Juan 3

Nicodemo Jesuswan parlarikun

1Fariseokunamanta ujnin Nicodemo sutiyoj karqa. Payqa judiokuna ukhupi manchay uyarisqa karqa. 2Uj ch'isi Jesusta watukoj rispa, pay nerqa: Yachachej Wiraqochi, yachachinawaykupaj Diospa kachamusqan kasqaykita yachayku. Mana pipis, imatachus qan ruwanki, chay jina runaj mana jayk'aj rikusqan t'ukunata ruwayta atinmanchu, Dios mana paywan kajtenqa, nispa.

3Jesustajrí kutichispa, nerqa: Kayta sut'ita niyki: Sichus pipis watej mana paqarinmanchu chayqa, Diospa kamachiyninta ni rikullanqapischu, nispa.

4Nicodemotajrí payta nerqa: Imaynatataj pipis machu runaña kashaspa watej paqarinmanri? Watej paqarinanpaj, ujtawanchu mamanpa wijsanman kutiykunman? nispa.

5Chantá Jesús kuticherqa: Sut'ita niyki: Sichus pipis yakumanta, chantá Espiritumanta ima mana paqarin chayqa, Diospa kamachiyninman mana yaykuyta atenqachu.#Mt 28.19; Hch 2.38; 10.47; 1 Co 12.13; Tit 3.5. 6Runamanta paqarejqa runalla. Pillapis Diospa wawan kananpajrí Santo Espiritumin payman kawsayta qonan tiyan. 7Ama t'ukuychu: Watej paqarinayki tiyan, nispa nisusqaymanta. 8Wayraqa maymantachus munasqanmanta wayramun, sonasqantataj uyarinki, manataj yachankichu maymantachus jamusqanta, nillataj maymanchus risqantapis. Santo Espiritumanta kawsayta tukuy jap'ejkunapis ajinallataj kanku, nispa.

9Chantá Nicodemo taporqa: Imaynataj chay kanmanri? nispa.

10Jesustaj nerqa: Qan Israelpi manchay uyarisqa yachachej kashaspa, manachu chayta yachanki? 11Sut'ita niyki: Noqaykoqa yachasqaykuta parlayku, rikusqaykutataj willayku. Qankunatajrí willasqaykuta mana jap'ikunkichejchu. 12Sichus kay pachapi imachus kajmanta parlajtiy, nisqayta mana jap'ikunkichejchu chayqa, imaynatataj janaj pachapi kajmanta willajtiy, nisqayta jap'ikuwajchejri?#Sab 9.16; Jn 8.47; 1 Co 2.14-16.

13Mana pipis janaj pachaman rerqachu, manachayqa Runaj Churillan janaj pachamanta urayk'amorqa.#Jn 1.18; 6.46; Ef 4.9; Pr 30.4. 14Imaynatachus ch'innejpi Moisés broncemanta katarita k'aspiman warkhuspa pataman oqharerqa, ajinallatataj Runaj Churinpis pataman oqharisqa kanqa. 15Ajinamanta paypi tukuy atinikojkuna wiñay kawsayniyoj kanqanku.

Diosqa tukuy runata munakun

16Dios chay jinatapuni kay pachapi kaj chhikata munakusqanrayku uj k'ata Churinta qorqa. Ajinamanta tukuy pichus paypi atinikojqa mana chinkanqachu, aswanpis wiñay kawsayniyoj kanqa. 17Diosqa mana runakunata juchachananpajchu Churinta kay pachaman kachamorqa, manachayqa paynejta paykunata qhespichinanpaj.

18Pillapis paypi atinikojqa mana juchachasqachu kanqa. Paypi mana atinikojrí ñapis juchachasqaña, Diospa k'ata Churinpi mana atinikusqanrayku.#Jn 5.24; Mc 16.16. 19Chantá kayraykumin runakuna juchachasqa kanqanku: Diospa k'anchaynin kay pachaman jamorqa.#Jn 1.5,9; 12.46. Runakunatajrí laqhata k'anchaymanta nisqa astawan munakorqanku, imajtinchus paykuna millayta ruwaspa purerqanku.#Jn 1.9; 12.46-48. 20Millayta ruwaspa purejkunaqa k'anchayta chejninku, manataj k'anchayman qayllamunkuchu, millay ruwasqanku ama sut'inchasqa kananpaj.#Job 24.13-17. 21Cheqan kajta ruwaspa purejkunarí k'anchayman qayllamunku, ruwasqanku Diospa munasqanman jina kasqanta wajkuna yachanankupaj, nispa.#Ef 5.8-14.

Bautizaj Juanqa Jesusmanta ujtawan parlan

22Chantá Jesús, yachachisqankunawan ima Judea jap'iyman rerqanku. Chaypi paykunawan qhepakuspataj, Jesús runakunata bautizasharqa. 23Juanpis Enonpi, chantá Salín qayllapi ima runakunata bautizashallarqataj, imaraykuchus chaynejpi ashkha yaku karqa. Runakunataj bautizachikunankupaj payman risharqanku. 24Chay karqa manaraj Juan carcelman wisq'asqa kashajtin.

25Chantá Juanpa yachachisqankuna Diospa ñawpaqenpi llimphupaj qhawasqa kanapaj mayllakunamanta uj judiowan churanakorqanku. 26Juanman rispataj, yachachisqankuna nerqanku: Yachachej Wiraqochi, Jordán mayu chimpapi pichus qanwan kasharqa, pimantatajchus willarqanki, chay runa bautizashan, tukuytaj payman k'askapushanku, nispa.

27Chantá Juan kuticherqa: Runaqa mana imatapis jap'iyta atinmanchu, manachus Dios qonman chayqa. 28Qankuna kay nisqayta yachankichejña: Mana noqachu Cristo kani, manachayqa paypa ñawpaqenta kachamusqa kani, tukuy imata wakichinaypaj, nispa. 29Noqaqa casarakoj qharejpa kawsaqen jina kani. Casarakupi noviayojqa qharilla jinataj casarakoj qharej kawsaqen paypa parlasqanta uyarispa, paywan khuska kusikun. Ajinata noqapis Jesuspa ruwasqanmanta kusikushani. 30Payqa astawan, astawan kurajpaj qhawasqa kanan tiyan, noqatajrí pisillapajña qhawasqa, nispa.

Janaj pachamanta jamoj

31Janaj pachamanta jamojqa tukuymanta aswan kuraj. Noqanchejrí kay pachamanta kaspa, kay pachapi imachus kajllamanta parlanchej. Janaj pachamanta jamojrí tukuymanta aswan kurajmin. 32Payqa imatachus janaj pachapi uyarisqanta, chantá rikusqanta ima parlan. Chaywanpis pisilla imatachus nisqanta jap'ikunku. 33Tukuy pichus sut'inchasqanta jap'ikojqa sut'ita nin Dios cheqatapuni parlasqanta. 34Diospa kachamusqanqa Diospa simi nisqanmanta parlan, imajtinchus Diosqa Santo Espiritunta mana mich'akuspa payman qon. 35Diostaj Churinta munakuspa, tukuy imata makinman churan.#Mt 11.27; Lc 10.22. 36Pichus Diospa Churinpi atinikojqa wiñay kawsayniyoj. Churipi mana atinikuyta#3.36 Mana atinikuyta munay: Niyta munan mana kasuy, oqharikuy, sayaykuy ima. munajrí mana wiñay kawsayman yaykonqachu, aswanpis Diospa phiñakuynin paypa patanpi kashan.

Zur Zeit ausgewählt:

Juan 3: DQDC

Markierung

Kopieren