Хьунухь 17
17
Аллагьдинни Ибрагьиман икьрар
1Ибраман кьудкъанни цӀекӀуьд йис тир чӀавуз адан вилик Ребби пайда хьана ва лагьана: «Зун вири алакьдай Аллагь я. Зи вилик кваз уьмуьр твах ва гунагьриз рехъ гумир. 2За вахъ галаз икьрар кутӀунда ва ваз гзаф несилар багъишда».
3Ибрам метӀерал аватна, ва Аллагьди лагьана: 4«Гила За вахъ галаз икьрар кутӀунзава. Вун гзаф халкьарин бан-буба жеда. 5ТӀварни ви Ибрам ваъ, Ибрагьим жеда, вучиз лагьайтӀа За вакай гзаф халкьарин бан-буба ийида.
6Ви тухум За кьадардиз гзаф тирди ийида:
валай бегьем халкьар арадал къведа
ва ви несилрикай пачагьар жеда.
7Вахъ ва ви несилрихъ галаз Зи икьрар жеда – эбеди тир икьрар, несилдилай несилдалди: Зун ви ва ви несилрин Аллагь жеда. 8За вазни ви несилриз вун масанай атана ацукьнавайди тир вири и Къенандин чил гуда. За ам ви несилриз эбеди сагьибвал авун патал гуда ва абурун Аллагь жеда».
Суьннет
9Аллагьди Ибрагьимаз мадни лагьана: «Амма вунани Захъ галаз авай икьрар тамамарун лазим я, валай гуьгъуьнай ви несилрини, несилдилай несилдалди. 10За квехъ галаз икьрар кутӀуннава ва ви несилри ам кьилиз акъудрай: куь вири итимар суьннет авунвайбур хьун лазим я. 11Захъ галаз авай икьрардин лишан яз куь эркеквилин лишандин кӀвенкӀв атӀутӀ.
12-13Куь цӀийиз хайи гьар са гада муьжуьд лагьай юкъуз суьннет авуна кӀанда – несилдилай несилдалди гьа икӀ хьурай.
Ви кӀвале хайидини, куь арада тахана маса тайифайривай маса къачунвайдини, са рахунни алачиз суьннет авун лазим я. ИкӀ хьайила, Захъ галаз авай икьрар, эбеди икьрар, куь бедендин лишан яз жеда.
14Суьннет тавунвайди – вичин эркеквилин лишандикай атӀун тавунвайди, – Захъ галаз авай икьрар чӀур авун себеб яз вичин халкьдикай акъудна гадарнавайди жеда».
15Аллагьди Ибрагьимаз мадни лагьана:
«Гила ви папан тӀварни Сарай ваъ, Сарра жеда.
16За адаз хийир-дуьа ийида ва ваз ада хайи хва гуда.
За адаз хийир-дуьа ийида ва адалай бегьем халкьар арадал къведа,
Ва адан несилрикай пачагьар жеда».
17Ибрагьим метӀерал аватна, амма вич-вичик хъуьрена хьиз фикир авуна: «Виш йис хьанвай кьуьзеказ аялар жезмайди яни? Кьудкъанни цӀуд йис хьанвай Саррадивай аял хаз жедани?»
18Гьавиляй ада Аллагьдиз лагьана: «Исмаилан уьмуьрни Ваз кӀаниди хьурай!»
19Аллагьди лагьана: «Ваъ, Сарради, ви папа, ваз хва хада, вунани адал Исакь тӀвар эцигда. За гьадахъ ва адан несилрихъ галаз икьрар кутӀунда – эбеди тир икьрар.
20Исмаилан патахъай ви тӀалабунни За фикирдиз къачуна: За адазни хийир-дуьа ийида, адан тухумни бегьер гудайди ийида ва адаз гзаф несилар гуда.
Исмаилалай цӀикьвед регьбер аладда, адакай чӀехи халкьдин бан-буба жеда.
21Амма Зи икьрар Сарради ваз са йисалай, гьа и вахтунда хадай, Исакьахъ галаз жеда».
22Ибрагьимаз гьа икӀ лагьана, Аллагь хъфена.
23Лап гьа и юкъуз Ибрагьима Аллагьди вичиз эмир авурвал вичин хва Исмаилан, вичин кӀвале ханвай вири итимрин, гьакӀни пулунихъ маса къачунвай вири лукӀарин эркеквилин лишан суьннет авуна – кӀвале авай вири итимрин. Ада вичиз эмир авурвал вири кьилиз акъудна. 24Ибрагьим суьннет авур чӀавуз адан кьудкъанни цӀекӀуьд йис тир, 25Исмаилан, адан хцин, цӀипуд йис. 26Гьа са юкъуз гьам Ибрагьим, гьам адан хва Исмаил, 27гьамни Ибрагьиман кӀвале авай кьван вири итимар – гьам хайи йикъалай адан кӀвалинбур тир, гьамни маса тайифайривай маса къачунвай лукӀар, – вири суьннет авунай.
Zur Zeit ausgewählt:
Хьунухь 17: ЛезПК
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Институт перевода Библии, 2010-2024
