Хьунухь 14
14
Ибрама Лут азад хъувун
1Шинардин пачагь Амрафела, Элласардин пачагь Ариуха, Эламдин пачагь Кедарлагамера ва Гайимдин пачагь Тидгала агъавал ийизвай девирда 2-3дяве кьиле фенай: абуру, чпин аскерар Сиддим дереда, алай вахтунда адаз УькӀуь гьуьл лугьузва, кӀватӀна гьазур хьанвай Садумдин пачагь Берадихъ, Гамурадин пачагь Биршадахъ, Адмадин пачагь Шинабахъ, Цевайимдин пачагь Шемеберахъ ва вичиз гила Сагар лугьузвай Беладин пачагьдихъ галаз женгиниз экъечӀна. 4ЦӀикьвед йисуз абур Кедарлагамеран зулумдик квай, цӀипуд лагьай йисуз адаз акси яз экъечӀна, 5цӀукьуд лагьай йисуз Кедарлагамер вичин терефдарарни галаз атана акъатна. Абуру Аштарат-Къарнайимда рефаяр, Гьамда зузар Шаве-Къирйатайимда эмияр, 6ва чпин дагълух Сеир тӀвар алай уьлкведа кьурумдин къерехдив гвай Эл-Парандал кьван гьурияр кӀаник кутуна. 7Анайни абур вичиз гила Къадеш лугьуз Эн-Мишпат галайвал элкъвена ва амалехъийрин чилер ва Гьасесан Тамарда уьмуьр тухузвай амарияр барбатӀ авуна. 8Садумдин пачагь, Гамурадин пачагь, Адмадин пачагь, Цевайимдин пачагь ва адаз гила Сагар лугьузвай Беладин пачагь къаршидиз экъечӀна ва Сиддим дереда абурухъ галаз женг чӀугуна – 9Эламдин пачагь Кедарлагамерахъ галаз, Гайимдин пачагь Тидгалахъ галаз, Шинардин пачагь Амрафелахъ галаз, Элласардин пачагь Ариухахъ галаз. Кьуд пачагьди вадахъ галаз женг чӀугуна. 10Сиддим дереда лагьайтӀа, чеб къирдив ацӀанвай гзаф фурар авай. Садумдинни Гамурадин пачагьрин аскерар кьулухъди катна ва и фурара акӀана. Сагъ-саламат яз амукьайбур дагълариз катна. 11Гъалиб хьайибуру Садумдинни Гамурадин вири девлетар, абурун недай вири суьрсетар чпиз вахчуна хъфена. 12Абуру гьакӀ вич Садумда уьмуьр тухузвай Ибраман стхадин хва Лутни кьуна чпихъ галаз хутахна ва адан вири мал-девлетни тарашна.
13Хилас хьайибурукай сад амарийрин Мамредин мегъуьн тамун патав уьмуьр тухузвай иври Ибраман кьилив атана, хьанвай крарикай ихтилатна. Стхаяр тир Мамре, Эшкал ва Анер Ибрамахъ галаз икьрардин алакъайра авай. 14Хтул есирвиле гьатнавайди чир хьайи Ибрама вичин итимар кӀватӀна – чеб гьадан кӀвале ханвай пуд вишни цӀемуьжуьд кас – гуьгъуьниз чукурна. Дандин патарив, 15йифиз, ада душманар элкъуьрна кьуна, абур тергна ва лап Шамдин кеферпата авай Хабадал кьван абур хурук кутуна чукурна. 16Ада душманривай абуру кьунвай вири девлетар къахчуна – гьам Лутни адан мал-девлет, гьам папар, гьамни есирар.
17Ибрам Кедарлагамеранни адан терефдаррин винел гъалибвал къачуна элкъвена хкведай чӀавуз, Шаве дереда (адаз исятда Пачагьдин дере лугьузва) адан вилик Садумдин пачагь экъечӀна.
Мелик-Садикьа Ибрамаз хийир-дуьа ийизва
18Салимдин пачагь, виридалай вине авай Аллагьдин къуллугъдар Мелик-Садикьа, Ибраман вилик фуни чехир гъана 19ва адаз ихьтин гафаралди хийир-дуьа авуна:
«Виридалай вине авай Аллагьди Ибрамаз хийир-дуьа авурай,
Цаварни чилер халкь авурди!
20Шукур хьурай виридалай вине авай Аллагьдиз,
Вичи ви душманар ви гъиле вугай!»
Ибрама гъиле гьатай шейэрин цӀудай са пай Мелик-Садикьаз гана.
21Садумдин пачагьди Ибрамаз лагьана: «Зи итимар вахце, гъиле гьатнавай мал-девлет жуваз тур». 22Ибрама жаваб гана: «Реббидал, виридалай вине авай Аллагьдал, гъилер туькӀуьрна за кьин кьазва хьи, 23ви мал-девлетдикай артух за са затӀни къачудач – я са гъал, я са шаламдин чӀул.
Ахпа лугьумир: „Им зун я, Ибрам девлет авайди авурди“. 24Заз, анжах са зи итимриз тӀуьнин суьрсет хьайидалай гъейри, мад са затӀни герек туш. Захъ галаз санал женгиниз экъечӀайбур вуж ятӀа, гьабурув чпин пай агакьрай, – Анерав, Эшкалав ва Мамредив».
Zur Zeit ausgewählt:
Хьунухь 14: ЛезПК
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Институт перевода Библии, 2010-2024
