Yohane 21

Yesu Eŋe Dokoine 7 Wakon Onge

1Eya wane ŋadino Yesu eŋe koso atak mane Galili Namuŋ osino dokoine wakon onge. Eŋe iwa yale okange. 2Saimon Petoro, Tomas, eŋetine mane Atiksipo, Nataniyel, eŋe weku Kana matko, Galili kepeo ŋine, Zebedi wane gipoletkine, so Yesu medewetkine etke eŋe korop metkoi. 3Saimon Petoroŋo natne edane rake, “Na zawon tebakalane arimaile.”

Natne eŋe rakoi, “Ŋene baŋ gerop weneŋ arikene.” Eso eŋe mo eya ariu paki seki kutno wawarekoi, ŋo ruwo yewao korop eŋe kine kinemde mane mi marat kakoi. 4Kepe deine pintike waki waki yewaka kau, Yesu eŋe doku mezeno okorake. Ŋo dokoine eŋe Yesuŋo okoramaike, eya mo mi detkoi. 5Pakiso eŋe edane rake, “Medep, dokone, ŋine zawon mane mo ebumi me?”

Eŋe mainge rakoi, “Midakaka, manemde mane mi mene.”

6Eŋe edane rake, “Kamaga ŋine seki wazaine wongoken birau ketkep, ŋine yewaoken zawon natne baŋ maine marat kaikei.” Eso eŋe kamaga birau yewaka ketki warageu, seki osino maine mi sarike, so eŋe mau sekiwo kesiyakane zok manerop qekake, onoka wane, eŋe zawon zok loutne manerop ebukoi, eya wane umareke.

7Yesu eŋe medep mane wane siminka okan mageke, oŋo Petoro iwa yale olatke, “Iwa yemo Waom oŋom!” Saimon Petoro eŋe takotine kito qoke more, ge urata make paki, baŋ eŋe don yalewa detke, yewa mo Waom oŋom. Eŋe mo yale takotine biraki ketki sontake namugo rasu more, logone gemage qalako tagan weti lotkeke. 8Dokoine natne edo wamo seki woka kamaga zawon watke pake, yewa warage ari qalakko wakoi. Eŋe tagalo ŋine kiwetko eyamo kiroine mi gekoi, eŋe 100 mita, eya wane rokopka gekoi. 9Wane eŋe qalakko ketpi paki kau gerep kine zezine mane yewa zawon weneŋ kutno ze pake, so kasap natne weneŋ. 10Yesuŋo edane rake, “Ŋine zawon yewa ukude ebumi, yewa ŋine natne iwa ma sariu.”

11Saimon Petoro eŋe seki kutno wake paki, kamaga waraŋgi saki, zawon suwaine watke pake yewarop qalakko maki ketke. Zawon korop yewa 153. Yewa eŋe loutne ŋo siluŋ kamaga yewa mi toeke. 12Paki Yesuŋo yale rake, “Ŋine sari neu.” Dokoine eŋe mane mi qesonka rakoi, “Ge ma?” Onoka wane eŋe kaetonge, ŋo maneŋo mane mi qesonka rake, ge ma? Eŋe mo detkoi, eŋe Waom. 13Eso Yesu eŋe kere biraki ketki, kasap mane maki paki ebonge, eŋe zawon yale waka maki paki ebonge.

14Iwa yemo seuseuwo ŋine wisikae wiye ge more, eya wane ŋadino dokoine oŋom atak karewe wakononge.

Yesuŋo Petoro Olatke Ge Naŋane Lama Magu Ŋara Gumeonikene

15Yesu eŋine so dokoine ŋara neu qoeki, ŋadino Yesuŋo Saimon Petoro olale rake, “Saimon, Yohane gipole, ge iwa eŋane simileene eya yuwane more, wetŋone so simileŋoneŋo naŋane zok okan ganmaike me?” Saimon Petoroŋo mainge rake, “O, Waom, ge detmaine, na geŋane okan nanmaike.” Yesuŋo olale rake, “Ge lamakopne medeune ware onikene.” 16Atak etke Yesuŋo koso olale rake, “Saimon, Yohane gipole, ge wetŋoneŋo naŋane ganmaike?”

Saimon Petoroŋo mainge rake, “O, Waom, ge detmaine, na wetneŋo geŋane nanmaike.”

Yesuŋo olale rake, “Ge lamakopne wareonikene.”

17Atak karewe Yesuŋo koso rake, “Saimon, Yohane wane gipole, ge wetŋoneŋo naŋane ganmaike?”

Petoro eŋe wetne boriki, so dere umareke, onoka wane eŋe Yesuŋo atak karewe qesonka rake, “Ge naŋane ganmaike?” Eso Petoro eŋe mainge rake, “Waom, ge kine kine korop det waremaine, so ge detmaine, na geŋane nanmaike!”

Rakiso Yesuŋo olatke, “Ge lamakopne ware onikene.”

18“Na welekatne golatpe detnom, ge qaluwit gekone yewao letŋone ramu gekone paki, diyawao arikenane gangi arimaŋkone, ŋo baŋ ŋei sele okanikene, naso yewao yemo ge baŋ meteretkeŋone yewa birakene paki, mo ŋei maneŋo letŋone ramu gane more, geu numa mi arikenane wetkekene, yewa ariyake.” 19Yesu eŋe don iwa rake, yemo Petoro eŋe seuseu baŋ dale oken seukki paki, Kaisale eŋet biŋekinane so qeli ewe zonom so qelaŋan ma wakoniyake, eya wane don iwa naŋengo more rake. Pakiso olatke, “Ŋadeno sari modat nannom!”

Yesu So Medepine Eŋane Siminkamaŋke Eŋane Don

20Petoro eŋe zinge ŋadino pore kaki, Yesu medepine mane arike, Yesu eŋe medep eŋane manerop simin kamaŋke. Medep weku yewa oŋo ŋara nekoi, yewao Yesu wane osino weneŋ usumka mere qesonka rake, “Waom, ŋei maŋo siron qeki geukei?” 21Petoro eŋe medep eya kaki paki, Yesu qesonka rake, “Waom, ŋei iwa wane mane daleka?”

22Raki Yesuŋo mainge olatke, “Ŋo siluŋ eŋe baŋ geki, na koso zinge sarikalane naniyakeo, ge daleo wane ramaine? Ŋadeno sari mogat nannom!”

23Eso don yewaŋo Yesu magukoune eŋano iwa yale rokopke arike, medep iwa eŋe baŋ mi seukeyake, ŋo siluŋ Yesuŋo eŋe mi seukeyake yale mi rake, eŋe rake, “Ŋo siluŋ eŋe geki, na koso zinge sarikalane naniyakeo, yemo ge daleo wane ramaine?”

24Medep yewa oŋo don iwa korop ra wakonwareke, medep weku oŋoka don iwa yaleka qe wareke. Eso ŋene detlukmaine, eŋe don rake, yewa don wele.

25Don iwa, yemo kine kine natne korop yewa Yesuŋo okan wareke. Yewa eŋe korop ekapko bonep bonep qekoi ra, yemo na yale wetkemaile, kepe baŋem eŋe ekap yewa korop mi maurap.

Zur Zeit ausgewählt:

Yohane 21: onsNT

Markierung

Kopieren