Югьан 9
9
Курди бабкан гъашир сагъ апӀуб ва уьрхюб
1Рякъди гъягъюрайи Исайиз, бабкан гъашихъанмина кур вуйи сар кас рякъюру.
2– Мялим, му гьаз кур вуди бабкан гъахьну? – гьерхру Дугъхьан ученикари. – Шли гунагь гъапӀну: мугъу чав, даршиш мугъан абйир-бабари?
3– Я мугъу, ясана мугъан абйир-бабари гунагь ляхин гъапӀундар, – жаваб туву Исайи. – Мугъан курвал гьаддиз вуки, Аллагьдин кьувват гьаддиинди улупбан бадали. 4Сабан йигъ имиди ухьу Гьадгъан, Узу Гьаурин ляхнар дапӀну ккунду. Гьамус йишв хьибди, гьадмуган сарихьанра лихуз хьибдар. 5Сабан Узу дюнʼяйиъ имиди, Узу дюнʼяйиз акв вуза.
6Гьамци дупну, Исайи жилʼина туту гатӀабхьну, шурш ругдик кибикьну, гьадму батӀур, кур вуйирин уларикан ктатуру 7ва кӀуру:
– Душну Силам (му «гьаънайир» кӀуру гаф ву) дагрик яв маш жибкӀ. Думу гъягъюру, жикӀуру ва, рябкъюз хъюгъну, хътакуру.
8Думу садакьа ккун апӀури дяркънайи дугъан гъуншйири ва жара адмийири кӀури гъахьну:
– Фици? Му гьаму адми, садакьа ккун апӀури деънайир даринхъа?
9– Ав, му гьадму ву, – жаваб тувуйи садари.
– Ваъ, думу гьаци, гьадгъахъна гъушур ву, – кӀуйи жарадари.
– Му гьякьди узу вуза, – гъапнийи чав гьадму адмийи.
10– Хъа увуз фици рябкъюри гъабхьунвуз? – гьерху дурари.
11– Иса ччвур али сар адмийи йиз уларикан батӀур кадатну, «Душну Силам дагрик яв маш жибкӀ», гъапунзуз. Узу гъушунза, гъижибкӀунза ва рябкъюз хъюгъюнзуз, – жаваб туву дугъу.
12– Наши Думу? – гьерху дурари.
– Аьгъдарзуз, – гъапи сагъ гъашири.
13Гьадму адми, улихьнаси кур вуйир, фарисйирихьна хъади гъюру.
14Хъа Исайи курин улар сагъ гъапӀу йигъ султ йигъ вуйи. 15Фарисйирира дугъхьан, дугъан улар фици сагъ гъахьнуш, гьерхру.
– Дугъу йиз уларикан батӀур ктатну, узу машар гъижикӀунза ва гьамус рябкъюразуз, – жаваб туву дугъу.
16– Думу Адми Аллагьдихьан хьуз мумкин дар, гьаз гъапиш Дугъу султ йигъандин аьдат уьбхюрадар, – кӀури, гьадмуган аьрз гъапӀу фарисйирикан садари.
– Гунагькар касдихьан мицдар аьламатар апӀуз шулинхъа? – кӀуйи тмундари.
Ва гьамци, фарисйирин арайиъ гьюжат абхъру. 17Курди гъаширихьан хъана гьерхру:
– Уву кӀурава, Дугъу увуз рябкъювал тувну. Яв хиялиан Думу Фуж ву?
– Пайгъамбар, – жаваб туву дугъу.
18Жугьдарин агъсакълариз адми кур вуди хьувалихъ ва дугъахьна рябкъювал кьяляхъ гъювалихъ гьапӀнура хъугъуз ккунди адайи. Гьаддиз рябкъюз хъюгъюрин абйир-бабариз дих дапӀну гьерхру:
19– Му ичв бай вуйин? Учву кӀурачва, думу кур вуди бабкан гъахьну. Хъа фици дугъаз гьамус рябкъюра?
20– Учуз му ич бай вуйиб аьгъячуз ва кур вуди бабкан гъахьибра аьгъячуз, – жаваб туву абйир-бабари. – 21Хъа гьамус дугъаз фици рябкъюраш ва шли дугъаз рябкъювал тувнуш, гьамунуб учуз аьгъдарчуз. Чахьан гьерхай. Думу аьхюр ву, чахьан ктибтуз шулуки.
22Абйир-бабари, жугьдарин гьякимарихьан чпиз гучӀруган, гьамциб жаваб тувнийи. Фицики дурари, Иса Месигь ву кӀури хъугърур гьарсар мистхьан ярхла апӀуз кьарар адабгънайи. 23Гьаддиз дугъан абйир-бабари:
«Сарун думу аьхюр ву, чахьан гьерхай», – гъапнийи.
24Ва магьа кьюбпи ражарира, кур вуди гъаши адмийиз дих дапӀну, дугъаз кӀуру:
– ГьякьтӀан пидарза дупну, ху апӀин! Учуз аьгъячуз Гьадму Кас гунагькар вуйиб.
25– Узуз Думу гунагькар вуйин-дарин аьгъдарзуз, – жаваб туву дугъу. – Саб аьгъязуз: узу кур вуйза, хъа гьамус рябкъюразуз.
26– Дугъу увкан гьапӀну? – хъана гьерху дурари. – Дугъу яв улар фици арццну?
27– Узу учвуз гъапунзачвуз, хъа учвуз хъпехъуз ккун гъабхьундарчвуз, – жаваб туву дугъу. – Учвуз сабансана хъпехъуз ккунди айчвуз? Гьаяман, учвузра Дугъан ученикар хьуз ккундашалчвуз-гьа?
28– Дугъан ученик уву вува-гьа, – кӀури хъжагъуру дурар дугъаз. – Хъа учу Мусайин ученикар вуча. 29Учуз Аллагь Мусайихъди гъулхуб аьгъячуз, хъа Думу наънан гъядяхъюр вушра, аьгъдарчуз.
30– Мюгьтал шлу ляхин вуки, учвуз Думу наънан вуш аьгъдарди хьуб, хъа Дугъу узуз рябкъювал тувунзуз, – жаваб вуди гъапи думу адмийи.
31– Хъа ухьуз аьгъяхьуз Аллагь гунагькрарихъ хъпебехъруб, хъа анжагъ гьадрарихъди хъа Думу: Чав ккун гъапӀдарихъди ва Чан ниятар тамам апӀрударихъди. 32Дюнʼя ккебгъхъанмина гъеебхьуб дархьуз, сар шли-вуш бабкан шлугантӀан кур вуйириз рябкъювал тувуб. 33Эгер Думу Аллагьдихьан гъафир дайиш, Дугъхьан фукӀара мициб апӀуз хьибдайи!
34– Уву, вари гунгьариъди бабкан гъашири, гьамус учуз улупурана! – кӀури, вари дугъʼина алжагъуру ва думу утӀурккуру.
35Исайиз думу утӀурккуваликан аьгъю шулу ва, дагну, гьерхру:
– Уву Инсаниятдин Балихъ хъугърана?
36– Йиз аьхюр, йип Думу Фуж вуш, узу Дугъахъ хъугъдиза, – гъапи дугъу.
37– Увуз Думу гъяркъюнвуз ва магьа Дугъахъди гафарра апӀурава, – кӀуру дугъаз Исайи.
38– Хъугъурза, Агъа! – дупну, думу Дугъан улихь, кьамкьариина ис духьну, икрам апӀуру.
39Исайи гъапи:
– Узу му дюнʼяйиз дярябкърайидариз рябкъри дупну, хъа рябкъюрайидар кур хьпан бадали, суд апӀуз дуфнайир вуза.
40Исайин багахь дугъужвнайи фарисйири Дугъаз кӀуру:
– Саки Уву учура кур вуйидар гьисаб апӀурадарва аьхир?
41Исайи жаваб туву:
– Эгер учву кур вуйидар вуйиш, учву апӀурайи гунгьариъ ичв тахсир адархьидийи; хъа учву кӀурачва: «учуз рябкъюрачуз», гьаддиз ичв гунагь учвʼин гъубзра.
Zur Zeit ausgewählt:
Югьан 9: ТабГК
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Институт перевода Библии, 2010, 2013, 2016, 2018, 2023
