Ягья 7
7
Исадин стхайри иман тавун
1Адалай кьулухъ Иса Галилейдиз фена. Адаз Ягьудатда къекъвез кӀанзавачир: чувудриз Ам рекьиз кӀанзавай. 2Чувудрин Кумайрин сувар мукьва жезвай. 3Гьа вахтунда Исадин стхайри Адаз лагьана:
– Вуна ийизвай керемат-ишараяр Ви тилмизризни аквадайвал, Вун инай Ягьудатдиз алад; 4гьардаз вич машгьур хьана кӀанда, гьавиляй садани чинебан кар ийидач; Вуна гьахьтин керемат-ишараяр арадал гъизватӀа, Жувакай дуьньядиз хабар жедайвал ая.
5Адан стхайрини Адахъ иман ийизвачир. 6Гьавиляй Исади абуруз лагьана:
– Зи вахт гьеле атанвач, амма квехъ галаз гьар са вахт кьунва. 7Дуьньядиз куьн такӀан хьун жедай кар туш. За, лагьайтӀа, дуьньядин чӀуру крар винел акъудзава, гьавиляй адаз Зун акунани кӀан туш. 8Куьн суварик алад, Зун фидач, Зи вахт гьеле атанвач.
9Ам, стхайрихъ галаз тефена, Галилейда амукьна.
Иса Ярусалимда суварик
10Стхаяр суварик фейила, Исани Вич садазни таквадайвал, чинеба суварик фена. 11Суварик чувудрин кьиле авайбуру, Адахъ къекъвез, «Ам гьинава?» лугьуз, хабарар кьазвай. 12Адакай халкьдин арада гзаф рахунар авай: садбуру Ам хъсан инсан я, муькуьбуру – ваъ, Ада халкьар рекьяй акъудзава лугьузвай. 13Амма чувудрин кьиле авайбурукай кичӀела садни Адакай ачухдиз рахазвачир.
14Суварин йикъарин са пай алатайла, Исади Аллагьдин КӀвализ атана ва чирвилер гуз эгечӀна. 15Чувудрин кьиле авайбуру мягьтел хьана лугьузвай:
– КӀел тавуна, Калам икьван хъсандиз чир хьун гьикӀ жезвай кар я?
16Абуруз жаваб яз Исади лагьана:
– За гудай чирвилер зибур туш, абур Зун Ракъурнавайданбур я. 17Адан къаст кьилиз акъудиз кӀанзавай касдиз За гузвай чирвилер Аллагьдинбур ва я Зибур ятӀа чир жеда. 18Са вичин гафар лугьузвайда са вич машгьурда, амма вич Ракъурнавайди машгьурзавайда таб ийидач. Адан чӀалахъ хьайитӀа жеда. 19Мусади квез Къанун ганачни мегер? Квекай гьич садани вич Къанунда лагьанвайвал кьиле тухузвач. Квез Зун вучиз рекьиз кӀанзава?
20– Вак жинерар акатнавани? – жаваб гана халкьди. – Вун низ рекьиз кӀанзава?
21Исади Вичин рахунар давамарна:
– За тек са кӀвалах авуна, куьн вири тажуб хьана. 22Куьне куь гадаяр, Мусадилай атанвай адет я лугьуз, Киш юкъузни суьннет ийизва (авайвал лагьайтӀа, суьннет авун Мусадилай ваъ, чувудрин лап чӀехи бубайрилай амай адет я). 23Мусадин Къанун чӀур тавун патал Киш юкъузни аялар суьннет ийиз хьайила, бес За Киш юкъуз инсан сагъар хъувуна лугьуз, вучиз квез Закай хъел къвезва? 24Винелай килигна ваъ, гьахъ-михьи къимет це.
Иса – Месигь яни-тушни?
25Инал ярусалимвийрикай садбуру лугьуз хьана:
– Чи гьакимриз рекьиз кӀанзавай Инсан гьа им тушни? 26Килиг, Ам инсанрихъ галаз ачухдаказ рахазва, абуруни Адаз куьтӀни ийизвач. Ам Месигь тирдахъ гьакимар гьакъикъатда чӀалахъ хьанвани? 27Ам гьинай ятӀа, чаз чида, амма халисан Месигь атайла, Ам гьинай атанатӀа садазни чир жедач.
28Аллагьдин КӀвале чирвилер гудайла, Исади ван алаз лагьана:
– Квез Зун таниш я, Зун гьинай ятӀа квез чида. Зун Залай атанвайди туш, Зун Ракъурнавайди халисанди я. Ам квез чидач. 29Заз Ам хъсандиз чида. Зун Гьадан патавай атанвайди я. Зун Гьада Ракъурнавайди я.
30Гьа чӀавуз абуруз Ам кьаз кӀан хьана, амма садавайни Адак гъил кягъиз хьанач, вучиз лагьайтӀа Адан вахт атанвачир. 31Халкьдин арада гзафбуру лугьузвай:
– Месигь атайла, Адавай и касди къалурай керемат-ишарайрилай гзаф керемат-ишараяр ийиз жедани кьван?
Гьа икӀ фикирзавай абуру Исадихъ иман авуна.
Иса кьаз алахъун
32Исадикай халкьди ийизвай кушкушар фарисейризни ван хьана. ЧӀехи хахамрини фарисейри, Ам кьун патал, Аллагьдин КӀвалин къаравулар ракъурна. 33Исади лагьана:
– Зун куь арада са тӀимил вахтунда амукьда, ахпа Зун Жув Ракъурайдан патав хъфида. 34Куьн Захъ къекъведа, амма квез Зун жагъидач, Зун жедай чкадиз квевай къвез жедач.
35Чувудри чпи чпиз лугьуз хьана:
– Чаз Вич жагъин тийидайвал Адаз гьиниз физ кӀанзаватӀа? Адаз, маса халкьарин арада авай чувудрин патав фена, гьана чувудар туширбурузни чирвилер гуз кӀанзаватӀа? 36«Куьн Захъ къекъведа, амма квез Зун жагъидач, Зун жедай чкадизни квевай къвез жедач» лугьузвай гафаралди Адаз вуч лугьуз кӀанзаватӀа?
Эбеди уьмуьр гудай яд авай вацӀар
37Суварин эхиримжи ва лап чӀехи юкъуз Исади, къарагъна, ван алаз лагьана:
– Вуж цихъ къаних ятӀа, Зи патав ша, хъухъ. 38Каламда кхьенвайвал, Захъ иман ийизвайдан рикӀяй уьмуьр гудай цин вацӀар авахьда.
39ИкӀ лугьудайла, Исадин фикирда Вичихъ иман авурбуруз гудай Руьгь авай. Иса гьеле Вичин вири баркалладив агакь тавуниз килигна, абуруз Руьгь ганвачир.
40И гафар ван хьайи халкьдикай садбуру лугьузвай:
– Ам рикӀивайни гьа Пайгъамбар я.
41– Ам Месигь я, – лугьузвай муькуьбуру.
– Месигь Галилейдай акъатдани мегер? – лугьузвай са бязибуру. – 42Месигь Давудан тухумдикай жедайди, Ам Давудан хайи Бетлегьем шегьерда пайда жедайди Каламдани лагьанвачни кьван?
43Гьа икӀ Адан гьакъиндай халкьдин арада чуьруькар гьатна. 44Абурукай са бязибуруз Ам кьаз кӀанзавай, амма садани Адак гъил кянач.
Чувудрин гьакимрихъ иман тахьун
45Гьа икӀ Аллагьдин КӀвалин къаравулар элкъвена чӀехи хахамринни фарисейрин патав хъфена. Хахамрини фарисейри абурувай хабар кьуна:
– Куьне Ам кьуна вучиз хканач?
46– А инсанди лагьай хьтин гафар садани лагьайбур туш, – жаваб гана къаравулри.
47– Ада куьнни алцурарнавани? – лагьана фарисейри. – 48Мегер адахъ иман авурбурук са гьаким ва я са фарисей кьванни квани? 49Адахъ иман ийизвайди Аллагьди негьнавай халкь я, адаз Къанундикай са хабарни авач.
50Фарисейрин арада йифиз Исадин патав атай Никъадим авай.
51– Инсандиз кар атӀудалди, адаз вичиз яб гана, адак тахсир кватӀа чирна кӀанда, – лагьана ада. – Къанундини чаз гьакӀ лугьузвачни кьван?
52– Вунни Галилейдай яз тахьуй гьа? – жаваб гана абуру. – Калам кӀела, Галилейдай пайгъамбар акъатдач.
53Абур вири чпин кӀвалериз хъфена.
Zur Zeit ausgewählt:
Ягья 7: ЛезПК
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Институт перевода Библии, 2010-2024
