Хьунухь 16
16
Гьагар ва Исмаил
1Сараяз, Ибраман папаз, аялар жезвачир. Адаз Мисридай тир Гьагар тӀвар алай къаравуш авай.
2Сарая Ибрамаз лагьана: «Реббиди заз аялар гузвач. Зи къаравушдихъ галаз хьухь – белки ада кьванни заз хва хада».
Ибрам Сараян чӀалаз килигна, 3адани вичин къаравуш, Мисридай тир Гьагаракай адаз кьвед лагьай паб авуна. А чӀавуз Ибрама Къенанда уьмуьр тухуз цӀуд йис хьанвай.
4Ибрам Гьагарахъ галаз жез хьана, ам руфунал залан хьана ва и кар себеб яз вичин ханумаз лавгъавилелди килигиз хьана. 5«Зун ажуз хьун вавай я, – лагьана Сарая Ибрамаз. – За жуван къаравуш вав кьвед лагьай паб яз вугана, ам лагьайтӀа, руфунал залан хьайидалай кьулухъ, заз кьама ял аваз килигзава. Реббиди зини ви ара гьялрай». 6«Ви къаравуш ви гъиле ава, – жаваб гана Ибрама. – Ваз гьикӀ хъсан аквазватӀа, гьакӀ ая».
Сараяни Гьагараз ахьтин зулумар ийиз хьана хьи, Гьагар адакай катна. 7Кьурумда, Шурдиз фидай рекье ам чешмедин патав Реббидин Малаикдиз жагъана 8ва хабар кьуна: «Гьагар, Сараян къаравуш, вун гьинай я ва гьиниз физва?» «Зун зи ханум Сараякай катзава», – жаваб гана ада.
9Реббидин Малаикди лагьана: «Ахлад жуван хануман кьилив ва адаз муьтӀуьгъ хьухь. 10За ви несилар кьадардиз акьван артух ийида хьи, абур гьич гьисабизни жедач.
11Вун руфунал залан я.
Ваз хва жеда.
Адал Исмаил#16:11 Исмаил – чувуд чӀалалди «Аллагьдиз ван хьая». тӀвар эциг,
ви бедбахтвилера Реббидиз ви ван хьайивиляй.
12Хва ви жеда хам лам хьтинди,
ам виридал – вири адакай.
Стхайрихъ галаз къал-макъалра аваз уьмуьр тухуда ада».
13Вичихъ галаз рахай Реббидиз Гьагара ихьтин тӀвар гана: «Вун Эл-Руи#16:13 Эл-Руи – чувуд чӀалалди «вири аквадай Ребби». я», вучиз лагьайтӀа ада лугьудай: «Заз зи вилералди зун яргъай Аквазвайди акуна!»
14Гьавиляй къуйдиз Беэр-Лахай-Руи#16:14 Беэр-Лахай-Руи – чувуд чӀалалди «заз аквазвай Чан алайдан къуй». лагьана тӀварни ганва. Ам Къадешдинни Береддин арада ава.
15Гьагара Ибрамаз хва хана, ва Ибрама адал Исмаил тӀвар эцигна. 16А чӀавуз Ибраман кьудкъанни ругуд йис хьанвай.
Zur Zeit ausgewählt:
Хьунухь 16: ЛезПК
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Институт перевода Библии, 2010-2024
