Ягья 12

Иса Бетан хуьре

(МатӀай 26:6-13; Мрк. 14:3-9; ЛукӀа 7:37-39)

1 Песагь суварилай ругуд югъ вилик, Иса Бетандиз атана. Ана кьейидалай кьулухъ вичел Ада чан хкай Лазара уьмуьр тухузвай. 2Ана Адаз нянин суфра ахъайна. Марта абурун кьилел-кӀвачел элкъвезвай. Адахъ галаз суфрадихъ ацукьнавайбурук Лазарни квай. 3Майрама атирдин ни галай багьа гъери къачуна, са гирванка кьван Исадин кӀвачеривай гуьцӀна ва вичин чӀараралди Адан кӀвачер михьна. КӀвале атирдин хуш ни гьатна. 4Исадин тилмизрикай сад тир, гележегда Ам маса гудай Искарият Ягьуда лагьана:

5– Атирдин ни галай гъери пуд виш динардихъ вучиз маса ганач? А пул кесибриз гуз жедай эхир! 6Ибур ада кесибрихъ рикӀ кузвайвиляй ваъ, вич угъри тирвиляй лагьай гафар тир: тилмизрин уртах пул хуьдай затӀ адав жедайди тир, ада мукьвал-мукьвал а пулуникай чуьнуьхдай.

7– Майрам секиндиз тур, – лагьана Исади. – А гъери ада Зун сура динжардай югъ паталди хвенва. 8Кесибар датӀана квехъ гала, амма Зун – датӀана жедач.

9 Чувудрикай гзафбуруз Иса Бетанда авайдакай хабар хьана. Гьавиляй абур, тек са Иса ваъ, гьакӀ кьейидалай кьулухъ Ада чан хкай Лазарни акун патал, гьаниз фена. 10-11Исадин патав атай гзаф чувудар, Лазар себеб яз, Исадихъ ийизвай имандал атанай. Гьавиляй чӀехи хахамри Лазарни яна рекьин кьетӀна.

Иса Месигь Ярусалимдиз атун

(МатӀай 21:4-9; Мрк. 11:7-10; ЛукӀа 19:35-38)

12Гуьгъуьнин юкъуз Ярусалимдиз суварик атай гзаф инсанриз аниз Исани къвезва лугьудай ван хьана. 13Абур гъилера хурмадин тарцин хилер аваз Адан вилик экъечӀна ва гьарайиз хьана:

– Гьасанна! Реббидин ТӀварцӀелай Къвезвайдаз шукур хьурай! Исраилдин Пачагьдиз шукур хьурай!

14Иса, жегьил лам жагъурна, гьадал акьахна. И кар Каламда кхьенвайвал хьана:

15 «КичӀе жемир, Сигьандин руш Ярусалим,

шаркӀунтӀдаллаз ингье къвезва ви Пачагь!» # Зекери 9:9.

16И кар хьайи чӀавуз Адан тилмизар Каламда кхьенвай гафар кьилиз акъатзавайдан гъавурда акьуначир. Амма гуьгъуьнлай, Исадал баркалла атайдалай кьулухъ, Каламда кхьенвай гафар кьилиз акъатайди абуруз чир хьана.

17Ана Исади Лазарал чан хкайвал акур инсанар авай. Абуру Лазар Исадин эвердал кьветӀяй эхкъечӀайдакай вирибуруз суьгьбетна. 18Исади авур керемат-ишарадин кардикай хабар хьайивиляй халкь Адан вилик экъечӀна. 19Фарисейри чпи чпик лугьуз хьана:

– Аквазвани, квевай Адаз са затӀни ийиз жезвач. Дуьнья вири Гьадан гуьгъуьна гьатнава.

Иса чувудар туширбурухъ галаз рахун

20Икрам ийиз сувариз атанвайбурун арада чувудар туширбурукайни са кьадар авай. 21Абуру, Галилейда авай Бетсаиддай тир ФилипӀан патав атана, адаз лагьанай:

– Агъа! Чаз Иса акваз кӀанзава.

22ФилипӀа, фена и гафар Эндиреяз лагьана, Эндиреяни ФилипӀа фена Исадиз хълагьна. 23Исади жаваб яз лагьана:

– Инсандин Хцел баркалла къведай вахт атанва. 24За квез лап рикӀивай лугьузва: къуьлуьн твар чилел аватна пуч тахьайтӀа, ам твар яз амукьда, амма ам чилел аватна терг хьайитӀа, адалай гзаф тварар арадиз къведа. 25Жуван чан кӀандайди чандикай магьрум жеда, и дуьньяда жуван чан такӀанда вичин чан эбеди уьмуьр патал хуьда. 26Ни Заз къуллугъзаватӀа, гьам Зи гуьгъуьна аваз атун лазим я. Зун гьина хьайитӀа, Зи къуллугъзавайдини гьана хьун лазим я. Ни Заз къуллугъ авуртӀа, Зи Бубадини гьадаз хатур-гьуьрмет ийида.

27Зи рикӀи рикӀ незва; За гьикӀ лугьун: «Буба, Зи кьилел къведайдакай Зун хуьх». Зун гьа и кар паталди атанва. 28Буба, Ви баркалла къалура!

Гьа чӀавуз цаварилай ван атана:

– За квез Зи баркалла къалурнай ва мадни къалурда.

29И ван хьайи инал алай халкьди лагьана:

– Ибур цавун къукърумар я.

Муькуьбуру лагьана:

– Адахъ галаз малаик рахана.

30Адан гьакъиндай Исади лагьана:

– Цаварилай а ван Зун патал ваъ, куьн патал атанвайди я. 31Гила и дуьньядин дуван ийидай вахт хьанва; и дуьньядал агъавалзавай бег гила-мад чукурда. 32Зун чилелай хкаж авурла, За вири Жувал желб ийида. 33И гафар лугьуналди Ада Вич гьихьтин ажалдалди рекьидатӀа къалурзавай.

34Халкьди Адаз лагьана:

– Чаз Къанундай чизва хьи, Месигь атайла, ам эбеди яз чи патав гумукьда. Амма Вуна Инсандин Хва цавуз хкаж хъжеда лугьузва. А Инсандин Хва Вич вуж я?

35– Са тӀимил вахтунда квехъ галаз Экв амукьда, – жаваб гана Исади. – Экв амай кьван гагьда куьн, мичӀера гьат тийидайвал, куь рехъди алад. МичӀерай физвайдаз вич гьиниз физватӀа чир жедач. 36Квекай Экуьнин веледар хьун патал Экв квехъ галаз амай кьван гагьда Экуьнихъ иман ая.

И гафар лагьана куьтягь хьайила, Иса абурукай къакъатна чуьнуьх хьана.

Чувудри иман тавун

37Исади инсанрин вилик икьван керемат-ишараяр авунатӀани, абуру Адахъ иман ийизвачир. 38Гьа икӀ Яшай пайгъамбардин гафар кьилиз акъатнай. А гафар ихьтинбур я: «Я Ребби, чна лагьай гафарин вуж чӀалахъ хьанай кьван? Реббидин къуват низ акунай кьван?»#Яшай 53:1. 39Вичин ктабда маса чкадал Яшая инсанривай вучиз иман ийиз жезвачтӀа мад лагьанай: 40«Ада абурун вилер буьркьуь, рикӀерни кӀеви авуна. Ада и кар, абуруз вилералди затӀни такун патал ва рикӀералди затӀни кьатӀун тавун патал, авуна. Гьавиляй абурувай Аллагьдихъ элкъвена чеб сагъар хъия лугьуз жезвач»#Яшай 6:10.. 41Ибур Яшая Исадин баркалла гьихьтинди жедатӀа аян тирвиляй лагьай гафар тир.

42Гьакимрикайни гзафбур Исадихъ ийизвай имандал атанай, амма чеб фарисейри синагугдай чукуриз кичӀела, абуру а кар ачухдиз хиве кьазвачир. 43Абуруз чпин тариф Аллагьди ийизвайдалай гзаф инсанри авуна кӀанзавай.

Исади ийидай дувандикай

44Исади ван алаз лагьана:

– Захъ иман ийизвайда тек са Захъ ваъ, гьакӀни Зун Ракъурнавайдахъ иман ийизва. 45Зун аквазвайдаз Зун Ракъурнавайдини аквазва. 46Захъ иман авурбур мичӀе амукь тавун патал, Зун Экв яз дуьньядиз атана. 47Зи гафар ван хьайи, амма За лагьайвал тавурбурун дуван За ийидач. Зун дуьньядин дуван ийиз ваъ, дуьнья хиласиз атанвайди я. 48Зун негь ийизвайдаз ва Зи гафар кьабул тийизвайдаз дуванбег ава, Зи гафари адан дуван Къияматдин юкъуз ийида. 49Зи гафар За Жува Жувакай туькӀуьрна лугьузвайбур туш. Вуч ва гьикӀ лагьана кӀандатӀа, Зун ракъурнавай Зи Бубади Заз тагькимнава. 50Адан тагькимди эбеди уьмуьрдал гъидайди Заз чизва. Гьа икӀ, Заз Бубади вуч лагьанатӀа, Зани гьам лугьун хъийизва.

Zur Zeit ausgewählt:

Ягья 12: ЛезПК

Markierung

Kopieren