Yohanes 3

I Yesus ante i Nikodemus

1Naria saito toFarisi nosanga i Nikodemus. Ia pakeni agama ntoYahudi. 2Ia nakava nte i Yesus tempo nabongi bo nanguli, “Guru, nisani kami Komiu tu nisuro nu Alatala mompatuduki kami. Sabana, ledo ria saitoa tona mompakule movia kabaraka mpo anu nipoviaMiu tutu ane Alatala ledo nosanggani nte ia.”

3Nesana i Yesus, “Pariaramo tesaKu hitu, ledo ria saitoa tona mamala majadi todea riara Poparenta nu Alatala ane ia ledo rapoanaka mpanjili.”#3:3 rapoanaka mpanjili. Basa Yunani: rapoanaka lako ri bavona. Batuana, nanggava katuvu nabaru lako nte Alatala ri suruga. Peinta muni ayat 7.

4Nekutana i Nikodemus nte Ia, “Mamala tona natuamo rapoanaka mpanjili? Mamala ia mesua vai riara ntai ntinana bo rapoanaka mpanjili?”

5Nesana i Yesus, “Pariaramo tesaKu hitu; ane tona ledo rapoanaka ante uve#3:5 rapoanaka ante uve: nadea tafsiran. Sanu nanguli batuana porapa haitu pombadiu i Yohanes atau pombadiu ntoKristen. Sanu nanguli batuana pompoanaka biasa, haitumo uve nesuvu tempo noana. Sanu nanguli batuana uve haitu, Nosa Gasa. bo ante kuasa Nosa Gasa nu Alatala, tona haitu ledo mamala majadi todea riara Poparenta nu Alatala. 6Karota najadi lako ri manusia, tapi katuvu nabaru najadi lako ri kuasa Nosa Gasa nu Alatala. 7Jadi nee mahera ane Kuuli ka komiu, komiu kana rapoanaka mpanjili. 8Poiri neburu hau ri umba nipodotana. Kita nangepe vuuna tapi ledo nisanita lako ri umba kakavana bo hau ri umba rakalauna. Ivesia muni kuasa Nosa Gasa nu Alatala nompoanaka tona mpanjili.”

9Bo nekutana vaimo i Nikodemus, “Berimba sampe haitu mamala majadi?”

10Nesana i Yesus, “Iko tu guru ntoYahudi anu nibila. Berimba bo ledo nisanimu? 11Pariaramo tesaKu hitu. Kami hii notesa anu nisani kami, bo kami nanguli anu nikita kami mboto, tapi komiu pura-pura ledo nadota momparasaya tesa kami. 12NitesaKu anu najadi ri dunia hitu, ledo niparasayamiu. Berimbamo raparasayamiu ane Kutesa ka komiu anu najadi ri suruga? 13Dopa ria saitoa tona neore hau ri suruga nanggita anu najadi hamai. Aga Yaku, Ana nu Manusia anu nanau lako ri suruga tumai ri dunia nanggitana. 14Nabi Musa nggaulu novia sanggayu ule tambaga ri karava bai bo nianggatakana pakalanga ri tinja sambesa ala isema-sema mantingoa ule haitu ledo mamate. Yaku, Ana nu Manusia kana raanggataka pakalanga,#3:14 raanggataka pakalanga: Patuju tesa hitu, i Yesus kana raanggataka ri kayu salib bo raore hau ri suruga naliu natuvu mpanjili lako ri kamateNa. Peinta Yohanes 12:32-33. nasimbayu mpo ule haitu, 15ala isema-sema momparasaya Yaku, manggava katuvua mabelo sampe ri kasae-saena. 16Apa Alatala mpuu-mpuu nompotove manusia sampe nidekeiNa AnaNa saito-itoNa, ala isema-sema momparasaya AnaNa ledo rapopogaa lako nte Alatala tapi manggava katuvua mabelo sampe ri kasae-saena. 17Apa patuju nu Alatala nombatudu AnaNa makava ri dunia hitu, ledo ala mombahuku manusia tapi ala ira rapakasalamaNa.

18Isema-sema nomparasaya Ana nu Alatala haitu ledo rahuku. Tapi isema-sema ledo nomparasaya, nihuku nu Alatalamo sabana ledo niparasayara Ana nu Alatala saito-itoNa haitu. 19Ana nu Alatala nakava ri dunia eva reme nombavanta kalandana, tapi ira nihuku sabana nipokonorapa kalandana pade karemena apa pokainggura nadaa. 20Isema-sema novia nadaa ledo ntoto nipokonora reme. Ira ledo ntoto madota manggaparai reme haitu ala pokainggura nadaa haitu ledo rakita. 21Tapi isema-sema nangoseaka Alatala anu nakana, ia manggaparai reme haitu ala pokaingguna malanto rakita nangoseaka dota nu Alatala.”

I Yesus ante i Yohanes Topediu

22Naupu haitu nalaimo i Yesus ante anaguruNa hau ri bagia Yudea. Hamai Ia nonturo bara sakuya kasaena ante ira bo nombadiu tona, tandana ira najadi topangoseaka Ia.

23-24Tempo haitu i Yohanes Topediu dopa nisuaraka riara ntarunggu. Ia nombadiu tona ri ngata Ainon napara ngata Salim, sabana ri sia nadea uve. Bo ledo naupu-upu tona nakava nekidiu nte ia.

25Ri sia ana-anaguru i Yohanes nosinjanai nte saito toYahudi. Ira nosinjanaika ada-ada pompakagasa karo anu nituntuni ntoYahudi. 26Pade ana-anaguruna haitu hau nte i Yohanes bo nanguli, “Guru, da nitoramiu tona nosanggani ante komiu ri sambote Binangga Yordan, anu nituduakamiu ka kami bara ipia? Hitupa Ia muni nombadiu tona, bo nadea mpuu tona hau nte Ia.”

27Nesana i Yohanes, “Ledo makuya. Ledo ria saitoa manggava nuapa-nuapa ane ledo radekei nu Alatala ka ia. 28Niepemiu mbotomo tesaku bara ipia. Niuliku yaku ledo Magau Topepakasalama anu nijanji nu Alatala. Yaku aga tona nisuro mokolu ka Magau haitu. 29-30Ia kana mantambai rabila tapi yaku domo. Rapana ri posusa ponika, boti langgai nibila apa iamo mompoberei boti mombine. Tapi ane vega nu boti langgai anu nombaurusi poboti, ia aga neangga ri sinjori boti langgai, bo nadamba mpuumo rarana nangepe suara nu boti langgai nadamba haitu. Yaku nasimbayu ante topourusi poboti haitu. Nadamba mpuumo raraku apa nadea tona nangoseaka i Yesus.

31I Yesus anu nanau lako ri suruga naogepa pade pura-pura manusia. Manusia biasa lako ri dunia hitu, aga nombatesa anu najadi ri dunia hitu. Tapi Ia anu nanau lako ri suruga naogepa pade pura-pura manusia. 32Ia notesaki anu nikitaNa bo niepeNa, tapi ledo nadea tona nomparasaya tesaNa haitu. 33Tapi isema-sema nomparasaya tesaNa haitu, raulina Alatala mpuu-mpuu nakana. 34Tona nisuro nu Alatala, Iamo nompapola tesa nu Alatala, sabana Alatala nombadekei Nosa GasaNa ka Ia, ledo ria pantaaNa. 35Tuamata Alatala nompotove AnaNa, bo nidekeiNa Ia mombakuasai pura-pura. 36Isema-sema momparasaya AnaNa, manggava katuvua mabelo sampe ri kasae-saena. Tapi isema-sema ledo nekou nte AnaNa ledo manggava katuvua mabelo haitu. Ia aga rapambela rau rara nu Alatala sampe ri kasae-saena.”

Zur Zeit ausgewählt:

Yohanes 3: TLEDOV

Markierung

Kopieren