Jɔn 3

Yeesu ne Nikodeemɔs

1Dɛ Juu tena nomoa bɛl lole baa yerɔ Nikodeemɔs. Dɛ o ɛ Farisii te.#Jɔn 19:39 2Awola bɛl jwaana, o ba Yeesu be dɛ ba ŋɔ o be ŋɔ, “Nomoa, nomɛlbwa jemɔ kɛŋɔ Korowiirii tomɛ ŋɔ hé ba baɡle nɛra wa, dɛkalkɛ dɛ Korowii ta nɛn habɔɔ cheɡaa, waa won ɛ nyokpowaa nɔ haa dɛ ɛ nɔ.”

3Belaa Yeesu chaŋo ŋɔ, “Kasinteŋ, n dɛ ŋɔ he be, nomɛlbwa waa dɛ nyin Korowii Kora la ta dɛ́ ja la, nemenɛ bá berɛ lolɔ ja.”

4Anee Nikodeemɔs pɛɛro ŋɔ, “Nɛn waa kpeɡa la, ɛrɛɛ bá ɛ dɛ́ berɛ won lolɔ jaɔ? Wɛɛ wonoo berɛ jo o nya tea bini ja ásɛ o lolɔ wa aa?”

5Asɛ Yeesu ŋɔ, “Kasinteŋ, n dɛ ŋɔ he be, dɛ ba ta nomɛlbwa lolɛ nee ne Korowii Domadɛɛɡe ne naa, waa Korowii Kora ta jae ba. 6Nɛwɛnyini lola lole, asɛ Korowii Domadɛɛɡe ɡe lola do le. Nɛwɛnyini lola ɛ bwadabii wa, asɛ Korowii Domadɛɛɡe lola ɡe ɛ lileo wa. 7He bɛ ɡel waa maa bola ŋɔ a chɛ kɛ ba berɛ lolɛ heyaa la kpo he nyoa. 8Bela peu aa dɛ nyin laanee o ta dɛɛ kaa. O dɛ ta aa, he dɛ no o ɡbɔɡa kɛ haa on na, haa won jemɛ bela waa lea ne bela waa dɛ kaa. Gɛɛ nomɛlbwa Korowii Domadɛɛɡe aa lolɔ la do. Dɛ o we-ɛɛla laa aa, komɛlbwa toole dɛɛ baɡle kɛ Korowii Domadɛɛɡe lolɔ.”

9Belaa Nikodeemɔs pɛɛro ŋɔ, “Ɛrɛɛ waa nɔ ɛɛ ba ɛɛ dɛ won maɡre ɔ?”

10Anee Yeesu ŋɔ, “Ɛrɛɛ he ɛ Juu tena nomonjen dɛɛ baɡle Korowii Wa, haa wola ɡɛ waa nɔ jemɛ nɔɔ? 11Kasinteŋ, n dɛ ŋɔ he be, waa yaa jema la, ne waa ya sie aa naa la, anee yaa bol, kɛ haa ya be no. 12Aah dɛ maa dɛ bol waa aa lɔ harɛ ta bonɔɔ haa wola men yarada nɔ, dɛ n bol waa aa lɔ Korowii doa aa, ɛrɛɛ hɛɛ ba ɛɛ dɛ won yarada a te nɔ? 13Dɛ Men Nɛn Bie laa aa, nomɛlbwa ta Korowii be nyundua laŋɛ mɔɔ. N ɡboo le o be nyundua dɛ tu ba harɛ.#Sɛɡ 30:4 14Gɛ saŋ ya naawa aa lɔ pua hɛŋle ɡbo harɛ ta la, Korowii keame Mosis la fa kpɔ buni dɛ loɡɛ harɛkon dɛ kpɔ do daa ta dɛ ɡɔɔro ásɛ nɛra nyiŋu dɛ bɛ dɛɛ sewɛ. Gɛɛ a chɛ kɛ ba ɡɔɔ Men Nɛn Bie la.#Kur 21:8-9 15Dɛ ba baa ɡɔɔ mɛ ɡɛ naa, nomɛlbwa waa yarada n waa la, wɛɛ dɔ Korowii mkpa aa wola jaɡa dɔe bwa laanee.

16Korowii dɛ nyin nɛwɛnyini taeh. A waa o ɡel men maa ɛ o Bibeŋkpoŋ ɡbo waa dɔɔ la ba harɛ nɔ ta, ásɛ nomɛlbwa waa yarada n waa la bɛ sewɛ, kɛ ó dɔ o mkpa aa wola jaɡa dɔe bwa la.#Rom 5:8 17Korowii aa tom mɛ harɛ la, o ta ŋɔe ŋɔ ń ba bol he waa dɛ́ pa heyaa bolchɔɡe. Kɛ o tom mɛ ŋɔ ń ba nyin ŋwɛnɛ tɛ heya, ásɛ o won lɛ heya. 18Nomɛlbwa waa yarada n waa la, Korowii aa o waa bol á ba ɛ kɛ wɛɛ di bolchɔɡee. Kɛ nomɛlbwa waa wola n waa yaradae la, Korowii pao bolchɔɡe tonɛ, dɛkalkɛŋɔ o ta o Bibeŋkpoŋ la waa yaradae. 19Ba bolchɔɡe pae munii kɛŋɔ nii waa dɛ chaah bɔr la ba harɛ nɔ ta, kɛ nɛwɛnyini berɔ dɛɛ nyin biro ɡwaa nii la, dɛkalkɛŋɔ ba wobɛlbwa ɛ wechɔɡa. 20Nomɛlbwa waa dɛ ɛ wechɔɡa la, waa bochaah nyin, dɛkalkɛŋɔ o le bochaah ta naa, nɛra ɛɛ na o wechɔɡa laanee. 21Naate waa dɛ ɛ wedɛɛɡa la te, waa bochaah lee ɔmɛ. Wedɛɡ-ɛɛ bɛlbwa dɛ ɛ o waa bochaah ta ásɛ nɛra bwa na dɛ́ jemɛ kɛ o jemɛ Korowii.”

Yeesu ne Jɔn

22A habɔɔ la, Yeesu ne o habɔteŋra la la Juda harɛ ta, asɛ o ka di tɔpera anɛ ba be dɛɛ sɔ nɛra Korowii nee bela. 23Dɛ Jɔn ɡe dɛ sɔ nɛra Korowii nee bwɛɛ bɛl baa dɛ yerɔ Aenɔn o ne Salim aa wola jaŋɛ la ta. Dɛ nee lɔ Aenɔn taeh, asɛ nɛra ɛɛ ba Jɔn be wɛɛ sɔ ba Korowii ne. 24A ɡɛ saŋ la dɛ ba ta Jɔn lawɛ do dea mɔɔ. 25Dɛ nɛra baa teŋɛ Jɔn nɛɛ la ne Juu te bɛl dɛ tɔŋle dɔŋa ba bela Korowii toma waa aa ɛ nɔɔra ne naa sarama ne nee sɔe wa. 26Ba la Jɔn be dɛ ka pɛɛro ŋɔ, “Nomoa, he dɛ lii kɛ he ne baa bɛl fa aa cheɡɛ Jɔɔdan Moo la wee leebɔr pera la aa? O waa he faa bol la. O dɛ sɔ nɛra Korowii ne, asɛ nɛra bwa chwa dɛɛ kaa o be.”

27Belaa Jɔn ŋɔ, “Nomɛlbwa toole dɛ́ won dɔ komɛl dɛ Korowii laa tɛo. 28Maa ŋɔa ŋɔ n laa Kristo la, dɛ ŋɔ tomaa ba tom mɛ ŋɔ ń tɔ o sie la, he ta noɛ yaa?#Jɔn 1:6-8 29Hanfale jaaree dɔ o haah. Kɛ, dɛ hanfale jaa la dam lɔ hanfale la waa bɔr dɛ no o nyoa bela aa, dɛ o sie lɛo. Gɛɛ n ɡe bwara sɔɔh mɛ kohona. 30A chɛ kɛ o sɔn ɛɛ le kohona asɛ n te sɔn ɛɛ ba harɛ.#Mat 3:11

31Nɛn waa le nyundua la ɡwaa nomɛlbwa. Nɛn waa le harɛ bonɔ la, harɛ waa o jemɛ, a waa ɡee o won bola. Kɛ nɛn waa le Korowii be nyundua la te ɡwaa nomɛlbwa. 32Waa o siwi aa naa ne waa waa noa Korowii be laanee wɛɛ bol, kɛ nɛwɛnyini aa o be no. 33Nomɛlbwa sɛh Korowii wa aa, o ɡbaɡba wono dɛɛ jemɛ kɛ Korowii waa dɔ kasinteŋ. 34Nɛn Korowii aa tomɔ la, Korowii wobolee wɛɛ bol, dɛkalkɛ Korowii tɛo o Domadɛɛɡe la tɛɛ tenten. 35Korowii nyin o Bie la taeh, dɛ kpɔ wobɛlbwa kpeɡri do o nɔn ta. 36Nomɛlbwa waa yarada Korowii Bie la waa la, wɛɛ dɔ mkpa aa wola jaɡa dɔe bwaa. Nomɛlbwa waa wola Korowii Bie la waa yaradae la, waa mkpa dɔe ba. Korowii bandia ɛɛ do o nɛɛ saŋ bɛlbwaa.”

Zur Zeit ausgewählt:

Jɔn 3: mzw

Markierung

Kopieren