Luke 3

Ha Lantudtuchuwan John Un Mambubunyeg

(Mat. 3:1-12; Mrk. 1:1-8; Jhn. 1:19-28)

1Si mikasimpuɏu ya limaʼn tawon chi lanturayan Emperador Tiberius Caesar ud Rome, si Pontius Pilate chi gubillachuɏ ud Judea. Si Herod chi lanturay ud Galilee, Philip un suludla lanturay ud sakup chi Iturea kan Traconite ya si Lysanias chi lanturay ud Abilene. 2Cha kangatuwan un papachin cha Judio ked cha Annas kan Caiaphas.

Si hachiʼn timpu inggew chi impakaammun Apudyus kan John, un alak Zechariah si inggewala si lugeɏʼn lappun ummili. 3Ot gilaggakay John cha ili-iliʼn sakup chi chewwang un Jordan, imbyegbyegala kan cha tagu un, “Ibyabyawiyu cha byasbyasuɏyu ya mampabunyeg kayu ta pakawalon Apudyus chikayu.”

4Katchi matungpaɏan chi liigili si libluʼn Isaiah un propeta si awi, un kalala,

“Inggew chi osaʼn tagu si lugeɏʼn lappun ummili un langibyegbyega kan cha tagu,

‘Allaʼn gumatong chi Apu. Pabiɏuwonyu somsomokyu ya mansagala kayu un isun chi ileɏamyu chaɏan un ayon chi Ari.

5Masapuɏʼn abyabonyu cha losan un uɏuk ta matalap losan un tagudtud ya bilig.

Palinchongonyu cha pikkupikku un kesa ya taliptipanyu,

6ta losan un tagu itullongcha malaguwan Apudyus kan chicha.’ ”#3:6 v. 4-6, Isaiah 40:3-5

7Amo-amod cha taguʼn ummoy lampabunyeg kan John, ot kalala kan cha uchum, “Chikayuʼn lasikap un isun chi uɏog! Silu langibyega kan chikayu un milisiyu chusan Apudyus lu mampabunyeg kayu? 8Masapuɏʼn koonyu cha losan un mangipaila un tuttuwaʼn lambyabyawi kayu kan cha byasbyasuɏyu. Achiyu kalan un, gapu ta galak chikayu kan Abraham, milisiyu kachusaanyu kan Apudyus. Lappun katuttuwaan chi hachi. Ibyegak kan chikayu un makwaʼn mambyalilon Apudyus cha byetuʼn alla si galak Abraham. 9Si Apudyus isun chi taguʼn iyaallala wasaylaʼn mamokpok si puun chi kayu. Losan un kayuʼn achipun mamunga si bibiɏu, ked mapokpok ya mitungu si apuy.”

10Ot lan-imus cha amod un tagu kan John, un kalancha, “Ot himma koonmi?”

11Ot silongbyatan John chicha, un kalala, “Ha taguʼn chuwa silupla, masapuɏʼn idchola osa si tagu un lappun silupla. Isula bo, ha taguʼn awed kalola, masapuɏʼn idchela bo tagu un lappun kalola.”

12Ummoy bo cha uchum un manchachagup si bugis mampabunyeg kan John, ot ilimuscha, “Mistulu, himma koonmi?”

13Ot kalala, “Achiyu paɏabsan chi aɏanyuʼn bugis cha tagu.”

14Ot lan-imus bo uchum un suɏchachu kan siya, “Chikami ngay, himma koonmi?”

Ot kalala kan chicha, “Achiyu paligatan cha tagu willu pabyasuɏon cha tagu lu chakampun si katuttuwaan. Mat-op kayu si suwinchuyu.”

15Chingngeɏn pun cha tagu si John, simsimsimmokcha gumatngan Kristu un ingkarin Apudyus un umali mampangat, ot ha somsomokcha siya lin si John. 16Ngim kalan John kan chicha, chakampun un sakon si Kristu. “Awed chi misagsagulud un langatngatu lu sakon, ked achipulak lumbong un mangukas si sancheɏla. Bunyagek chikayu si chelum, ngim siya bunyagela chikayu si Ispiritun Apudyus ya apuy.#3:16 Ha kabyabyaan un musassu ked kaalola sancheɏn chi apula lu gumatong ya lumlok, iggala lu awed ayala. Si John piolaʼn ibyega un achipun maikari un mansimbi ulay osaʼn musassun Jesus. 17Isun chi tagu un mamangchon si leblak un mantopa un mansilaola bilayu ya chugi. Ha bilayu iteponla si aɏang, ngim ha chugi ibyellula si apuy un achipun masobsobyen.”

18Cha laoy cha lakalakalasi un in-ilon John un langibyegbyega kan cha tagu mipanggop si Bibiɏuʼn Chameg. 19Ya ilomeɏan John si Gubillachuɏ Herod ti ilasawala si Herodias un asawan chi suludla, ya achu cha lawwik un killingwala. 20Ngim laam-amod lambyasuɏ si Herod ti impaibyaɏudla si John.

Ha Labunyagen Jesus

(Mat. 3:13-17; Mrk. 1:9-11)

21Si osaʼn eɏgew sakbyey un mibyaɏud si John, bilunyagela cha achun tagu, bilunyagela bo si Jesus. Lagamput pun, lalluwalu si Jesus ot liwalit ud langit. 22Ot ha Ispiritun Apudyus lan-osog ot lallap-oy kan siya un isun chi kalapati. Ot ladngeɏ ginga un lampeɏpuʼd langit un kalala, “Sika Alakkuʼn tagtagopok ya masmas-omak.”

Cha Singgalak Kan Jesus

(Mat. 1:1-17)

23Si lallugiyan Jesus un lantudtuchu, umoy un tiɏumpuɏu tawonla. Ya ha somsomok cha tagu, ibilangcha siya un alak Joseph. Si Joseph, alak Heli, 24un alak Matthat. Si Matthat, alak Levi. Ked si Levi, alak Melki, un alak Jannai, un alak Joseph. 25Si Joseph, alak Mattathias, un alak Amos. Si Amos, alak Nahum, un alak Esli, un alak Naggai. 26Si Naggai, alak Maath un alak Mattathias. Ked si Mattathias, alak Semein un alak Josech. Ked si Josech, alak Joda. 27Si Joda, alak Joanan, un alak Rhesa. Ked si Rhesa, alak Zerubbabel un alak Shealtiel, un alak Neri. 28Si Neri, alak Melki un alak Addi. Ked si Addi, alak Cosam un alak Elmadam, un alak Er. 29Si Er, alak Joshua un alak Eliezer, un alak Jorim. Ked si Jorim, alak Mattath un alak Levi. 30Si Levi, alak Simeon un alak Judah. Ked si Judah, alakla Joseph. Ked si Joseph, alak Jonam un alak Elliakim. 31Si Elliakim, alak Melea un alak Menna, un alak Mattatha. Ked si Mattatha, alak Nathan, un alak David. 32Si David, alak Jesse un alak Obed. Ked si Obed, alak Boaz un alak Salmon, un alak Nahshon. 33Si Nahshon, alak Amminadab un alak Admin, un alak Arni. Ked si Arni, alak Hezron un alak Perez, un alak Judah. 34Si Judah, alak Jacob un alak Isaac. Ked si Isaac, alak Abraham. Ked si Abraham, alak Terah un alak Nahor. 35Si Nahor, alak Serug un alak Reu, un alak Peleg. Ked si Peleg, alak Eber un alak Shelah. 36Si Shelah, alak Cainan un alak Arphaxad un alak Shem. Ked si Shem, alak Noah un alak Lamech 37Si Lamech, alak Methuselah un alak Enoch, un alak Jared. Ked si Jared, alak Mahalalel un alak Kenan. 38Ked si Kenan alak Enos un alak Seth. Si Seth alak Adam, un alak Apudyus.

Zur Zeit ausgewählt:

Luke 3: HUA

Markierung

Kopieren