Lukas 11
11
Hitrini Yesu miɗini siiwa
Mat. 6.9-13
1Mefeŋ ktai, Yesu a na fu warni hlai ktai aŋ siiwa, won hlai n'a vada li, ktai arbaɗi ɗaini zi hitri a miɗini: Epiɗ-ɗai, hitriyi lai maini na Yohana a hitriɗi ɗaini zi hitri aŋ siiwi nɵa. 2A miɗiɗi: Won hlai na ki diri ki siiwi, ki miɗi maini nɵa:
Api
A juva ɓa, ɗai paŋ e siɗi ɓa ku na sɗik
a juva ɓa, paiku te halasi
3siyi simiyi na war yuvai kûreɗ-kûreɗ.
4Hiniyi tuwuryi,
buri tiyi lai mi hinini wiini asiya asiya ɗi paŋ tumuŋni n'aŋ midii ɗa,
ku hina tanai a yimiyi kai.
5A miɗiɗi pra: Asiya asiya paŋ n'arbaki, na marmaini a na, a hala sini duvuk na marba aŋ miɗini ɓa: Marmaya, tufaŋa peŋ hu, 6buri marmaya ktai a cosi ahaya aŋ morkoi, wala ktai na mu sini aŋ kai. 7Amlai par, a wiyinisi seŋ ɓa: Huwyaŋa kai, mini hlaiŋa mu ɵaŋ ka, gaiɗi aliya mi fini azumai gulo, mu kiɗa mu fakaɗi amai aŋ suku peŋ kai, a sɗa aŋ za ɵa ɗi? 8Mu midiki, koo ɓa, a faka amai aŋ siŋni buri ɓa ni a marmaini kai kaw ɗa, aga a fakasi amai buri siiki n'a na siika mini ɗa, aga a sini wala na jaani aŋ sini ɗa lai.
Mat. 7.7-11
9Nɵa mu miɗiki Siiwi, aga a sa siki, piyi aga ki nivi, ɵiɓi, mini hlai aga a mala edi buriki lai. 10Buri asiya asiya paŋ n'a siiwa a sa sini, n'a paya a nava lai, n'a ɵiɓa, mini hlai aga a mala edi burini lai. 11Arbaki ɗa, na ɓa ahi a zilba api gaini hilif, a sini wala meefeŋ warni balamni ɗi? 12Zaw na ɓa, a siiwaŋ miɗini eɵe, a sini hurdi ɗi? 13Na ɓa tiki na maafanai, ki siɗi wiiɗi aliki wazagai na pɗamai ɗa, azi gama ɗa, Api na war fuŋ-n'Alaw aga a sa Seze-sɗik wiiɗi nagai n'e ɗa zilbiŋ tini par ɗa!
Yesu a za sda aŋ bonu gaini ksalai ɗi?
Mat. 12.22-30; Mark. 3.22-27
14A birga ksalai na numul edi, won hlai na ksalai a niyasi edi, ɗif na ɓurtum a muɗa seŋ, ɗai e bindi hiyak. 15Amma zamai arbaɗi e miɗi: A birga ksalai na ɗa gaini Beelzebul na paiɗi ksalai. 16Zamai aŋ tetemiŋ ɗa, e zilbiŋ buri a ziɗi wala zi siŋki na war fuŋ-n'Alaw par. 17Won hlai n'a sɗa hiiniɗi ba ya ɗa, a miɗiɗi: Pai paŋ na ɗai na warɗi e hitimi marɗi ɗa, pai hanɗa aga te tuura edi, dalamai na warɗi lai aga a ho azumai midini marni. 18Nɵa ɗa, na ɓa, paini Satan t'aŋ gaini ɓraw ɗa, aga te ɗiya gdeŋi maɵa maɵa ɗa? Na ɓa ki miɗi ɓa mu birga ksalai na ɗa gaini Beelzebul ɗa. 19Na ɓa ta mu birga ksalai gaini Beelzebul ɗa, aliki e birgiŋ na ɗa gaini asiya lai ɗa? Buri nɵa nagai dama aga e zi aŋ ɗai n'e zitiki sariya. 20Amma na ɓa mu birga ksalai edi gaini spakni Alaw ɗa, a siŋka ɓa pai n'Alaw te na arbaki ya. 21Won hlai na ɗif na gdaŋ na gaini wazagai zi hatam na gaini futini tini a na giɗima dalamni ɗa, wazagaini ɗa wala a kiɗa aŋ tetemaŋ kai. 22Amma na ɓa, ɗif na gdaŋ a suwaŋ a cosi li, a rɗa li amai midini ɗa, aga a mula wazagaini zi hatam n'a na pɵa miɗini, n'aŋ tini ɗa edi, wazagaini n'a na ɗa a ɓurwaŋ edi wiiɗi ɗai lai. 23Ni na warni aŋ gaya kai ɗa, a gawŋa. Ni n'a zina pa aŋ tapa fara amai kai ɗa, a ɵaraŋ gaini ɵiri edi.
Wiyi na ksalai a wayasi sini ɗif
Mat. 12.43-45
24Won hlai na ksalai a niyasi li edi sini ɗif par ɗa, a gunasi warni hlai z'alak ta ta ɗa paŋ, aŋ paya hlai zi si n'amla, na ɓa a navaŋ kir kai ɗa, a muɗa gaini warni ɓa: Mu waya wiyi warɗi delemiŋa, na mu nasi warɗi par ɗa.
25Won hlai n'a co ɗa a niviti gaini dûgû edi silak gaini zizini ta lai. 26Nɵa a hala a payasi ksalai zamai muguzak, na maafanai e sûwiŋ, e niyi amlai, e zizini siɗi azumai, meefeŋni ɗif hanɗa a bunda meefeŋ a suwa n'avut ɗa pra.
Ɵeɗ na jre
27Won hlai n'a na muɗa hanɗa, wulaɗi muni ktai a wasi arbani firiɗi ɗai par a muɗa: Ɵeɗ midiɗi na na te ziyuku warɗi, na ku ca fiyawɗi lai. 28Amma a waya seŋ a muɗa: Ɵeɗ ɗa aŋ midiɗi nagai n'e ɵini seŋni Alaw, e zi pini lai ɗa.
Wala zi siŋki na wiini Yunas gaini Ahini ɗif
Mat. 12.38-42
29Won hlai na ɗai e tipisi li viya, a tika pini aŋ miɗidi maini nɵa: Vna hanɗa, a vna na meefeŋ, a paya ɗa a wala zi siŋki. Amma wala zi siŋki na zamai aga a za sini kai, sai na wiini Yunas ɗa tar. 30Buri ɓa maini na Yunas a za aŋ wala zi siŋki buriɗi ɗai na Ninive, nɵa lai Ahini ɗif aga a za aŋ wala zi siŋki burini vna hanɗa lai. 31Muni zi pai na war gal n'amai par aga te fikasi amai war mefeŋ zi sariya gaiɗi ɗai na war vna ni lai, aga te kûti sariya midiɗi buri ɓa na te halasi edi mini koŋni afti par aŋ ɵina yel na wiini Salmun, paŋ ktai n'abai n'a suwa Salmun a na won na. 32Ɗai na Ninive aga e fiki amai war mefeŋ zi sariya wuzaɗi vna hanɗa paŋ, aga e pi seŋ midiɗi lai buri e bindi payaiɗi gamai pini ɓikini seŋ na wiini Yunas, paŋ ktai ɗif n'a suwa Yunas aŋ won na.
Lampa na wiini si
33Ɗif n'a tika afu warɗi lampa buri a ŋûyûti azumai pini wala, zaw azumai piɗi wulai aŋ kai, amma a hikiti ɗa amai sini wala n'e higi lampa sini kapai nagai n'e niyisi amlai e tili gaglai ɗa.
Mat. 6.21-23
34Arku ɗa a lampa na wiini si, won hlai na arku a na pɗamai ɗa, suku paŋ aŋ war gaglai, na ɓa a na maafanai ɗa, suku paŋ aŋ war gegeŋ lai. 35Ku za hangal kapai gaglai n'aŋ warku ɗa a bunda aŋ gegeŋ kai. 36Na ɓa suku paŋ aŋ war gaglai, hlai n'agwi kaw aŋ war gegeŋ kai ɗa, aga a sumna war gaglai, maini na lampa a za gaglaini suku ɗa nɵa.
Yesu a pa seŋ midiɗi Farisekai gaiɗi ɗai n'e siɗi gadai gara ɗa lai
Mat. 23.4-36
37Won hlai na Yesu a vada gaini seŋni zi miɗi ya, ɗif na Farise ktai a yikaŋ buri a halaɗi ahani aŋ suma gaini. 38Amma ɗif na Farise, a tala Yesu a ma tini wuzani simi maini pini de nɵa kai ɗa, a bunda. 39Amma Epiɗ-ɗai a miɗini: Tiki Farisekai na ki mi duɓani kup gaini sufra lai, amma warki n'amlai a va gaini suuna na pini wazagai gaini meefeŋ lai. 40Tiki ɗai na tatalakai, Ni n'a za duɓani wala ɗa, a za warni lai kai ɗi? 41Ki si aŋ like zi hinini-haw wiiɗi na murgakai ɗa a wala n'aŋ warni ɗa, nɵa wazagai paŋ aga a za edi hilu buriki.
42Haw gara buriki tiki Farisekai, tiki ki si doogoni manta gaini ru wiini Alaw, gaini na wiini sugoi zamai zamai paŋ lai, amma ki wili midiki gaini jre, gaini diri na sini Alaw sek ɗa, kadai tiɓ, ki zi ɗa a hanɗa haw, wazagai n'aŋ tiki na ɗa, midiki a wula gaini kaalai.
43Haw gara buriki tiki Farisekai, tiki ki firiyi hlai zi simni n'edi avut na war sinagogne, war hlai na ɗai e tipi woni ta ta ɗa, ki firiyi ɓa e ɵiɓiki wuti zi hormo lai. 44Haw gara buriki, buri tiki ki ɗa maini yeɵ na gaini hûsi hos na ɗai e hili miɗini e sɗiŋ kai ɗa nɵa. 45Ɗif ktai n'a sɗa gadai gara a ɗuula a muɗa: Api zi hitri, seŋ na ku muɗaŋ na ɗa, ku tirkiyi na ɗa mi ɗi tiyi lai koo. 46A waya seŋ a miɗiɗi: Haw gara buriki, ɗai na ki siɗi gadai gara, tiki ki mili jak na guma midiɗi ɗai aŋ libiŋ, amma tiki ɗa, ahi tiki maa te tika sini kai. 47Haw gara buriki, buri tiki ki rgi yeɵ na wiiɗi ɗai na mini Alaw, na tamaiki e fiɗiɗi edi ɗa amai. 48Tiki ki ɗi zaida buri sɗa na tamaiki e ziŋ ɗa, buri nagai e fiɗiɗi ɗai na mini Alaw edi, tiki ki rgi yeɵɗi lai. 49Buri nɵa Alaw war yelni a muɗa: Aga mu ɵina ɗai na mini Alaw gaiɗi Apostelai siɗi, nagai aga e fiɗi piɗi, e ziɗi gir arɗi na zamai ɗa lai. 50Kapai felɗi ɗai na mini Alaw n'a ma edi haa war piɗi yai zi tiki par ɗa, a zilba war tiɗi vna hanɗa. 51Sini fel ni Abel par haa sini fel na wiini Sakariyas n'e fiɗiŋ arbani gûwiŋ zi ɓaka gaini hlai na sɗik ɗa. Jre, mu miɗiki, aga a zilba tiɗi vna hanɗa. 52Haw gara buriki, tiki na ki siɗi gadai gara ɗa, tiki ki tiki lakle na wiini siɗi edi ɗaw, tiki dama ki niyi amlai kai, nagai n'e diri e niyi amlai ɗa, ki hiniɗi kaalai. 53Won hlai n'a niyasi edi woni par, ɗai n'e siɗi ɗû gara gaiɗi Farisekai e tiki piɗi aŋ pirɵiŋ, aŋ zilbiŋ midini wazagai viya viya lai. 54E firiyi e yimiŋ warni seŋ n'a niyasi edi mini par lai.
Zur Zeit ausgewählt:
Lukas 11: MUSGUM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
