Luka 7

Yesuŋo Roma Kawali Ŋei Ŋetnane Qelit Medep Ma Menaŋkake

1Yesu eŋe don iwa ŋei ŋerep korop ra edanwareki qoekiso, Kaperneyam matko arike. 2Yewa Roma kawali ŋei ŋetne mane wane qelit medep mane geke. Kawali ŋei ŋetne yewa eŋe qelit medeunane zok wetine suwaine pake, wane qelit medeune eŋe zoma suwaine qeki seukeyakane okane pake. 3Pakiso, kawali ŋei ŋetne eŋe Yesu wane donkisi dere more, Yuda ŋei ŋetne raongi arikoi, Yesu olatpi sari qelit medeune ma menaŋ kayakane. 4Eŋe Yesu wano ari lotke more soriringe meŋenka rakoi, “Eŋe ŋei maine, ge eya wane donine dere so mapik kaikene. 5Eŋe wetine Yuda ŋei ŋerep ŋenaneka pamaike, eŋe oŋomka Yuda wane lewa lewaŋ urum ma ŋebonge.”

6Pakiso, Yesuŋo eŋerop weneŋ arikoi, ari mat osino rakiso, kawali ŋei ŋetne eŋe kimakoune natne raongi, Yesu wano don iwa yale ma arikoi, “Suwaine, ge urata suwaine mi manom, na ŋei mainane sari matne koto sakene. 7Na nae wane detpe mi menaŋge, ŋei borikineŋo daleo geŋano sarikale ra more qekele, wane mo ge yewa ge more, donŋoneŋoka ranom qelit medepne maine menaŋ kayake. 8Na yale waka, na ŋei wawaine eŋane qelit ŋei, pakimo, naŋane ketkele kawali ŋeikopne naŋane bango gemami, yale wane mo iwa wane raikale, ‘Arinom!’ Rawe eŋe ariyake. Ŋo eriwa wane raikale, ‘Sarinom!’ Rawe eŋe sariyake. Ŋo qelit medepnane raikale, ‘Iwa manom!’ Rawe, eŋe yewa mayake.”

9Yesu eŋe don yewa dere more mawaka more, zinge ŋei ŋerep magu suwaine ŋadino arikoi, eŋe edane rake, “Na mali malip suwaine iwa yaline mane mi maratka okanmaile, na ŋidanmaile, Israel eŋano yale waka mane mi maratka okanmaile!”

10Yale rakiso, ŋeiwa kawali ŋei ŋetneŋo qelit raongi, Yesu wano sarikoi, eŋe zinge ari kawali ŋei ŋetnane matko wa more kau, qelit medepine mo menaŋkake.

Yesuŋo Mala ŋerep Mane Wane Gipole Seu Seuwo ŋine Ma Wirikaki Wiyeke

11Nigatne gege more, ŋado Yesuŋo mat mane eŋetne Nain yewa arike, eŋine dokoine so ŋei ŋerep magu suwaine weneŋ eŋerop arikoi. 12Ari more, mat suwainane madet osino lotkekiso, ŋei ŋerep eŋe medep seuseune mane wane pareŋ teweke sarikoi. Ŋei seuseune eya mo ŋerep mala mane wane gipole wemedep weku, eŋe seukki mo dukkei wane ŋei ŋerep magu suwaineŋo weneŋ mat suwaino ŋine eŋerop sarikoi. 13Pakiso, Waomŋo ŋerep mala ka more, eŋane wet borikŋo kotino watkekiso, ŋerep olale rake, “Ge misuk arokenom.” 14Pakiso, Yesu eŋe ari katapa yewa metineŋo makiso, ŋeiwa pareŋ katapa tewekkoi, eŋe doŋmane okorakoi. Okorauso, Yesuŋo rake, “Ŋei qaluwit! Na golatmaile! Wiyenom!” 15Rakiso, ŋei seuseune eŋe wiye metke so kiyeke don rake, pakiso Yesuŋo mainge nagaine mange.

16Ŋei ŋerep eŋe yewa ka more kaetongi, Kaisale mawaka rakoi, “Kaisale wane qelit ŋei suwaine mane keuzo wakonge!” So rakoi, “Kaisaleŋo sari more eŋine ŋei ŋerewekoune ma menaŋ ŋonmaike!”

17Yesu wane don kisiine iwaŋo Yuda kepeo korop rokopke more, kepe nat nat ariwareke.

Yohane Doku Tau Tauŋo Qelit Ŋeitkine Etke Yesu Wano Raotki Arikoi

18Yohane wane dokoine eŋe don kisi yewa olatwareu dereso, medewetkine etke etoraki sarikoik. 19Pakiso, Waom don iwa yale ra more qesonkaikeik wane eŋano taleotki arikoik, “Sarikenane raraine, ge weku mo iwa sarimaine, me ŋene mane wane tomakaikene?”

20Pakiso, ere Yesu wano ari lotke more olale rakoik, “Yohane doku tau tauŋo taleŋotki, qeson gangetane sarimaite, ‘Sarikenane raraine, ge weku mo iwa sarimaine me? Me ŋene mane wane tomakaikene?’ ”

21Nasomde yewaoka Yesuŋo ŋei ŋerep loutne zomaenerop ma menaŋonge, kubet togon gorop saukonge, asu qotkoinerop esopongi saket arikoi, deene pili pilikine ma menaŋonge. 22Pakiso, Yesuŋo Yohane wane qelit ŋeitkine etane rake, “Ŋire zinge ari more, tanik kine kine daleo wakongi kamamik, so detmamik, yewa Yohane olatpik, de pilikŋo deene maine potmami, so kiye wawetne seuseuneŋo numa maine gesoke arimami, so kubet togon gorop ebuki, kubetene osimaike, so ket wonŋo ketene lotkeki, don maine detmami, so seuseuneŋo koso wisikae wiyemami, so ŋei ŋerep ketkeleŋo Kaisale wane kisi maep don detmami. 23Ŋei mane eŋe naŋane wet etke mi okaniyake, eŋe wet pesek desiyake!”

24Yohane wane qelit ŋeitkine ere biraore ariuk, so eya wane ŋadino Yesuŋo kiyeke more Yohane wane don kisi ŋei ŋerep edane more rake, “Ŋine kepe yaup papaino Yohane wano onokaka kaikei wane arikoi? Ŋine gim metine momoŋo mapateki, kaikei wane arikoi me? 25Ŋine ari more onokaka kakoi? Me ŋine ŋei mane takotine kibinerop kaikeiwane arikoi? Midakaka! ŋei takot kibinerop wekumane au ge okanmami, eŋe ŋei waom urumgo met okanmami. 26Pakimo, ŋidanbi, ari more ŋine onokaka kakoi? Ŋine ari Kaisale wane qelit ŋei mane kakoi. Welekatne, na ŋidanbe, ŋine ŋeiwa kakoi, eŋe Kaisale wane qelit ŋei natne eŋane rokop mida! Eŋe eŋineka rokop mane. 27Yohane weku eŋane Kaisale wane ekapko iwa yale ramaike, ‘Kaisaleŋo gipolano ramaike, iwa eŋe naŋane qelit ŋei, detmami, na boaŋ ŋei mane talekawe, geŋane numa ma alakane more, numaŋone lalageyake.’

28Na ŋidanbe, ŋerepko ŋine wakon okanmami, ŋei yewa korop eŋano ŋine maneŋo Yohane mi yuwankayake. Ŋo, ŋei mane eŋe Kaisaleŋo eŋetne kine kine kakaine so mi kakaine ma wakonge pamaike, eya wane naso iwa kotino ketkele geyakeŋo, Yohane yuwankayake.”

29Ŋei ŋerep korop so takis mama eŋe Yohane wane don dere more doku taukoi, yewa eŋe Kaisale wane don wele dere tewekeu wele wakonge. 30Ŋo, Kaisale papa togon welaine ŋei, Parisi so Skribe, eŋe yemo Yohane wane doku tau tau yewa qaisikka more Kaisale wane don ŋadekkau eŋano wele midaine okange.

31Pakiso, Yesuŋo takotke rake, “Ŋei ŋerep iwa diyawa eŋane rokop motpe? Eŋe ma yale? 32Eŋe ŋerep medep nigatne yale. Ŋerep medep nigatne eŋe sobego mere, ŋerep medep magu mane edo magu mane iwa yale ra boka edanmami, ‘Ŋene mete au au wane wagom ŋinane ra kitoŋem, ŋine eŋet mi oremami! Ŋene seuseu eŋet kitoŋem, ŋine mi arokmami!’ 33Yohane doku tau tau sari more, doku togole wain mi nene tau geki, ŋine rakoi, ‘Eŋe asu qotkoineŋo kotino ket metmaike!’ 34Ŋei Wawainane Gipole sari more ŋara so doku neke, pakiso ŋine rakoi, ‘Ŋei iwa kau! Eŋe ŋara so wain doku togole nene, so takis mama so borikine mama eŋane kimaene!’ 35Ŋo, Kaisale wane dereret suwaine yemo ŋei ŋerep pa dere more ma nogankakoi, eŋano wele welekatne sikanonge.”

Yesuŋo Saimon Parisi Wane Matko Wake

36Kaisale wane papa togon welaine, Parisi ŋei maneŋo Yesu ŋara eŋerop nekeik wane newankake. Pakiso, Yesuŋo Parisi wane matko wa more ŋara neyakane pese metke. 37Pakiso, mat yewao ŋerep mane gege mageine qotkoine geke, oŋo Yesu wane kisi detki, Parisi wane matko mere ŋara neke, pakiso, ŋereppae eŋe kelok beloŋ mane qounerop yewa ma more arike. 38Ari more, Yesu wane ŋadino kine osino okora more arokke. Arokki deine dokuneŋo ket more Yesu wane kine taukake. Pakiso, lewine zouneŋo Yesu wane kine ratoke so lulu kike. Ki more so kelok qounerop yewa qakki, Yesu wane kine taukake. 39Pakiso, Parisi Yesu newankake, oŋo yewa ka more, oŋomka Yesu wane iwa yale rake, “Ŋei wae eŋe welekatne propet wele ra, yemo eŋe ŋereppae maŋo kine mamaike yewa detki rap, so ŋereppae gege mageine qotkoine gemaike, yewa weneŋ detkaki rap!”

40Yesuŋo rau wakone more olale rake, “Saimon, na don mane magemaile golatpe.”

Rakiso, Saimonŋo rake, “Kito ŋebo ŋebon nolatnom.”

41Rakiso, Yesuŋo kiyeke rake, “Ŋei etke ere ŋei mane wano ŋine wesi sota okangoik. Ŋei maneŋo wesi setne 500 sota okange, ŋo maneŋo wesi setne 50 sota okange. 42Pakiso, ŋei etke yewa ere sota eya makokkeik wane wesi wane qekakoik, pakiso, wesi welaine eŋe sota yewa yeine qeliŋge, ŋei diyawaŋo wesi welainane zok simile desiyake?”

43Pakiso, Saimonŋo mainge rake, “Na ramaile, sota suwaine okange, turuŋ qelige mange, oŋo.”

Pakiso, Yesuŋo rake, “Geŋane don turuŋine maingemaine, yewa mo wele.” 44Yale raki pakiso, ŋerep wano zinge more Saimon olale rake, “Ge ŋerep iwa kamaine? Na geŋane mat koto sawe ge kiyene saukkalane doku mane mi ninine, ŋo siluŋ ŋerep iwaŋo yemo deine dokuneŋo kiyene sauke more, lewine zouneŋo ratokike. 45Na sariwe, ge oi bakomne lulu mi nirorine, ŋo ŋerep iwaŋo yemo na sariwe, lulu tako rakot kiyene kike. 46Ge naŋane lewene kelok mi taukene, ŋo siluŋ ŋerep iwaŋo yemo kiyene kelok qouneropŋo qakkeke. 47Pakimo, na golatpe, simile kakapa suwaine ŋerep iwaŋo sikan ŋonmaike, yewaŋo mo ŋerep iwa wane borikineine mo korop midawarike. Ŋei mane eŋe Kaisaleŋo borikineine nigatne mataliyakeo, ŋei yewa eŋe simileine nigatnemde Kaisale wane payake.”

48Pakiso, Yesuŋo ŋerep olatke, “Geŋane borikineŋone mo mataliwe siukmaike.”

49Ŋei natne zakeo metkoi, eŋe kiyeke more edomka auye rakoi, “Ŋei iwa maŋo borikine matalimaike?” 50Ŋo, siluŋ Yesuŋo ŋerep olale rake, “Geŋone mali malipŋoneŋo ma menaŋ ganmaikane, wet peseko arinom.”

Zur Zeit ausgewählt:

Luka 7: onsNT

Markierung

Kopieren