Marku 5
5
Nat jum le hkat pyam e
1Ahkwi hau nawng he-hpaw ma Gerase bang mung hpyang yang maw je kaw e.
2Yang gë, lai mai htaw law e hkun-jang, a-joi-a-yung e nat dap e byu ra yu lup-dung mai htaw law lwi, Yang le te-yu e.
3Hau yu a ni jang gë, lup pe ma ngut lwi e, aw ngut-kaw-lang, yang le sham taw twi e lang, a waw twi taw.
4Hka-su-mu-ga-le, hki kyum e sham taw twi e, myaw myaw ling yang le twi taw kaw-lang, sham taw twi le lang hpit pyam lwi, hki kyum le law-hkyawp-law-nyang pyam lwi e, aw ngut-kaw-lang, yang le me-yu ra wum a baw kaw.
5Ni-wi-min-wi hka nam le hau lup pe bum pe hka ni wun lwi, puk i-jang yang gung-du le lu-gawk e zan-che ni ra.
6Yesu le we we mai byu myang jang, yang din e lwi Yang le pai le e, “Myang dik e Karai Kasang yang zaw Yesu e, ngaw Nang e hai tu le hta?”
7“Nang ngaw le a zing-ri shang ga, Karai Kasang jang ngaw Nang le dung taw le,” ga lwi, hte maw e puk e.
8Hka-su-mu-ga-le, Yang gë, “a-joi-a-yung nat nang e, hau yu jang mai htaw law a!” ngu lwi, yang le tai taw poi be.
9Yesu gë, “Nang e ming hai ngut le hta?” ga lwi, yang le mi jang. Yang gë, “Nga maw myaw myaw ngut le mu, nga e ming Legu ngut le,” ga lwi, Yang le tu e.
10Hau htaw ma, hau mung mai yang maw le a hkat pyam shang ga, yang Yesu le gyai ju-dung e.
11Ahkwi hau bum hki pe ma wa jum maw but zaw ni akaw.
12Hau mu lwi nat pe gë, “Nga maw hau wa pe jang waw wang shang ga, nangkat kaw la,” ga lwi, Yang le dung kaw e.
13Hau hkun Yang yang maw le ahkang bi kat e, a-joi-a-yung nat pe kum gë, htaw law lwi, wa pe jang wang e ngut mu, wa jum gë, hau gam-kum mai nawng shut din wang lwi, nawng ma myaw-shi byu kaw e. Hau wa pe gë, i tung kaw ngut akaw.
14Wa zung bang kum gë, hpang-law lwi, hau wa e mau-hka hau hkyaw tai kyaw kaw e. Hau hkun hau su dut law e hkyaw le wu wu ra, yang maw htaw e-law kaw e.
15Yang maw Yesu jang je le, Legu lawm e nat dap e su gë, me-bu wut lwi hë hpyang ma e i-mit bun ging lwi zung taw e le, yang maw myang kaw e ngut mu, gyu-dan byu kaw e.
16Hau hkyaw le myang e bang le, hau nat dap e byu e wa pe hka-su dut law e le, yang maw le lawm tai kyaw kaw e.
17Hau mu lwi, yang maw e mau-hkyaw mai htaw law ra hkyaw le, Yang le chawm-ju dung kaw e.
18Hau lai ma wang le Yang e ra-ha ni ra ga, hë hpyang nat dap su gë, Yang le ju-dung e.
19Yang lum ahkang a bi e za. “Nang yum ma bang e nang bin-chang wi jang dum law lwi, Hau yum-sing nang le hka-myaw wa karum lwi, shaw-gyaw e le law tai kyaw a!” ga lwi, yang le tai kat e.
20Hau yan-mai yang htaw law lwi, Yesu Yang le hka-myaw wa karum be e le Dekapoli mau ma tai kyaw lwi, lung-lang bang mau-ba bum kaw e.
Yesu le Ya-iru wut yu e
21Ahkwi Yesu gë, lai ma he-hpaw shut dum gu-dap law hkun, byu jum maw Yang jang le mung kaw e. Yang gë, hau nawng yam ma ni taw le.
22Han hkun, tara jawng a-gi pe ma, Ya-iru ngu su byu ra yu je le lwi, Yang le myang jang Yang e hki wang ma hki-hput-htu mu,
23“Nga mi-we-zaw ti su shi law ni a-be. Yang ge law lwi, dwi ni shang ga, yang e a-htaw ma law ke bi ra, le je a!” ga lwi, Yang le gyai gyai ju-dung e.
24Hau mu lwi, yang e ra-ha e-law e. Byu lajum maw le Yang jang chang bum lwi, yang maw gë, Yang le zang shaw jin-jap kaw e.
Swi yut yut naw e mi-we-zaw le law ge bi e
25Ra htse i zan swi yut yut naw e mi-we-zaw ra yu le lawm ni ra.
26Yang gë, chi sara-maw myaw myaw e law ma a-shaw-a-wi myaw myaw hwi le e, yang waw ma waw lung-lang le ban hpyu yam kaw-lang, ra zwi le a waw ge, je je wi law e.
27Yang gë, Yesu e hkyaw le waw gyaw jang, hau shiwa-hpung hkau yam htang ma e-je lwi, Yang e me-bu le sawp e.
28Hka-su-mu-ga-le, yang gë, “Yang e me-bu le za lang, ngaw waw sawp le gë ngaw ge law ra,” ga e.
29Hau hkun-jang yang e swi yut kan byu law lwi, yang e a-na ge byu e le yang gung se be.
30Yesu gë, yang jang ma e wum-aw htaw law e le, Yang e i-mit ma hau hkun-jang se e mu, hau shiwa-hpung hpyang ling law u-jang, “Nga e me-bu le, aw sawp kaw e hta?” ga lwi, mi e.
31Hau mu lwi, Yang e lagyaw pe. “Shiwa byu pe Nang le jin-jap nyam shaw dut e le Nang myang taw lwi e, ‘Ngaw le aw sawp akaw?’ ga ashi nung li?” ga lwi, Yang le tu kaw e.
32Yang yu gë, hau a-mu kut e mi-we-zaw le byu-wu ra ma-tu, ling-wu ni e.
33Hau mi-we-zaw kum gë, yang jang dut law e a-mu le se mu, gyu-nan u-jang hwi le lwi, Yang e hë ma hki-hput-htu lwi, yang e hkyaw lung-lang teng e hkyaw za tai kyaw e.
34Yang jau gë, “Mi-we-zaw e, nang e lum e i-mit gë, nang le law ge bi be. Ngwi-ngwi-ngawn ngawn e-law ahkoi! Nang e a-na-ahkya ge shang ga,” ga lwi, yang le tai kyaw e.
Ya-iru yang zaw le dum dwi law nang e
35Yang dang nyaw taw ashi le, tara jawng a-gi e yum ma bang je le lwi “Nung zaw shi byu be. Hau sara le hai mu lwi shitsang ni ashi hta?” ga kaw e.
36Yesu yu gë, hau le tai e dang le hai a ngam mu, “Hka gyu! Lum e i-mit za baw a!” ga lwi, tara jawng a-gi wa le tai kyaw e.
37Hau hkun Petru, Yaku e Yaku e yang-gu Yawhan mai gaw-tu Yang jang chang ra ahkang aw le le a bi.
38Ahkwi hau tara a-gi e yum shut je jang, ki-ki-kyawng-kyawng, ngau-bi-ngau-nap, i-yawn nik nge maw le Yang myang e.
39Yum hkau hpyang wang law lwi, “Nung maw hai mu lwi ki-ki-kyawng-kyawng, ngau-bi-ngau-nap dut ni akaw hta? Zaw-shang gë, shi e a ngut. Yup-ngawn ni e ngut le,” ga lwi yang maw le tai e.
40Yang maw kum gë, Yang le nyap u-jang, wi pyam kaw e. Yesu gë, lung-lang bang le hkat pyam yau jang, hau zaw-shang e yang-nu yaug-wa e, Yang e ra-ha ni e bang le wut yu lwi, hau zaw-shang le taw jang shut wang law kaw e.
41Hau hkun zaw shang e law le Yang zwi taw lwi, “Talihta Kumi,” ga e. Hau su ga e gë, “Zaw mi e! Taw a! Ngaw ngu taw le,” ga e ngut le.
42Hau hkun-jang, Hau zaw-mi gë taw lwi, saw law e. Yang e asak gë, ra htse i zan ngut taw le. Hau mu lwi yang maw gë, gyai gyai mau-ha bum kaw e.
43Hau hkyaw le aw le a se shang ga, Yang yang maw le gyai ga tai taw be. Hau htaw ma zaw-shang le zaw-shu bi ra ma-tu Yang tai taw be.
Zur Zeit ausgewählt:
Marku 5: ATB1951
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© British and Foreign Bible Society 1951
