Хьунухь 2
2
1Гьа икӀ цавни чил ва цавунни чилин туькӀуьрунин вири жерге халкь авунай.
2Ирид лагьай йикъалди Аллагьди арадал гъунин кӀвалахар акьалтӀарнавай. Ирид лагьай юкъуз Аллагьди ял яна: Ада арадал гъунин кӀвалахар куьтягьнай.
3Аллагьди ирид лагьай йикъаз хийир-дуьа авуна, ва ам паквилиз акъудна, вучиз лагьайтӀа и юкъуз ада ял янай: Ада халкь авунин ва арадал гъунин кӀвалахар куьтягьнай.
Инсан женнетдин багъда
4Ингье цавукайни чиликай, абур халкь авур вахтуникай ихтилат.
Ребби Аллагьди чил ва цав халкь авур чӀавуз, 5чилел гьич са вални, гьич са векь-кьални алачир. Ребби Аллагьди гьеле чилел марфар къурнавачир эхир, ва адахъ гелкъуьн патал инсанарни авачир. 6Анжах чилин деринрай акъатзавай ци ам дигизвай.
7Ребби Аллагьди чилин руквадикай инсан халкь авуна, адак нерин хилерай нефес кутуна ва инсандал чан атана.
8Эдемда, рагъэкъечӀдай пата, Ребби Аллагьди багъ кутуна ва Вичи халкь авур инсан гьана уьмуьр тухун патал ацукьарна. 9Ребби Аллагьди и багъда вили кьадай ва хъсан бегьер гъидай гьар жуьредин тарар чӀехи авуна, багъдин юкьвал лагьайтӀа – уьмуьрдин тарни хъсанвални писвал вуч ятӀа чир ийидай тар.
10Эдемдай вацӀ авахьзава; ада багъ дигизва, ахпани кьуд хилез пай жезва. 11Абурукай садаз Пишун лугьузва, ам виче къизил авай Гьавила уьлкведин къвалавай элкъвез-элкъвез авахьна фива. 12А уьлкведа михьи къизил ава, ана гьакӀ хуш ни галай шкьакь ва шагьам лугьудай къимет авай къванни дуьшуьш жезва. 13Кьвед лагьай вацӀун тӀвар Гигьан я, ва ам Куш уьлкведин къвалавай авахьзава. 14Пуд лагьай вацӀун тӀвар Пеленг я, ам Ашурдилай рагъэкъечӀдай пата авахьзава. Кьуд лагьай вацӀ Эфрат я.
15Инсан Эдемдин багъда ацукьарна, ам и багъдихъ гелкъуьн патал ва ам хуьн патал. 16-17Ребби Аллагьди адаз ихьтин тапшуругъ гана: «Вавай, анжах са хъсанвални писвал чирдай тар квачиз, и багъда авай гьар гьи тарцелай хьайитӀани атӀана майваяр нез жеда, адан майваяр немир: тӀуьртӀа, лап гьа юкъуз рекьида».
18Ребби Аллагьди лагьана: «Инсан тек хьун хъсан туш. За адаз вичихъ галаз кьадай куьмекдар халкьда».
19Ребби Аллагьди чиликай гьар жуьредин гьайванар ва ничхирар арадал гъана, ва ада абуруз гьихьтин тӀварар гудатӀа килигун патал, инсандин кьилив гъана. Гьа икӀ гьайванрал инсанди чпиз гайи тӀварар акьалтна. 20КӀвалин вири гьайванриз, вири ничхирриз, вири вагьшийриз инсанди тӀварар гана – амма абурун арада вичив кьур са куьмекдар жагъанач. 21И чӀавуз Ребби Аллагьди инсан дерин ахвариз ракъурна ва адан пакун тӀваларикай сад акъудна, ам алай чка якӀувди кӀевна. 22И пакун тӀвалуникай Ребби Аллагьди паб арадал гъана ва ам инсандин кьилив гъана. 23Инсанди гьарайна лагьана:
«Килиг, и кӀараб зи кӀарабдикай я,
як зи якӀукай я.
ТӀвар паб жеда адан#2:23 Чувуд чӀала и гафарин дибар сад хьтинбур я: иш (итим), ишша (паб).,
вучиз лагьайтӀа итимдикай къачунвайди я».
24Ингье вучиз итим, бубани диде туна, папахъ галкӀана, адахъ галаз са чандиз элкъвезватӀа.
25Абур кьведни, гьам Адам, гьамни адан паб, кьецӀил тир, амма регъуьвал ийизвачир.
Zur Zeit ausgewählt:
Хьунухь 2: ЛезПК
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Институт перевода Библии, 2010-2024
