Yohane 20

Yesu Wisikae Wiyeke

1Sodao sakoropka, kepe mi qaelukke, eŋe panamanka paki, Mariya Magdalena eŋe deŋesereo arike, paki kaki wesi kem aŋaine numa wake, waketko kito wongeu metke, yewa mo ma qe rodigeu arike. 2Eŋe yale kaki paki biririke, Saimon Petoro so Yesu medeune mane eŋaneka simile kamaŋke, erano ari etane rake, “Eŋe Waom mo kemgo ŋine ma arimi, paki mo ŋene mi detmaine, eŋe diyawao ma ari birakemi!”

3Yale etangiso, Petoro so medep kimaine ere mat qelige deŋesereo arikoik. 4Ŋei etke eretnarek biririkkoik, ŋo medeppa mane oŋo yemo togogoleka biririke, Petoro biraka ari deŋesereo esatka lewine lotkeke. 5Paki eŋe kuge ket pore kaki, laplappa eya ka metke, ŋo eŋe kem koto mi waketke. 6Eŋane ŋadino Saimon Petoro arike, eŋe oŋo wa yemo koboboineka ariso, kem koto waketke. Waket kaki lap lappa kawet kakoi, eyaka yewa pake, 7so lap lap mane Yesu wane lewino kawetkakoi, yewa pake. Lap lap yewa yemo lap lap natne kawet kakoi, yewarop mi pake, midaka, eŋe oŋomka walipkawareso pake. 8Pakiso medeune mane mikepka deŋesereo lotkeke, eŋe yaleka kem koto waketke, waket kaki paki detluke malip kake. 9Ere Kaisale wane ekapko don mane iwa yale rake, yewa mi detkoik, “Eŋe seuseuwo ŋine wisikae wiyeyake.” 10Pakiso medewetkine ere zinge matko arikoik.

Yesuŋo Mariya Magdalena Matkoŋine Wakonkake

11Mariya eŋe deŋesere wazaino. Arokma arokmaso kuge ket kem koto potki waketke. 12Eso eŋe pore otki aŋelo etke ere yewa metkoik, takot etne libekaŋo auwik paki, Yesu wane pareŋine pake yewa metkoik, mane eŋe lewine pake yewao metkiso, mane eŋe kine pake yewao metke. 13Ere qesonka rakoik, “Ŋerep, ge onoka wane arokmaine.”

Eŋe etane rake, “Eŋe naŋane Waom mo ma arimi, paki mo na mi detmaile, eŋe diyao ma ari birakemi!”

14Mariya eŋe don iwa raki paki, zinge pore kaki Yesu yewa okorake, ŋo eŋe Yesuŋo okorake, eya mo mi detke. 15Yesuŋo qesonka rake, “Ŋerep, ge onoka wane aroke gemaine? Ge maŋane zuwaŋka gemaine?”

Ŋerep eŋe wetke rake, eŋe eu ware wareŋo mane, raki paki mo qesonka rake, “Suwaine, goŋo naŋane pareŋ iwa ma arineo, yemo ma ari diyao birakene, eya mo nolatnom detpe paki mo baŋ ari mawe.”

16Yesuŋo olale rake, “Mariya!”

Eŋe zinge Yesu wanoken ari Hibru dongo rake, “Raboni!” Kine eya “Kito ŋebo ŋebon.”

17Yesuŋo olale rake, “Solano misuk neukene, onoka wane na zinge Magak wano mane mi wele, eya wane ge naŋane kimakopne eŋano arinom paki, naŋane edannom, na mo zinge eŋano wamaile, eŋe naŋane Magane so ŋinane Magaŋine, naŋane Kaisale.”

18Eso Mariya Magdalena matko ŋine eŋe ari Waom marat kaki don iwa olatke, eya wane dokoine edange.

Yesuŋo Dokoine Wakon Onge

19Soda rarap yewao Yesu dokoine eŋe wekuwenoka ari qeturage more, mat mane wane kotino wa madet togole mau kiki metkoi, onoka wane eŋe Yuda ŋei ŋetne eŋane kaet ongi, yale okangoi. Pakiso Yesu eŋe sariki paki keuweno okora edane rake, “Peyamŋo ŋinano payake.” 20Don iwa raki paki, eya wane ŋadino meteretkine so ŋorok ŋorokine eya sikanonge. Paki dokoine eŋe Waom kau paki, oi bakomŋo kotoene watkeke. 21Pakiso Yesu eŋe koso manerop edane rake, “Peyamŋo ŋinano payake, Magakŋo na talenange, eso noŋo ŋine yaleka tale-ŋunmaile.” 22Eŋe don iwa raki paki, asuine puwangi kotoeno ketki rake, “Ŋine Asu Koboboine mau. 23Ŋine ŋei eŋane borikineene ra mataliu, eŋe mo siuke eboniyake, ŋo mi ra matalikeiwo, eŋe pa eboniyake.”

Tomas Eŋe Yesu Kake

24Dokoine 12 eŋano ŋine mane Tomas, eŋetine mane Atiksipo, eŋe eŋerop mi metki, Yesu eŋe wakononge. 25Eso dokoine natne eŋe Tomas olale rakoi, “Ŋene Waom mo kene!”

Tomasŋo edane rake, “Na deneŋo biriŋ lopotne meteretkino mi kaikale, so zolipneŋo lopot yewa mi uwakakale, so meteneŋo ŋorok ŋorokino mi ma desikaleo, na baŋ mi malip kaikale.”

26Kaiwe mama sewen (7) qoeki ŋadino soda mane, Yesu dokoine eŋe koso sari mat koto lewage metkoi, eso yewao wamo Tomas weneŋ metkoi. Eŋe madet togole kitokoi, ŋo siluŋ Yesu eŋe sariki paki, keuweno okora more rake, “Peyamŋo ŋinano payake.” 27Pakiso Tomasŋo olale rake, “Zolipŋone iwa motnom paki, naŋane mete-retkene uwa-nane more makanom, paki meteŋone bira more koso ŋorok ŋorokno motnom, wetŋone etkeka yewa qeligenom paki, wetŋine weku okangi malip nannom!”

28Tomas olale rake, “Naŋane Waomne so naŋane Kaisale ne!”

29Yesuŋo olale rake, “Ge malip nanmaine, yemo onoka wane mida, yemo ge mo nanmaine, eya wane me? Ŋei ŋerep eŋe mi nanbi paki, malipnan okanmami, eŋe wetpese desikei!”

Yohaneŋo Buk Iwa Qekane Kine

30Yesu eŋe urata togogole loutne natne dokoine ŋenane kaitzo ma okange, yewaekapiwa wane kotino mi qewarekole. 31Qekole, iwa korop yemo ŋine Yesu eŋe Mesiya, eŋe Kaisaleŋo ŋei ŋerewekoune borikino ŋine ebuyakane birakaki sarike, eŋe Kaisale wane Gipole, ŋine don iwa maine detluk kaikei, paki malipkakei ŋine eya wane ra more, ŋine maine eŋine eŋetko gege togon marat kaikei.

Zur Zeit ausgewählt:

Yohane 20: onsNT

Markierung

Kopieren