Yohana 3
3
Kalaŋ n'arbani Yesu gaini Nikodemus
1Amma arbaɗi Farisekai ɗa, ɗif ktai a na fu yikini Nikodemus, a ktai arbaɗi abakaiɗi Yudiyakai. 2Ni a halasi sini Yesu duvuk a miɗini: Rabbi, tiyi mi siɗi ɓa, tuku k'Api zi hiri n'a halasi sini Alaw par, ɗif a kiɗa aŋ za wazagai zi siŋki na ku na zaŋ na ɗa kai, na ɓa Alaw aŋ gaini kai ɗa. 3Yesu a wiyini seŋ a miɗini, Jere, jre mu muɗuku, na ɓa ɗif a wa hehe kai a sɗa aŋ tiliti pai n'Alaw kai. 4Nikodemus a zilbaŋ a muɗa: Ɗif n'a za li wel ɗa, a ki ɗa aŋ wa pra ɗi? 5Yesu a waya seŋ a miɗini: Jre jre mu muɗuku: Na ɓa ɗif a wa warni yem gaini Seze kai ɗa, a kiɗa ŋ niya warɗi pai n'Alaw kai. 6Wala n'a wa li warni neŋ-si ɗa a neŋ-si, n'a wa li warni seze ɗa a seze lai. 7Ku bunda hiyak kai buri miɗi na mu muɗuku ɓa, sai ki wi hehe pra ɗa. 8Smer a vuvuwa woɗi paŋ n'a dara, ku ɵina viviwini, amma hlai n'a halasi woni par ku sɗaŋ kai, hlai n'a hala woni sek ku sɗaŋ kaalai. Asiya ɗi paŋ n'a wa li warni seze sɗik a na maini hanɗa nɵa. 9Nikodemus a waya a muɗa: Hanɗa a kiɗa a za maɵa maɵa ɗa? 10Yesu a waya seŋ a miɗini: Tuku k'Api zi hitri warɗi Izrayel, ku sɗa hanɗa kai. 11Jre, jre mu miɗiki, tiyi mi miɗi ɗa a wala na mi siɗiŋ, mi zi zaida miɗini na mi tiliŋ lai, amma tiki ki diri ki yimi zaidayi kai. 12Na ɓa won hlai na mu miɗiki gaini wazagai na warɗi yai, ki yimi kai ɗa, mu miɗiki li gaini wazagai na warni fuŋ-n'Alaw par ɗa aga ki yimi maɵa maɵa ɗa? 13Ɗif ktai n'a niya amai warni fuŋ n'Alaw aŋ kai, a na ɗa A ni n'a niyasi amai warni fuŋ-n'Alaw par, Ahini ɗif ɗa.
14Maini na Musus a haga wala meefeŋ amai edi warni basga na kaɗataŋ, nɵa lai Ahini ɗif aga a haga amai, 15kapai asiya ɗi paŋ n'a yima li ɗa a nava suŋfa n'a vada kai warni. 16Buri Alaw a diriɗi ɗai na midiɗi yai ɗa gara, haa a sa Ahini na ketekeɗik kapai asiya ɗi paŋ n'a yima li warni a ba edi kai, amma a nava suŋfa n'a vada kai. 17Buri Alaw a ɵinasi Ahini siɗi ɗai na warɗi yai buri a kûti sariya midiɗi ɗai na warɗi yai ɗa kai, amma buri ɓa ɗai na warɗi yai e kûri edi gaini. 18Ni n'a yima li warni ɗa, sariya miɗini kai, amma ni n'a yima warni kai ɗa sariyani te ɗiya zaw buri a yima warni Ahini Alaw na keteɗeɗik kai. 19Sariya ɗa, te na maini nɵa: Gaglai a halasi warɗi yai, amma ɗai ɗa e diri gegeŋ a suwa gaglai ɗa, buri ɓa sdaɗi a meefeŋ. 20Buri asiya ɗi paŋ n'a za meefeŋ a dara gaglai ɗa kai, ɗif hanɗa a halasi edi sini gaglai ɗa kaalai, kapai sdani ɗa a siŋka edi kai. 21Amma ni n'a za jre ɗa, a halasi edi sini gaglai kapai a siŋka edi ɓa sdani ɗa a zaŋ ɗa warni Alaw.
Yesu gaini Yohana zi baptisme
22Asakal hanɗa Yesu a halasi gaiɗi ɗaini zi hitri midini afti na Yuda, a sumna woni gaiɗi, a sa baptisme lai.
23Yohana lai a za baptisme war Enon gobi gaiɗi Salim, buri yem a na fu woni viya, ɗai e hilisi aŋ nivi baptisme woni. 24Buri Yohana a na fu gaini ɵi warɗi daŋgai kai hai. 25Nɵa sispai ktai a faka arbaɗi ɗai zi hitri na wiini Yohana gaini ɗif na Yudiya ktai miɗini zi n'edi aŋ hilu. 26E hilisi sini Yohana e miɗini: Rabbi, ni n'a nasi ka gaiku anene kata duɓani ra Yurdan par ɗa, na ku za zaida miɗini ɗa a na sa baptisme koo! Ɗai paŋ e ɗa hili pini lai. 27Yohana a waya seŋ a muɗa: Ɗif paŋ a nava a n'a sasi sini amai war fuŋ-n'Alaw par ɗa. 28Tiki gaini midiki dama ki ɗi zaidakaiŋa na ki ɵini maa par ɓa, Ta ɗa mu Kristu kai, amma mu ɵeŋ na e ɵiniŋasi wuzani. 29Dray ɗa, te wiini Epiɗ-dray ɗa, amma marmaini Epiɗ-dray, n'a na gobi gaini, n'a na ɵina wulani lai ɗa, firiyini abai gara won hlai n'Epiɗ-dray a na miɗini seŋ ɗa. Firiyi na wiya hanɗa a va li amai tiyana ta. 30A juva ɓa a riya amai wuzani sek, ta mu hosa azumai.
Ni n'a halasi amai par
31Ni n'a halasi amai par ɗa, abai a suwa paŋ, ɗifɗi yai ɗa a wiiɗi yai, seŋ n'a muɗaŋ ɗa a wiiɗi yai lai. Ni n'a halasi amai war fuŋ-n'Alaw par ɗa a abai a suwa paŋ. 32A za zaida miɗini wala n'a talaŋ, n'a ɵinaŋ lai. Amma ɗif ktai n'a yima zaidani aŋ kai. 33Ni n'a yima zaidani li ɗa, a yima ɓa Alaw ɗa a jre, 34Buri ni n'Alaw a ɵinaŋ li ɗa, a muɗa ɗa a seŋ na wiini Alaw, buri Alaw a sini Seze gaini katay kai. 35Api a dara Ahi, nɵa a sini wazagai paŋ war tini. 36Ni n'a yima li war Ahi ɗa, suŋfa n'a vada kai ɗa a wiini, ni n'a dara a ɵina pini Ahi kai ɗa aga a tala suŋfa kai, suwar na wiini Alaw aga a sumna miɗini.
Zur Zeit ausgewählt:
Yohana 3: MUSGUM
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
