Juan 8
8
Uj warmita khuchichakushajta jap'inku
1Jesusqa Olivos sutiyoj orqoman rerqa. 2Q'ayantin sut'iyaytataj Temploj pationman Jesús kutirejtin, may chhika runa chayman tantakorqanku. Jesustaj tiyarikuspa, paykunaman yachacherqa.
3Jinallapi Diospa kamachisqanmanta yachachejkuna, fariseokuna ima khuchichakushajta taripasqa warmita payman pusamorqanku. Chawpinkupi sayaykuchispataj, Jesusta nerqanku: 4Yachachej Wiraqochi, kay warmita khuchichakushajta jap'iyku. 5Moisespa kamachisqanpi nin kay jina warmita rumiwan ch'anqaykuspa wañuchinaykuta.#Lv 20.10; Dt 22.22-24. Qanrí, chaymanta imá ninkitaj? nispa.
6Chayta nerqanku, imatachus Jesús kutichinanta yachayta munaspa, chayman jina payta ch'ataykunankupaj. Jesustajrí k'umuykuspa, ruk'ananwan pampapi qhelqayta qallarerqa. 7Anchatapuni payta tapojtinkutaj, sayarispa, paykunata nerqa: Mayqenchá qankunamanta mana juchayoj kankichej, chay ñawpajta kay warmita rumiwan ch'anqaykuchun, nispa.#Dt 17.7. 8Chayta niytawantaj, watejmanta k'umuykuspa, pampapi qhelqallarqapuni.
9Chay warmita pusamojkunarí chayta uyariytawan, machu runakunamanta qallarispa, ujmanta uj riraporqanku. Jinataj Jesuslla qhepakorqa, warmitaj ñawpaqenpi sayasharqa. 10Chantá Jesús sayarispa, warmita nerqa: Maytaj chay ch'ataykusojkunari? Manachu mayqenpis juchachasunku? nispa.
11Warmitaj nerqa: Mana pipis, wiraqochíy, nispa.
Jesustaj payta nerqa: Noqapis manallataj juchachaykichu. Kunanqa ripuy, amañataj ajinata juchallispa puriyñachu, nispa.#Jn 3.17; 12.47.
Jesusqa runakunapaj k'anchay
12Jesús uj kutitawan parlallarqataj: Noqa tukuy runapaj k'anchay jina kani. Pillapis noqawan purejqa mana laqhapichu purenqa, aswanpis wiñay kawsayman pusaj k'anchaypi purenqa, nispa.
13Chantá fariseokuna Jesusta nerqanku: Qanllamanta willakusqaykirayku nisqaykeqa mana jap'ikunapaj jinachu, nispa.
14Jesustajrí paykunata kuticherqa: Noqa kikiymanta willasqayqa cheqapuni, imaraykuchus noqaqa maymantachus jamusqayta yachani, maymantajchus rishasqaytapis. Qankunarí mana chayta yachankichejchu. 15Qankunaqa runaj yuyasqanman jinalla noqata juzgashawankichej. Noqatajrí mana pitapis juzganichu. 16Chaywanpis sichus noqa juzgayman chayqa, maychus kajtapuni juzgayman, imaraykuchus mana sapallaychu juzgani. Aswanpis kachamuwaj Tataywan khuska juzgani. 17Kamachisqa qhelqaykichejman jinaqa, iskay runachus kikillantapuni parlanku chayqa, nisqankoqa cheqamin, icharí? 18Jina kajtenqa, noqa kikiymin noqamanta willaj kani, kachamuwaj Tataypis noqallamantataj willan, nispa.
19Chantá Jesusta taporqanku: Tatayki maypitaj kashanri? nispa. Jesustaj kuticherqa: Qankunaqa mana noqata rejsiwankichejchu, nitaj Tataytapis. Sichus noqata rejsiwankichejman chayqa, Tataytapis rejsillawajchejtaj, nispa.#Jn 14.7; 16.3.
20Jesús chayta nerqa Temploj pationpi ofrendata churana cheqanejpi yachachishaspa. Chaywanpis mana pipis payta jap'icherqachu, imaraykuchus pichus pay kasqanta rejsichikunan p'unchay manaraj chayamusqachu.
Jesús paypi mana atinikojkunata k'amin
21Jesús uj kutitawan nillarqataj: Noqa ripusaj, qankunataj mask'awankichej. Chaywanpis juchaykichej patapi wañunkichej. Chayrayku maymanchus rishani, chayman qankuna mana riyta atinkichejchu, nispa.
22Judiokunaj kurajninkukunataj tapunakorqanku: Pay kikinchu wañuchikonqa? Chayraykuchu nishawanchej: Maymanchus rishani, chayman qankuna mana riyta atiwajchejchu, nispa?
23Jesusrí paykunata nerqa: Qankunaqa kaymanta kankichej, noqatajrí patamanta kani. Qankunaqa kay pachamanta kankichej, noqarí mana kay pachamantachu kani.#Jn 3.31; 17.14. 24Chayrayku nerqaykichej juchaykichej patapi wañunaykichejta. Noqa pichus kasqayta willarqaykichej. Willasqayta manachus jap'ikunkichej chayrí, juchaykichej patapi wañunkichej, nispa.
25Chaypacha paykuna taporqanku: Pipunitaj qan kankiri? nispa. Jesustaj kuticherqa: Pichus kasqayta qallariymantapachaña willarqaykichej. 26Qankunamanta ashkhata parlanay kashan, jinataj juzganay. Chaywanpis noqata Kachamuwajqa cheqanta parlan, noqataj paymanta uyarisqallayta runakunaman willani, nispa.
27Chayta uyarejkuna mana entiendeyta aterqankuchu Jesusqa Tata Diosmanta parlashasqanta. 28Chayrayku Jesús paykunata nerqa: Maypachachus Runaj Churinta cruzman chakataspa sayarichinkichej, chaypacha noqa pichus kasqayta yachankichej. Yachallankichejtaj mana imatapis sapallaymanta ruwasqayta. Jinallatataj yachankichej Tata Diospa yachachisqallanta parlasqayta. 29Kachamuwaj Tatayqa noqawan kashan, paytaj mana sapayta saqerpariwanchu, imaraykuchus paypa munasqanta ruwani, nispa.
30Jesús chay tukuyta nisqantawan, ashkha runakuna paypi atinikorqanku.
Cheqa kajmanta yachayqa kacharichiwanchej
31Chantá Jesús paypi atinikoj runakunata nerqa: Nisqaytachus kasunkichej chayqa, cheqapuni yachachisqaykuna kankichej. 32Jinataj Diosmanta cheqa kajta yachasqaykichejqa cheqatapuni kacharichisonqachej, nispa.#8.32 Cheqa kajmanta yachayqa Diospa munakuynin imaynachus kasqanta yachana. Chay munakuymanta Jesús sut'incharqa runata qhespichinanpaj juchaj wata runa kayninmanta kacharichispa Jn 1.14,17; 3.21; 4.23-24; 17.17,19.
33Chay runakunataj kuticherqanku: Noqaykoqa Abrahampa mirayninmanta kayku, manataj jayk'ajpis pejpa wata runanchu karqayku. Imaraykutaj nishanki kacharichisqa kanaykutari? nispa.
34Jesustaj paykunata nerqa: Kayta sut'ita niykichej: Pichus juchallikojqa juchaj wata runanmin.#Ro 6.16; 2 P 2.19. 35Wata runaqa patronpa wasinpi mana wiñaypajchu qhepakonqa. Wasiyojpa churinrí wiñaypaj chay ayllumanta kanqa. 36Chayrayku Churichus juchaykichejmanta kacharichisonqachej chayqa, cheqapuni kacharichisqa kankichej.#Ro 6.16-18; Gl 5.1,13. 37Noqa yachani Abrahampa mirayninmanta kasqaykichejta. Chaywanpis qankuna wañuchiwayta munashankichej, nisqayta mana jap'ikusqaykichejrayku. 38Noqaqa Tata Diosniywan kashaspa imatachus rikusqayta willaykichej. Qankunatajrí imatachus tataykichej yachachisorqachej, chayta ruwashankichej, nispa.
39Chantá paykuna kuticherqanku: Noqaykoj tataykoqa Abrahammin, nispa.
Jesustajrí paykunata nerqa: Abrahampa wawankunapunichus kawajchej chayqa, paypa ruwasqanta ruwawajchej. 40Chaywanpis noqarí Diosmanta uyarisqay cheqa kajta qankunaman willajtiypis, qankuna chay cheqa kajta nisqayrayku wañuchiyta munawankichej. Abraham mana jayk'ajpis ajinata ruwarqachu. 41Qankunarí tataykichej jinallataj ruwashankichej, nispa.
Paykunataj nerqanku: Mana noqaykoqa k'ipa wawachu kayku. Uj Tatayojlla kayku, chaytaj Diosmin, nispa.
42Chantá Jesús nerqa: Cheqapunichus Tata Diosniykichej kanman chayqa, noqata munakuwankichejman, imaraykuchus noqaqa Diosmanta jamuni, manataj noqallamantachu, manachayqa Dios kachamuwarqa. 43Imaraykutaj parlasqayta umaykichejpi mana jap'iyta atinkichejchuri? Imaraykuchus parlasqaytaqa ni uyariyllatapis munankichejchu. 44Qankunaj tataykichejqa Kuraj Supaymin, qankunataj paypa munasqallanta ruwayta munankichej. Payqa qallariymantapacha runa wañuchipuni, cheqa kajtataj mana uyariyta munanchu. Cheqa kajqa manallataj sonqonpi kanchu. Llullakuspaqa, llulla kasqanman jinapuni parlan, imaraykuchus payqa llulla, llullakuyta rikhurichejtaj. 45Chayrayku noqa cheqata parlashajtiypis, mana noqapi atinikuyta munankichejchu. 46Mayqenniykichejtaj juchayoj kasqayta sut'inchawankichejmanri? Ni pi. Jina kajtin, cheqatachus parlani chayqa, imaraykutaj nisqayta mana jap'ikunkichejchuri? 47Diospata kajkunaqa paypa nisqanta tukuy sonqo uyarinku. Qankunatajrí mana uyariyta munankichejchu, imaraykuchus mana Diospa wawanchu kankichej, nispa.
Cristo wiñaymantapacha kasqantapuni nin
48Chaymanta chay judiokuna kuticherqanku: Noqaykoqa cheqanta niyku, qanqa Samariamanta, supayniyojtaj kasqaykita, nispa.
49Jesustajrí kuticherqa: Mana supayniyojchu kani, aswanpis Tatayta jatunchani. Qankunatajrí pisipaj qhawawankichej. 50Mana noqaqa jatunchasqa kaytachu mask'akushani. Wajmari jatunchasqa kanayta mask'ashan, paytaj juzganqa. 51Sut'ita niykichej: Pillapis nisqayta kasojqa mana jayk'ajpis wañonqachu, nispa.
52Chantá chay judiokuna Jesusta nerqanku: Kunan sut'ita yachayku supayniyojpuni kasqaykita. Abraham wañorqa, jinallataj Diosmanta ñawpa sut'inchajkunapis, qantaj nishanki: Nisqayta kasojqa mana jayk'ajpis wañonqachu, nispa. 53Yuyankichu ñawpa tatayku Abrahammanta aswan kuraj kasqaykita? Pay wañorqa, Diosmanta sut'inchajkunapis wañullarqankutaj. Pi kasqaykitataj qan yuyakunkiri? nispa.
54Chantá Jesús nerqa: Noqachus jatunchakuyman chayqa, jatunchakusqay qhasilla kanman. Tatayqa, pitachus ninkichej Diosniykichej kasqanta, paymin noqata jatunchawan. 55Qankuna mana payta rejsinkichejchu, noqatajrí payta rejsini. Noqachus niyman: Mana rejsinichu, nispa chayqa, qankuna jina llulla kayman. Noqarí payta rejsini, nisqantataj junt'ani. 56Ñawpa tataykichej Abrahamtaj noqa jamunaymanta yachaspa, kusikorqa. Ajinata payqa chay p'unchayta ñawinwanpis rikushanman jina manchayta kusikorqa, nispa.
57Judiokunataj Jesusta nerqanku: Manaraj phishqa chunka watayojpischu kashanki, chaychu Abrahamta rejsiwaj karqa? nispa.
58Jesustaj paykunata nerqa: Kayta sut'ita niykichej: Manaraj Abraham kashajtin, NOQA KANI, nispa.
59Chaymanta judiokunaqa Jesusta ch'anqaykunankupaj rumita oqharikorqanku. Paytajrí paykunaj chawpinkuta rispa, Temploj pationmanta llojsiporqa.
Zur Zeit ausgewählt:
Juan 8: DQDC
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Revisión Biblia Quechua Boliviano © Sociedad Bíblica Boliviana, 2017.
