. 30Po papo Fịlịpụ alinkubopa, alinkupilika bo ịkubala kalata gwa Jesaja unkụ̄ngụlụka, alinkunndālūsya alinkuti: Kali kusyaganịa isị kubala? 31Umwene umụ̄ndu jula alinkwamụla alinkuti: Po nạ̄ti nsyaganịe bulebule bo najumo akāndīngānịa? Po papo alinkusụmụka Fịlịpụ ukuti akwele mwịgeletị, atūgasanịe nagwe. 32Lolị īnōngwa jījo ābalaga pakalata jali jo iji:

Alōngosịgwe ukubūka pabubōlelo bo ji ng'ōsị,

bo akang'ōsị aka kịkumyeka ịtolo bo kali

pakusēnyịgwa ulusyoja,

bunobuno jope alinkusịta nukujobapo ilịsyu nalịmo.

33Ndwịjị̄syo lwake, ubulōngị bwake ubugolofụ

bulinkukānịgwa,

jwanị ịsakupāngaga isya lujụ̄ngụ lwake?

Namanga ubūmị bwake busōsị̄gwemo nkị̄su.

34Po papo umfụle jula alinkummbūla Fịlịpụ alinkuti: Nịkukusūma ūmbūle kali unkụ̄ngụlụka ịkummbala jwanị papapa? Ịkwịbala jūjo pamo ịkummbala jumo ujūngi? 35Po papo Fịlịpụ alinkwamụla, alinkwandila pabusị̄mbe bububu ukumfụmụkisya īnōngwa īnụnụ sya Jesụ. 36Lelo bo bịkwenda mụnsebo, balinkufịka apa gālipo amīsi. Po papo umfụle alinkummbūla Fịlịpụ alinkuti: Kēta, amīsi aga, fịkị fịkūnganịsya une ukōsịgwa? [ 37Po papo Fịlịpụ alinkummbūla alinkuti: Linga gwịtị̄ke nindụmbụla jako jōsa, po sịbagị̄le. Umwene alinkwamụla alinkuti: Ngwịtika ukuti Jesụ Kilisịtị jo mwana gwa Kyala.] 38Po papo alinkulagila ukuti ilị̄geletị lyimege. Bo babīli, Fịlịpụ numfụle balinkusụlụka mmīsi, po papo alinkummōsya. 39Lelo bobịkufyuka ukufụma mmīsi, Mbepo gwa NTWA alinkunnyaka Fịlịpụ, umwene umfụle alinkusịta nukummbona kangi, lolị alinkwenda ịtolo injila jake nulusekelo. 40Lolị fịlịpụ alinkwaga ali mwa Asotasị, lelo bo ịkukīnda, alinkulūmbilila īnōngwa īnụnụ ntwaja tōsa ukwakufịka mụ Kesalịja.

Zur Zeit ausgewählt:

Īmbōmbo Sya Batumịgwa 8: NYB96

Markierung

Kopieren