ЛукӀа 19

Иса Закхеян патав

1 Иса Еригьан шегьердай яна физвай. 2Ингье, харж кӀватӀдайбурун кьилел алай Закхей тӀвар алай, девлет авай са кас, 3Иса вуж ятӀа чириз кӀанз, Ам акваз алахъзавай, амма вичин гъвечӀи буй себеб яз, халкьдин арадай адаз Иса аквазвачир. 4Иса акун патал, ам чукурна фена тутун тараз акьахна, Иса гьа и таран патавай фин лазим тир. 5Тарав агакьайла, Исади виниз килигна адаз лагьана:

– Закхей! Гьерекатна эвичӀ! Къе Зун ваз мугьман хьун лазим я.

6Закхея, тадиз тарай эвичӀна, Исадиз хушвилелди кӀвализ ша лагьана. 7И кар акур вирибуру, Иса гунагькардин кӀвализ мугьманвилиз физва лугьуз, наразивал ийиз хьана. 8Закхеяни, къарагъна, Реббидиз лагьана:

– Я Агъа! За зи девлетдин са пай кесибриз гуда; за нивай артух харж къачунатӀа, гьадав кьудра артух вахгуда.

9– Ви кӀвалел къе хиласвал атанва, – лагьана Исади, – вучиз лагьайтӀа вунни Ибрагьиман велед я. 10Инсандин Хва и дуьньядиз, квахьнавай ксар жагъурна, абур хиласун патал, атанвайди я.

Пул хуьз вугуникай кьиса

(МатӀай 25:14-30)

11И гафариз яб гайибуруз Исади са кьисани ахъай хъувуна. Ам Ярусалимдиз мукьва хьанвай, гьакӀ хьайила гзафбуру гила-мад Аллагьди пачагьвалдай вахт алукьда лугьуз фикирар ийиз хьанай. 12Исади лагьана:

– Са асул-несил авай инсан яргъал вилаятдиз, вичиз пачагьвал къачуна элкъвена хтун патал, физ кӀвачин хьанвай.

13Ада вичин цӀуд къуллугъдардиз эверна, гьардав хуьн патал гимишдин са манат вугана лагьана: «Зун фена хкведалди и пул кардик кутур».

14Амма адан жемятдиз ам такӀандай ва адан гуьгъуьнал алаз, «Ада пачагьвал авуна чаз кӀандач» лугьун патал, чархачияр ракъурна.

15Пачагьвал къачуна элкъвена хтайла, ада вичин патав, ни вуч къачунатӀа чирун патал, пул вугай къуллугъдарриз эверун эмирна.

16Сад лагьайда атана лагьана: «Агъа! Ви са гимишдин манатди цӀуд гимишдин манат гъана». 17«Баркалла, вун хъсан къуллугъдар я! – лагьана ада. – И гъвечӀи карда вуна вафа хуьниз килигна, вун за цӀуд шегьердин кьиле акъвазарзава».

18Кьвед лагьайда атана лагьана: «Агъа! Ви са гимишдин манатди гимишдин вад манат гъана». 19«Вунни вад шегьердин кьиле акъвазарда», – лагьана ада идазни.

20Пуд лагьайда атана лагьана: «Агъа, ингье ягълухдик кутуна хуьзвай ви гимишдин манат. 21Заз вахъай кичӀеда, вун атӀугъай, чин кӀеви инсан я: вуна эциг тавур шей вуна вахчуда, вуна цун тавур ник вуна гуьда». 22«Ви дуван за, кьеркьеш къуллугъдар, ви гафаралди ийида! – лагьана агъади. – Зун жува эциг тавурди къахчудай ва жува цун тавурди гуьдай, чин кӀеви инсан тирди ваз чизвай. 23Заз хийир жедайвал, вучиз вуна зи пул кирида вуганач? Хтайла, за ам кьил алаз къахчудайди тир».

24Патав акъвазнавайбуруз ада лагьана: «Адавай пул къахчуна, ам гимишдин цӀуд манат кьил алаз гъилиз гъайидав гице». 25«Я агъа! – лагьана абуру. – Адахъ гимишдин цӀуд манат ава». 26«За квез лугьузва хьи, авайдаз гуда, авачирдавай авайдини къакъатда, – жаваб гана ада. – 27За чпин кьилел пачагьвал авуна такӀан зи душманар, лагьайтӀа, зи вилик гъана, рекьикь».

Иса Месигь Ярусалимдиз атун

(МатӀай 21:1-9; Мрк. 11:1-10; Ягь. 12:12-15)

28И кьиса ахъайна, Иса Ярусалимдиз рекье гьатна. 29Зейтун пелен патав гвай Бетфагдивни Бетандив агакьайла, Ада тилмизрикай кьвед ракъурна 30лагьана:

– Куь вилик квай хуьруьз алад; аниз финни кумаз квел кутӀуннавай хам шаркӀунтӀ гьалтда, адал садрани инсан акьахайди туш; ам ахъайна иниз гъваш. 31Квевай «Ам вучиз ахъайзава?» лагьана хабар кьадай кас хьайитӀа, куьне адаз икӀ лагь: «Ам Агъадиз герек я».

32Ракъурайбур фена ва абуруз Ада лагьай чкадал шаркӀунтӀ жагъана. 33Абуру шаркӀунтӀ ахъайдайла, адан иесийри абуруз лагьана:

– Куьне ламрак вучиз кязава?

34Абуруни жаваб гана:

– Ам Агъадиз герек я.

35ШаркӀунтӀ абуру Исадин патав гъана; шаркӀунтӀдал чпин пекер-парталар вегьена, адал абуру Иса акьадарна. 36Иса ламрал алаз фидайла, инсанри Адан вилик рехъ тирвал чпин пекер вегьиз хьана. 37Ам Зейтун пелен кӀаниз мукьва хьайила, Адан гзаф кьадар тилмизри, чпиз икьван аламатар къалурай Аллагьдал шад яз, гьарай ацалтна шукурар ийиз хьана. 38Абуру гьарай кваз лугьуз хьана:

– Реббидин ТӀварцӀелай къвезвай Пачагьдиз шукур хьурай! Цавара ислягьвал хьурай, Аллагьдиз цавар ацӀай кьван шукур хьурай!

39Халкьдин арада авай са бязи фарисейри Исадиз лагьана:

– Муаллим! Жуван тилмизар секинра.

40– За квез лугьузва, абур кисайтӀа, къванерай гьараяр акъатда, – жаваб гана Ада.

41Шегьер аквадай чкадив агакьайла, Иса адан гележегдихъ шел-хвал ийиз эгечӀна:

42– Эй, Ярусалим, вазни ислягьвал куь гъидатӀа къемаз чир хьанайтӀа хъсан жедай! Амма Аллагьди ам вакай чуьнуьхнава. 43Ви кьилел ахьтин йикъар къведа хьи, душманри атана сенгерар яда ва кьуд патахъайни вун элкъуьрна кьада, вал абуру гьар патахъай басрухда, 44вун барбатӀда, ви къеневай веледарни тергда, ви къван къванцел тун тавуна вун руг-руг ийида. Ибур, ви патав куьмек гуз Аллагь атайла, ваз Ам чир тахьайвиляй жедай крар я.

Гуз-къачузвайбур чукурун

(МатӀай 21:12-16; Мрк. 11:15-19; Ягь. 2:13-16)

45Иса Аллагьдин КӀвалин гьаятдиз гьахьна, ана гуз-качузвайбур чукуриз эгечӀна. 46Ада абуруз лугьуз хьана:

– Каламра «Зи кӀвал дуьа ийидай кӀвал я»#Яшай 56:7. лагьана кхьенва, амма куьне ам гьинавачир гьарамзадайрин макандиз элкъуьрнава.

47Ада Аллагьдин КӀвале гьар юкъуз чирвилер гузвай. ЧӀехи хахамар, тавратдарар, агъсакъалар ам рекьидай са мумкинвилихъ къекъвезвай, 48амма чпин фикир кьилиз акъуддай са рехъ абуруз жагъизвачир. Халкьди, лагьайтӀа, алтӀушна къанихдаказ Адан чирвилериз яб гузвай.

Zur Zeit ausgewählt:

ЛукӀа 19: ЛезПК

Markierung

Kopieren