Matay 3
3
No kapangnanao na no nimanaktak a si Yowani
(Make 1:1-8; Locya 3:1-18; Yowani 1:19-28)
1No kano nang am nimangay o nimanaktak a si Yowani do kabwan no nihakawan no tao do Yotay a mangnanao. 2Maniring am, “Mamlis kamo na, ta yarana makeykai o na katalamozong ninyo ni Ama ta do to.” 3O mina ciring no panoyonoywan na so ciring ni Ama ta do to a meyngaran so Isayya am si Yowani o peycirngan na sya. Ta maniring am,
“Amyan so tao a amlololos do kabwan no nihakawan no tao a manci no, ‘Inyo rana am wadwaden nyo o rarahan no Panirsirngen ta. So katazineng na rana no pangonongan na.’ ”#3:3 Isayya 40:3.
4O ayob na ni Yowani am niparing a bobow no baka. O abtek na am kolit no baka. O kanen na am zozon a kano maganinem a amyan do vahay no tapipi. 5Nimai pa sira o tao a apo do Yelosaleng a kado peycyeylilyan na do Yotay a kano macisngen so ili do ayo a meyngaran so Yotan a malovot do tangain na. 6Ipanci da o raraten da. Am ori o nitaktakan na jira ni Yowani do meyngaran so Yotan a ayo.
7Macita ni Yowani o aro a tao a macyagom do Vadisay a kano macyagom do Satokay a mai a manci ni Yowani a tomaktak jira am pamizngen na sira. Maniring jira am, “Inyo a yakmey mavowaw, sino ipanci jinyo o yanyo katayo no oyaoya na ninyo ni Ama ta do to. 8Ta si mamlis kamo na so icicirawat am ori o ikanoyong nyo rana yana nikomaro do peyraratenan nyo. 9Ji nyo mancyan o kapakaliklik nyo so peyoyaoyyan na ni Ama ta do to, do nyo kapeyineynapo si Apolahan. To ko na macitangayan jinyo am makamaog si Ama ta do to do vato ito so sivosivovoong na ni Apolahan. 10Yana mazomtad o zaig do atngeh no kayo. O ji malasi a kayo am miminen na atbahen a kapasleb na sya do apoy.#3:10 Pazimanen na do oyaoya na ni Ama ta do to so ji mamlis. 11Ko taktakan inyo no ranom do nyo na kapamlis. Am o manownowji pa ka nyaken a yamai am taktakan na inyo no Seyzi a kano apoy. So ikaizaizay na pa ka nyaken. So ji ko macingai jya. 12Yamyan do lima na so ipaninigi. So cigyan na so kadai a kapangay na so pipya kadai do peyvokavokan, kasleb na so ata na do jyahesep a lila no apoy.”
No kataktak ji Yeso
(Make 1:9-11; Locya 3:21-22)
13No kanang am nimapo si Yeso do Cyadidi a kapeypangay na do Yotan a ayo a mangay ji Yowani a manci nya tomaktak jya. 14Am naknakmen ni Yowani o kazazat na do nakenakem ni Yeso. Maniring ji Yeso am, “Beken a yaken o taktakan mo a. Ikongo mo yai jyaken.” 15Maniring si Yeso jya am, “To ta macyozai o akman sya vazay an. Ta o ikakman na sya am ahapen ta o vazay ni Ama ta do to.” Makarahan am to na rana amya ni Yowani a taktakan si Yeso. 16Meypapowpow si Yeso apo do ranom am todacyangi o hanit. So nipakacita na so Seyzi na ni Ama ta do to a akmey hato a meyhekas a someyked do kataotao na. 17Meyratateng am amyan so ciring a apo do teyngato. Maniring am, “Iya rana ya am Anak ko a ko tey kaglaw. So yako sarayan nya.”
Zur Zeit ausgewählt:
Matay 3: snt
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
The Bible Society in Taiwan
