Piilimka 4
4
1Adam yaa goa ale wa powa Iiv ate wa yik lɔgi a biak Keen. Iiv yaa weeni ayen Naawen maarika nyiŋ wa biak ka nidoa. 2Ku ŋaaŋnyiŋ wa yaa biak Keen yoawa Abel. Abel a jam a wuuk ka piisa alege Keen a kpa. 3Ku yaa jam paari diipo ate Keen yaa ta wa kpanni ŋanta gela jam ayen wa te Naawen. 4Abel mɛ ko wa pai ŋaai ate wa piisaŋa a liŋ biak la a yaa ta kab tii ale ta kpaam la jam ayen wa te Naawen. Naawen yaa tuesi Abel tiirimu 5alege zɛri Keen tiirimu. Dila nyiŋ Keen sui yaa puuri ale kaasi nina.
6Naawen yaa bek Keen ayen, <<Ka boa ale soa ate fi sui a puuri? Ka boa le soa ate fi kaasi nina? 7Fi dan nye dii ale magsi la, m ti a siak kama, alege fi dan kan nye dii ale magsi la, be seba ale biem ale a yaali ayen bu jo fu. Bu a yaali ayen bu nya ka pagrim fi zuk, alege ku a fɛ ate fi nya pagrim biem zuk.>>
8Keen yaa weeni wa yoawa Abel ayen, te ti nyini a cheŋ peelim. Ba ale cheŋ la Keen yaa nak wa yoawa Abel a ko.
9Naawen a yaa bek Keen ayen, <<Fi yoawa Abel bo ka bɛ?>> Keen yaa tulisi ayen, <<Mi a zɛ. Ka mi ale chim yoawa nyaarɔ?>>
10Naawen yaa weeni ayen, <<M nya fi ale ko fi yoawa la kama. Wa ziimu ale siŋ tɛŋka la a weeni mu kama ayen m namsi fu. 11Yɔgyɔgla de mi ka te tɛŋka kama. Tɛŋka abe tuesi fi yoawa ziimu kama. 12Fi dan kpa fi kan nya jaaboa. Fi le kasim a nyiem tɛŋka meena, fi kan nya jigi a vuusi.>>
13Keen yaa weeni Naawen ayen, <<M ninammu a zuak ka yega a gaam m le baga tu. 14Jinla fi yiak mu a basi kama, fi be kan bo ale mu. M le kasim a nyiem ka tɛŋka meena a ka jigiya a vuusi. Waai a dan nya mu wa a ko mu kama.>>
15Alege Naawen yaa weeni wa ayen, <<Daa di, waai a dan ko fu wa le nya ku tutuna naŋtuok nɔi buyopɔi.>> Naawen yaa dueni daana wa nyiŋ ate waai a dan nya wa abe wa kan ko wa. 16Keen yaa basi Naawen ale cheŋ ga bo Nod tɛŋka. Nod a bo ka Eden kori geŋ.
17Keen yaa goa ale wa powa ate wa yik lɔgi a biak Ɛnok. Dila po Keen jam a sɛ ka tɛŋ kpieŋ ate wa yaa pai wa nidoabinni yuenni a te tɛŋka a wi ayen Ɛnok. 18Ɛnok yaa jam biak Irad, ate Irad a biak Meyujael, ate Meyujael a biak Metusael, ate Metusael a biak Lamek.
19Lamek jam faari ka nipooba baye. Wanyi yuei jam le Ada, m wala yuei jam le Zilla. 20Ada jam biak ka Jabal. Jabal jam ka baai ale jam a wuuk duŋsa ale a goa viita po la ko. 21Wa yua yuei jam le Jubal. Jubal jam ka baai ale a yaali kpanta nakka ale paampuuŋta peeka la ko.
22Zilla mɛ a jam biak ka nidoabili a te wa yuei ayen, Tubal Keen. Tubal Keen a jam ka choabiik. Wa jam ta ka toa, wa yuei ale Naama.
23Lamek yaa jam weeni wa pooma Ada ale Zilla ayen ni wom dii ate m ta la. Nuru ale jam te mi tuem ate mi a ko wa. Wa jam diem ka bi paaluk ate mi ko wa, wa le te mi tuemu la. 24Keen a dan a nya tutuna naŋtuok nɔi buyopɔi, dan ka di Lamek le nya ka naŋtuok nɔi pisiyopɔi ale buyopɔi.
25Adam yaa ŋman goa ale wa powa ate wa biak nidoabili ate ba te wa yuei ayen Sɛti. Ba jam weeni kama ayen Wen ŋman te ba ka biik ate wa tagri Abel ate Keen ko la zuk. 26Sɛti mɛ a biak nidoabili a te wa yuei ayen Enos. Dila powa ate nuruba yaa jam piilim a puusi Naawen yuei.
Zur Zeit ausgewählt:
Piilimka 4: BWU
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2023, Ghana Institute of Linguistics, Literacy and Bible Translation