Yohane 2
2
Kana Matko Zokit Wakonge
1Kaiwe etke qoeki ŋei mane Kana matko Galili kepeo zokit kakoi. Naso yewao Yesuŋo Pilip so Nataniyel weneŋ raki arikoik, so Yesu eŋine nagaine eŋe weneŋ ŋei ŋerep maturaŋ otkoi, erane zokit makoik, eya eŋe weneŋ mere kake. 2Eŋe Yesu eŋine so dokoine weneŋ newan onbi sari ŋei ŋerep zokit makoik yewa weneŋ metkoi. 3Wain newareu mida leleki, Yesu nagaineŋo Yesu olale rake, “Eŋe wain-ene mo mida lelemaike.”
4Pakimo, Yesuŋo mainge olatke, “Nabok, iwa mo geŋane naso, naŋane naso mi okanmaike, na kine kine yewa makalane goŋo misuk nolasikene, naŋane nasone mi bomile sarimaike.”
5Yale raki so Yesu nagaineŋo qelit medewekoune edane rake, “Yesuŋo kine kine yewa me yewa maikei wane ŋidangi, ŋine maine maikei.”
6Yuda ŋei eŋane kiye meteene sau sauk eya mo Mose wane ra rokop don kotino masi yewa pake. Yalinane doku beloŋ 6, wesiŋo mamaine, yewa metkoi. Beloŋ weku weku yewao doku otnom ket more 100 lita yewa wane keuetno watke mesiyake. 7Yesuŋo urata medep edane rake, “Beloŋ iwa korop doku otpi ket watkekep.” Raki so eŋe doku otpi ket watke wareke. 8Watkeki Yesu eŋe edane rake, “Yekuwat namo doku beloŋ natne ŋara soep waremaike, ŋei eŋano ma ariu.” Edangi urata ŋei natne eŋe eŋano ma arikoi. 9Doku yewa eŋe mo wain okange paki, ma ariu ŋara soep ware ware ŋei, eŋe doku eya ne kaki paki rake, “Wain iwa yaline eya diya ŋine?” Eŋe eya Yesuŋo raki dokuŋo qeinge eŋe mo koso wain okange, eya wane kine mane mi detki lotkeke so mi dere qelaŋange. Ŋo qelit medep doku otkoi edo yemo mo detkoi, eya wane ŋara ware ware ŋei eŋe ŋei zokit make eŋe oraki sarike. 10Sariki olale rake, “Ŋei korop eŋe wain maine yewa mikepka ebon okanmami. Paki ŋei lobo eŋe korop loutneka neu qoeki, koso ŋado wain simile midaine yewa ebon okanmami. Ŋo goŋo yemo wain mai maine yewa motkenom metmaŋkimo, yekuwat iwa ma wakonmaine!”
11Iwa yemo masi togogole Yesuŋo Kana matko Galili kepeo mikepka make. Maki paki, kine kine korop eŋane kutko pamaike, eya wane kine so qeli ewe zonomine ŋei ŋerep natne eŋe kakoi so ma puntulakki, dokoine eŋe ka more, wet mali malipeneŋo quŋka malip kakoi.
12Paki so, eya wane ŋadino Yesu eŋe Kana mat qelige more, Kaperneyam matko eŋine nagaine so ŋolekoune so dokoine eŋe koso zinge arikoi, ari nasomde bamgoka yewa weneŋ enŋenarek gekoi.
Yesu Bakom Urumgo Wake
13Yuda ŋei Waomŋo Loloŋonge, eya wane kaiwe suwaine mane zonom ma peyadaine mere eŋet kisi maep okane mesikei wane naso, yewa mo bamgo bomileke, eya mo Naso Suwaine Waomŋo kaiwe yewao loloŋongi, Yuda ŋei eŋe weku mane umat wane turuŋene mane mi makoi eya wane wetke metmaŋkoi. Naso yewao Yesu eŋe Yerusalem matko wa more, 14Bakom Urumgo waket ongi, sen ŋadino ŋei eŋe bulamakau, so lama, so naŋi baluse qole amanagukoi, ari ari sari sari okorau, wesi mai main ŋei eŋe yale waka zakeeno mere wesi maingekoi. 15Paki so Yesu eŋe abiŋo morap mane maulukki paki, ŋei so osom kopene korop so lama bulamakau kopene, eya esopongi Bakom Urumgo ŋine qeinat ket warekoi, paki so wesi mai main ŋei eŋane zake maingeki ketki, wesiene yewa korop ket giŋ qiririŋ ari wareke. 16Pakimo ŋeiwa korop naŋi qole qoleo metkoi, yewa mo edane rake, “Bakom Urumgo ŋine ebu saket ariwareu! ŋine maganane urum iwa mau nalu qole qole urum mi okangep!” 17Yesu eŋe yale okangi, dokoine eŋe Kaisale wane ekapko Dawitŋo don qeke iwa yale ramaike eŋe yewa detkoi, “Na geŋane Bakom Urum wane zok simin nanmaike, eya wane na urataine togogole mawe menaŋluke more mesiyake.”
18Paki so Yuda ŋei wawaine eŋe yewa kau paki Yesu qesonka rakoi, “Ge onokaka masi togole mane manom paki, kine ŋone sikan ŋonnom ŋene kaŋem paki iwa yale desikene, eŋe masi yewa okaniyakane mo maine raraine, eya wane kine kine eya eŋe mo maine okanmaike.”
19Yesuŋo mainge edane rake, “Ŋine Kaisale wane Bakom Urum iwa ra barakeu ketki na kaiwe kareweka koso mawe wiyeki ma wonge warekale.”
20Yale ra edangi, Yuda ŋei eŋe Yesu qesonka rakoi, “Ge kaiwe karewe yewaoka Bakom Urum iwa ma warekenane ramaine me? Ŋo ŋenane ŋabo kopze eŋe Bakom Urum iwa mo ma geu komaine 46 qoeke!”
21Ŋo Yesuŋo Bakom Urum wane rake yemo eŋine solainane yaup yewao rokop kito more rake. 22Eya wane ŋado baŋ Kaisaleŋo eŋine seuseuwo ŋine ma wisikae kaki wiyeke, naso yewao dokoine eŋe Yesu oŋom alakan don rake, yewa koso detkoi. Paki Kaisale wane ekapko eŋane don natne qeqine, so Yesu oŋom Bakom Urum wane don alakan rake, yewa wane weneŋ detpi wele okangi malip kakoi.
Yesu Eŋe Ŋei Korop Deton Waremaike
23Yesu eŋe Yerusalem matko Kaisaleŋo Israel magu Loloŋonge yewa wane peyadainane naso suwaine mane naso baŋem metmaŋkoi, yewao Yerusalem matko geki paki, masi togogole maki ŋei ŋerep korop eŋe kau paki, masi so don dereretine so eŋe eŋetine eya dere malip kakoi. 24Ŋo Yesu oŋom yemo ŋei mo detonluk onwarekane Yuda ŋei eŋano mi pelekke, me detki, eyaŋo don me mali malip wele mi okange. 25Eŋe daleo wane ŋei eŋane kine me tanik manik maine detwareke, eŋe ŋei natne eŋane kineene desiyakane ŋei maneŋo mi olatke, onoka waneŋo eŋe koto kaka eya wane ŋei maneŋo kineene olatki mi detonge, eŋe oŋom kotoenane kine eya mo korop deton wareke.
Zur Zeit ausgewählt:
Yohane 2: onsNT
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 2012, Wycliffe Bible Translators, Inc. All rights reserved.
