Khuurakikha 36

Lisaaye lya Esawu

1Lino nilyo lisaaye lya Esawu (alala isi balaanga bari Edomu). 2#Rak 26.34Esawu aayila baakyelama khukhwaama mu bakhasi be linaambo lya Kanaani, nga nibo Ada, umukhaana wa Eloni umu Hiti, ni Oholibama, umukhaana wa Ana, naluundi umwitsukhulu wa Zibeyoni, umu Hivi, 3#Rak 28.9waayila ni Basemasi, umukhaana wa Ishimaeli, umukooko wa Nebayosi. 4Ada waasaala Elifazi; Basemasi waasaala Rewuweli; 5Oholibama waasaala Yewushi, Yalamu, ni Kora. Bano nibo basooleli ba Esawu babaasaalikhila mu shibala sha Kanaani.

6Lwanyuma Esawu waayila baakyelama beewe, ni basooleli beewe, ni bakhaana beewe, atweela ni babaandu boosi babaaba be muungo mweewe, ni khuutubakho ni bibyaayo byeewe, ni bisolo byeewe bibiindi, ni bye buyiindifu byeewe byoosi, byeesi aafuna nga ali mu Kanaani, wahaamba lukyeendo waatsya mu shibala she aleeyi, awukhane ni waandaaye Yakobo. 7Byaba biryo lwekhuuba bye buyiindifu byeesi baaba ni nabyo byaba biikali naabi, byaalekha khubanyalisisa khuumenya atweela ta. Liloba khweesi baaba bamenya lyaba likyeekhe naabi nga si banyala khukhwaayisilakho bibyaayo byaabwe boombi ta. 8Aryo kila Esawu (nga niye Edomu) enyukhawo waatsya khuumenya mu shibala sha Seyiri.

9Luno nilwo luruungo lwe lisaaye lya Esawu, nga niye uwaba umukuuka umukhulu uwe ba Edomu, babaamenyatsaka mu shibala she tsingoongo sha Seyiri. 10Kamasiina ke basooleli ba Esawu niko kano: Elifazi nga niye umusooleli isi Esawu aasaala n'umukyelama weewe Ada, Rewuweli nga niye isi Esawu aasaala n'umukyelama weewe Basemasi 11Basooleli ba Elifazi baaba nibo bano: Temani, Omari, Zefo, Gatamu, ni Kenazi. 12Elifazi umusooleli wa Esawu aafunayo umukhasi ukuundi uwe bulafu, abe isi balaanga bari Timuna, waasaala ni naye umusooleli ukuundi Amaleki. Bano boosi baaba babetsukhulu ba Ada, umukyelama wa Esawu. 13Basooleli ba Rewuweli baaba nibo bano: Nahasi, Zera, Shama, ni Miza. Bano boosi baaba babetsukhulu ba Basemasi, umukyelama wa Esawu. 14Basooleli beesi Esawu aasaala ni Oholibama, umukhaana wa Ana, naluundi umwitsukhulu wa Zibewoni, baaba nibo: Yewushi, Yalamu ni Kora.

15Be mu lisaaye lya Esawu babaaba baawuli nibo bano: Basooleli ba Elifazi, uwaba umusooleli wa Esawu umukhulu baaba: Temani, Omari, Zefo, Kenazi, 16Kora, Gatamu, ni Amaleki. Bano nibo babaaba baawuli babaarura muunda mwa Elifazi, mu shibala sha Edomu, nga boosi baaba babetsukhulu ba Ada. 17Basooleli ba Rewuweli, uwaba umusooleli wa Esawu, baaba Nahasi, Zera, Shama, ni Miza. Bano nibo babaaba baawuli babaarura mu Rewuweli, mu shibala sha Edomu, nga boosi baaba babetsukhulu ba Basemasi, umukyelama wa Esawu.

18Basooleli ba Oholibama, umukyelama wa Esawu, baaba nibo bano: Yewushi, Yalamu, ni Kora. Bano baaba baawuli babaarura mu Oholibama, umukyelama wa Esawu, umukhaana wa Ana. 19Bano boosi baaba basooleli ba Esawu (nga niye Edomu), ni naabo nibo babaaba baawuli baabwe.

Lisaaye lya Seyiri

(1 Kim 1.38-42)

20Kano niko kamasiina ke basooleli ba Seyiri, uwe mu shikuuka sha Hori, babaaba nga bamenya mu shibala isho: Lotani, Shobali, Zibewoni, Ana, 21Dishoni, Ezeri, ni Dishani. Bano nibo basooleli ba Seyiri babaaba be mu shikuuka sha Hori nga baawuli, nga abe bamenya mu shibala sha Edomu.

22Basooleli ba Lotani baaba nibo Hori ni Hemani. Lotani aaba n'umukooko weewe abe bari Timuna.

23Basooleli ba Shobali baaba nibo bano: Aluvani, Manahasi, Ebali Shefo, ni Onamu.

24Zibewoni aaba ni basooleli babili nga nibo bano: Ayiya, ni Ana. Ana yuno niye uwafumbula tsisebele tse kameetsi kamakhafu mu mubiimbi, nga n'aba aayisa kamasheese ka paapawe Zibewoni. 25Naye Ana aaba ni babaana babili nga nibo umusooleli weewe Dishoni, n'umukhaana weewe Oholibama. 26Basooleli ba Dishoni baaba nibo Hemudani, Eshibani, Isurani, ni Kerani.

27Basooleli ba Ezeri baaba nibo, Biluhani, Zavaani, ni Akani.

28Dishani aaba ni basooleli babili, nga nibo Uzi ni Arani.

29Bano nibo baaba baawuli khukhwaama mu shikuuka Hori: Lotani, Shobali, Zibewoni, Ana, 30Dishoni, Ezeri, ni Dishani. Bano boosi nibo baawuli be mu shikuuka sha Hori, khuutsiila khu bukuuka bwaabwe bukyeekhe mu shibala sha Seyiri.

Baawuli ba Edomu

(1 Kim 1.43-54)

31Babeelakho bano nibo bayiinga babaawula mu Edomu, nga ishiili khuubawo umuyiinga yeesi uwula mu Isiraeli ta.

32Bela umusooleli wa Beyori ekyela umuyiinga wa Edomu. Lisiina lye shiriimba sheewe abe bari Dinihaba.

33Bela n'amala khuufwa, Yobabu umusooleli wa Zera, khukhwaama i Bozira, waamwiilila mu bikyele byeewe nga umuyiinga.

34Yobabu naye n'amala khuufwa, Hushamu khukhwaama mu shibala she ba Temani, waamwiilila mu bikyele byeewe nga umuyiinga.

35Hushamu n'amala khuufwa, Hadadi umusooleli wa Bedadi, uwawula ba Midiyani mu busoolo mu shibala sha Mowabu, waamwiilila mu bikyele nga umuyiinga. Lisiina lye shiriimba sheewe abe bari Avisi.

36Naye Hadadi n'amala khuufwa, Samula khukhwaama i Masireka, waamwiilila mu bikyele nga umuyiinga.

37Samula naye nga waafwiile, Shawulu khukhwaama i Rehobosi, shishaba khu ndulo khwe luluutsi Efurati, waamwiilila mu bikyele byeewe nga umuyiinga.

38Shawulu naye n'amala khuufwa, Baali-Hanani, umusooleli wa Akubori, waamwiilila mu bikyele nga umuyiinga.

39Naye Baali-Hanani umusooleli wa Akubori nga waamalile khuufwa, Hadari waamwiilila mu bikyele byeewe nga umuyiinga. Lisiina lye shiriimba sheewe abe bari Pawu, n'umukhasi weewe abe baamulaanga bari Mehetabeli, umukhaana wa Maturedi, umwitsukhulu wa Mezahabu.

40Ari kakeelakho kano niko kamasiina ke baawuli be mu bikuuka bya Esawu, khuusiintsiila khu tsiingo tsaabwe, ni bukuuka bwabwe bukyeekhe, ni biifwo byeesi baamenyatsakamwo: Timuna, Aluva, Yesesi, 41Oholibama, Ela, Pinoni, 42Kenazi, Temani, Mibuzari, 43Magudiyeli, ni Iramu. Bano nibo baawuli ba Edomu (nga niye Esawu, uwasaala ba Edomu), khusiintsiila khu bifwo byaabwe mweesi baamenyatsakamwo mu shibala isho.

Zur Zeit ausgewählt:

Khuurakikha 36: LCE

Markierung

Kopieren