Genesis 11

Ne Kaʼnikáh꞉tote Ne Babel

1Ó꞉nen kíʼ ohontsakwé꞉kon énskaʼk khók tsi niionhronhkhaʼtsheró꞉ten tánon ne shaʼkawén꞉naʼs í꞉ken. 2Tsi tontahonná꞉tahkwe ne tsitʼkarahkwínekenʼs nokwá꞉ti nontahón꞉ne, iahón꞉newe iohontsakwèn꞉rare ne Shinar nón꞉we tánon tho nón꞉we nahontená꞉taien. 3Tánon waʼthontathroriánion, “Ánion! Teiotekeronténion tewatenenionniánion, tánon kwáh í꞉ken tsi tewaʼtaríhaʼt.” Tánon kíʼ wahotineniaientá꞉seron ne teiotekeronténionʼs ne tonsaionaktáhkwen noneniaʼshón꞉ahs, tánon iohnehtókhá꞉hon wáhonsteʼ tsi ní꞉ioht ne ionawaʼtakarí꞉io tsi wahontenawaʼtstónniaʼteʼ. 4Eʼthó꞉ne wahonní꞉ron, “Ánion kiʼ ó꞉nen kanatowá꞉nen tewatenatón꞉ni, ó꞉ni noʼnikáhtha, ne ne iaón꞉we tsitʼkaronhiá꞉te, ne ne aetewahsennowanénhake ó꞉ni ne ne tóhsa ohontsakwé꞉kon taetewaré꞉ni.”

5Eʼthó꞉ne ne Roiá꞉ner wahén꞉ron tahátsnenhte tahatkenʼsé꞉ra ne kanatowá꞉nen tánon ó꞉ni ne ronateʼnikahtíson, ne ronón꞉kwe rotíhson. 6Ók ne Roiá꞉ner wahén꞉ron, “Sewatkáhtho, tsonkwé꞉taʼk ié꞉ken, tánon ratikwé꞉kon sewahronkhátsheraʼk khók tsi ní꞉ioht tsi rontá꞉tis; tánon ne khók kí꞉ken ne tiotierenhtáhkwen ne tsík tshiahatiieránion; iáh thahó꞉ten tsi nenhonhská꞉neke ne iáh thahotirihwanó꞉ronʼse! 7Káts, Ánion ietewátsnent, tánon tetewaniʼtónniaʼt ne raonaronhkhátsheras ne nón꞉we, ne ne tóhsa taonsahotiʼnikonhraién꞉taʼne tsi nihonronhkhaʼtsheró꞉ten.” 8Sók kiʼ ne Roiá꞉ner ohontsakwé꞉kon watehshakoré꞉niaʼte, tánon ká꞉ti wahón꞉tkaʼwe tsi ronatenatonnihátie. 9Ne aorí꞉wa Babel konwanaʼtónhkhwa, ne tsi tho nón꞉we ne Roiá꞉ner waʼteshakoniʼtonniá꞉ten naronhkhátsheraʼs nonhontsakwé꞉kon; tánon tho nón꞉we ne Roiá꞉ner ohontsaʼkwé꞉kon waʼtehshakoré꞉niaʼte nonhkweshón꞉aʼs.

10Ne kí꞉ken tsi niehotwatsirí꞉non ne Shem. Nó꞉nen ne Shem énska tewenʼniáwe shaʼtehaohseriiá꞉kon, wahonekenhteronʼtseraièn꞉taʼne, né꞉ne Arpachshad ronwá꞉iats, ne꞉ne teiohserá꞉ke sitiotohétston ne iawehnó꞉tonkwe; 11tánon ne Shem wísk-tewenʼniáwe nihiosehrá꞉ke sróhnhehkweʼ ó꞉nen sihonakerá꞉ton ne Arpachshad tánon ó꞉ia ronekenteronʼtsheraién꞉takweʼ ó꞉ni rowiraién꞉takwe ne tsonathonwí꞉sen tánon eʼthó꞉ne warénheie.

12Nó꞉nen ne Arpachshad áhsen niwáhsen wísk shaʼtehaohseriiá꞉kon, wahonekenterontseraién꞉taʼne ne ne Shelah; 13tánon ne Arpachshad rónhnhehkwe ó꞉nen sihonakerá꞉ton ne Shelah kaié꞉ri tewenʼniáwe tánon áhsen niiohserá꞉kehkwe, tánon ó꞉ia ó꞉ni ronekenhteronʼtsheraién꞉tahkwe tánon rowiraién꞉takwe tsonathonwí꞉sen.

14Nó꞉nen ne Shelah áhsen niwáhsen shaʼtehaohseriiá꞉kon, wahonekenhteronʼtsheraién꞉taʼne ne ne Eber; 15tánon ne Shelah rónhnhekwe ó꞉nen sihonakerá꞉ton ne Eber kaié꞉ri tewenʼniáwe tánon áhsen niiohserá꞉kehkwe shithó꞉ionkwe tánon ó꞉ia ronekenhteronʼtsheraién꞉tahkwe ó꞉ni rowiraién꞉tahkwe tsonathonwí꞉senʼs.

16Nó꞉nen ne Eber áhsen niwáhsen kaié꞉ri shaʼtehaohseriiá꞉kon wahonekenhteronʼtseraién꞉taʼne ne ne Peleg; 17tánon ne Eber rónhnhekwe ó꞉nen sihonakerá꞉ton ne Peleg ne ne kaié꞉ri tewenʼniáwe tánon áhsen niwáhsen niiohserá꞉kehkwe tánon ó꞉ia ronekenhteronʼtsheraièn꞉tahkwe ó꞉ni rowiraièn꞉tahkwe tsonathonwí꞉sens.

18Nó꞉nen ne Peleg áhsen niwáhsen shaʼtehaohseriiá꞉kon wahonekenhteronʼtsheraién꞉taʼne, ne ne Reu; 19tánon ne Peleg rónhnhekwe ó꞉nen sihonakerá꞉ton ne Reu ne ne tékeni tewenʼniáwe tánon tióhton niiohserá꞉kehkwe, tánon ó꞉ni ó꞉ia ronekenhteronʼtsheraién꞉tahkwe ó꞉ni rowiraién꞉takwe tsonathonwí꞉senʼs.

20Nó꞉nen ne Reu áhsen niwáhsen tékeni shaʼtehaohseriiá꞉kon wahonekenhteronʼtsheraién꞉taʼne, né꞉ne Serug; 21tánon ne Reu rónhnhekwe ó꞉nen sihonakerá꞉ton ne Serug tékeni tewenʼniáwe tánon tsá꞉ta niiohserá꞉kehkwe, tánon ó꞉ni ó꞉ia ronekenhteronʼtsheraièn꞉tahkwe ó꞉ni rowiraièn꞉tahkwe tsonathonwí꞉sens.

22Nó꞉nen ne Serug áhsen niwáhsen shaʼtehaohseriiá꞉kon, wahonekenhterontseraién꞉taʼne, ne ne Nahor; 23tánon ne Serug rónhnhekwe ó꞉nen sihonakerá꞉ton ne Nahor tékeni tewenʼniáwe niiohserá꞉kehkwe tánon ó꞉ni ó꞉ia ronekenteronʼtsheraién꞉tahkwe ó꞉ni rowiraién꞉tahkwe tsonathonwí꞉sens.

24Nó꞉nen ne Nahor tewáhsen tióhton shaʼtehaohseriiá꞉kon, wahonekenhteronʼtsheraièn꞉taʼne, ne ne Terah; 25tánon ne Nahor rónhnhekwe ó꞉nen sihonakerá꞉ton ne Terah énskaʼ tewenʼniáwe tióhton iawén꞉re niiohserá꞉kehkwe tánon ó꞉ni ó꞉ia ronekenhteronʼtsheraién꞉tahkwe ó꞉ni rowiraién꞉tahkwe tsonathonwí꞉senʼs.

26Nó꞉nen ne Terah tsáta niwáhsen shaʼtehaohseriiá꞉kon, raónha kaʼníhsera wahá꞉ton tsi nonkwá ne Abram, ó꞉ni ne Nahor, tánon ne Haran.

27Né kí꞉ken ne Terah tsi niehothwatsirí꞉non, ráonha iesehshakoioʼokón꞉ʼas ne Abram, ó꞉ni ne Nahor, tánon ne Haran. Ne Haran né꞉ne ieshoién꞉ʼa ne Lot, 28ne Haran raónha tahatié꞉renhte wahrénheie tsi ní꞉ioht ne roʼníha Haran ne꞉ne tsi nón꞉we tiohóntsaien tawenhnakerá꞉ton, né꞉ne Ur Chaldeansʼke nón꞉we. 29Tánon ne Abram ó꞉ni ne Nahor wahotíniaʼke; tánon ne Nahor ró꞉ne Milcah iontátiats, ne sakoièn꞉a ne Haran ne ronhwaníha ne Milcah ó꞉ni ne Iscah. Ne nenʼ ne wahotíniaʼke, né nenʼne ne Haran shakoién꞉a, ne nónhne shakoièn꞉a ne Iscah. 30Ne Sarai iáh tewá꞉tonʼskwe naiowiraién꞉taʼne; iáh tehiowirahién꞉takwe.

31Ne Terah iahoiaʼténhawe ne roién꞉a Abram tánon ne roteré꞉ʼa Lot, né꞉ne Haran roʼién꞉a, ó꞉ni ne shakosáfha ne Sarai, ne ne roién꞉a Abram ró꞉ne, skátne tsi sahontenró꞉shen Ur nontahón꞉ne ne ne Chaldeansʼke tsi tiohóntsaien ne Canaan niahón꞉ne; ók shiahón꞉newe ne Haran, thóh nónwe ionsahontatíteron. 32Tsi niwenhnisehrá꞉kehkwe rotenhnisehraténionʼskwe ne Terah ne꞉ne tékeni tewenʼniáwe tánon wísk nihiosehrá꞉kehkwe; tánon ne Terah Haran nón꞉we iarénheie.

Zur Zeit ausgewählt:

Genesis 11: MHK

Markierung

Kopieren

Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.

Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.

The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).

Mehr über die Ohiatonhseratokénti erfahren