BINZEN 2
2
1Tsühontse tsang, kazü apentha thyü pen lola. 2Jon tsenyü nyü Sunggigü le a-le thyü kebin tho dan tsü thyü penlo, tson-o rüyü lo. 3Lo Sunggigü le jochü pe jon tsenyü gü geshüo tsü thyü kenshün lo, tsünyü a-le tha rhen penlao a-thonyu rüyü kelo genyu. 4Lo hihontseo tsang kazü nyhun shü.
Eden Chwi Gü
Npugü Sunggigü le tsang kazü thyü kelo ka, 5tehen zonpenyü thatsi nme kazü nyu tsüchwiryü mvuzun, kechamvule a-le tsangkenri nishü kemvu zun genyu, lo kazü günyu lotsü kethyü temi nme-e ndi; 6ai nmha chenchwi ryü kazü gü nchieshü.
7Tson-o Npugü Sunggigü le kazü nyu n nyo khilo njio, tsü pe temi nme rhenshü; lo a-le kerhün teshe hen pe a-yhinkon nyu shü ntsin temi gü le rhün lola.
8Tson-o Sunggigü le Eden nyu npho zin chwi nme thyüshüo a-le rhenkeshü temi gü khipe shüshü. 9A-le senbin kezegwa kechacha kethyü aphu thyü pe no tsünyu yhun-o a-sha kegwa nsha shü. Chwi gü lvunyu kerhün khishü kehü senbin gü lo kegwa lo keshvu shalo kehü senbin ko bin.
10Eden nyu züri nme le tsun pe chwigü ntsen hü; Eden nyen ki tsü le kenjün kho pe züri pezi thyüla. 11Keri gü le Pishon; tsüle tsun-o Havilah kazü gü hun bin nyo. 12(Tsünyu tsü suna kenshün hyu lohü lo ter a-rün kegwa lo tso min ketsen-e hyulo hü.) 13Kenyhun gü le Gihon; tsüle tsun-o Kush kazü gü hun bin nyo. 14Kenshen gü le Tigris, tsüle tsun-o Assiria npho zin tsübin, lo pezi gü le Eufrates.
15Tson-o Npugü Sunggigü le temi gü no Eden chwi gü sen lo tsü khwen lotse pe tsünyu shüshü. 16Lo Npugü le temi gü ka, “Nle chwigü nyu terasha lihi-e tyülo gwa, 17ai nle kegwa lo keshvu shalo kehü senbin gü sha tyü nya, kechagenyumvu le nle tsü tyü keshü nyü si lati,” tsonshü.
18Tson-o Npugü Sunggigü le, “Temi gü no a-npfü yhun kebin le gwamvu. Ale a-zen kengü lo kethyü nme thyü pe a-che shü ti.” 19Tson-o a-le n nyon pe tehen thyü lo tegü dan aphu rhen shü. Tson-o a-le temi gü no shwi shüo a-zan tha lolo tse zen ryü a-ki shü; tsühontseo tsüdan aphu zan tho külo. 20Lo temi güle senru, tegü lo tehenthyü aphu zantha külo; ai tsüdan nme-e a-zen kengüto-o a-che lomvu.
21Tsontsin Sunggigü le temi gü no jüsa güla, lo a-le jü kebin ka a-nyikhon ru nme khilo-o a-shvu keminila. 22Tson-o Sunggigü le temi gü ge khikelo nyikhon ru pe tenunyu nme rhen shüo zenryü temi gü ki shü. 23Tsüselo temi gü le,
“A hontse kethyü nme le hika bin laso--
Aru dan nyu aru, lo athyü dan nyu athyü.
Temi gü gen chwikeryü genyu a-zan
lo pe ‘Tenunyu’ tse koti.”
24Tsügenyu temi le a-pvü lo a-jvü khe la-o a-nunyu zen kengü tin lahü, lo au thyüme thyü tinla hü nyo.
25Tson-o temi gü lo a-nunyu au mihvu nren kenben-e kezha lamvu.
Zur Zeit ausgewählt:
BINZEN 2: REGSBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
