Yohane 1

Pidon Gegeineropŋo Ŋei Wakonge

1Pidon eŋe mokaka qei kino, kepe mi wakongi, yewao ŋineka ge sari geke. So Pidon eŋe gegeine Kaisale rop ge sa geke. So Pidon eŋe Kaisale ka geke. 2Pidon eŋe mokaka qei kino Kaisale rop geke. 3So Pidon eŋe Kaisale wane meteo ge more, kine kine korop ma wakon wareke. Eŋe midaine kine kine mane Kaisale eŋineka mi ma wakonge. 4Pidon eŋe gege yewa wane welaine okane geke. Paki gege yewaŋo kiwa waraŋkaki, ŋei eŋano sari more qelaŋan-onge. 5Kiwa yewaŋo panaman kotino ma qelaŋangi, so panamanŋo kiwa yewa qe pilikkeyakane qekake.

6Kaisaleŋo urata ŋeiine mane birakake, ŋei yewa eŋetine Yohane. 7Eŋe qelaŋan wane don kisiine ra wakongi, ŋei korop eŋe qelaŋan welaine detluk kau paki, weteneŋo malip kaikei wane raki paki Kaisaleŋo birakake. 8Yohane eŋe oŋom qelaŋan wane welaine mi okane geke, eŋe yaup qelaŋan welainane don kisi ra wakoniyakane sarike. 9Qelaŋan welaineŋo kepe baŋem ŋei ŋerep korop qelaŋan ma wakonon ebon okanmaike, oŋo naso yewao eŋe weneŋ kepo ket wakone geke.

10Pidon eŋe kepeo wakone geke, eŋe Kaisale wane Pidon geki paki, kepeo kine kine iwa korop oŋom mawakon wareke. Paki ŋado kepeo sari lotkeki kepe ŋeiŋo korop eŋe kau paki ŋaŋae kakoi. 11Eŋe eŋine kepe matino sari lotkeke. Ŋo siluŋ eŋine ŋei ŋerep magukoune edo kima mi okankakoi. 12Ŋei ŋerep natne eŋe welekatne kima okankau paki, donine dere weteneŋo malipkakoi, eŋe Kaisale wane ŋerep medep okanikei wane numa ma wakone ebonge, eŋane eŋet ma noganka okanmami, eŋe yale okanon okanmaike. 13Eŋe nabok magak eŋane weŋem bikumgo ŋine wakone more, Kaisale wane ŋerep medep mi okangoi, me sola wane simile so ŋei wane simile yewa ŋine midakaka. Eŋe Kaisale eŋino ŋine wakongoi, wane eŋe Kaisale wane dokoine.

14Pidon eŋe ŋei okane more, sola bikum gorop wakongi paki, keuzo mere wiye okange, paki ŋene Waom qeli ewe zonom so kibi maepine mo kaulukkone, eyaŋo Magak wane Medep me qom bapine wekuku, eŋano Waom kibi maep so zonom so don wele woune so masi tanik manik bile, eyaŋo wat watko rosarop eya weneŋ ma sarike.

15Yohaneŋo eŋane kineine eya ŋei ŋerep ra wakone more edane rake, “Na ŋei iwa wane mo ŋidane iwa yale rakole, ŋei mane naŋane ŋadeno sarimaike, eŋe mokaka geke, eŋe naŋane rokop mida, eŋe kakapa suwaine so naŋane wawaine, oŋo na yuwan nanmaike, onoka wane oŋo mokaka ge sari geki na eŋane ŋadino wakongole.”

16Pakimo, wet maepine rosarop wat watko mo pa sarike, yewa ŋine ŋene korop ra wakone mauluk ŋone more ŋebongi weneŋ ma warekone. 17Kaisaleŋo ra rokop don yemo Mose wano ra wakone more metino more ŋebonge, ŋo wet pesek so don wele, yemo Yesu Kristo wano ŋine sarike. 18Ŋei maneŋo Kaisale mane mo mi kake, midakaka, ŋei weku, eŋe oŋom eya Kaisale mo kake, eya wane eŋe Kaisale Magak wane osino metmaike, oŋo Kaisale wano ŋine kine kine eya korop ma sari more, ra wakone ŋedange.

Yohane Doku Tau Tau Wane Don

19Yuda ŋei wawaine eŋe Yerusalem matko ŋine Pris, mosop ŋei so Lewi, mosop ŋei tegoo ŋine ŋei natne tale onbi, Yohane wano ari qesonka rakoi, “Ge ma?”

20Ra qesonkau Yohane eŋe kineine mi motkeke, eŋe didiwo ra wakonge. Paki iwa yale rake, “Na Mesiya mida, ŋeiwa ŋei ŋerep korop turuŋene mayakane ra more, Kaisaleŋo ma wakonka birakake, na eya mida.”

21Raki mo eŋe koso qesonka rakoi, “Paki mo daleo ge ma? Ge propet Elaiya kakip mane me?” Yohane eŋe edange, “Na eŋe mida.” Eŋe qesonka rakoi, “Ge propet mane ŋene tomakamaine, eŋe me?” Eŋe mainge edange, “Mida.”

22Eŋe koso qesonka rakoi, “Paki mo ŋedannom, ge koboboine ma? Ŋene eriŋine raŋonbi sarine zinge ari turuŋine daleo edanikene? Ge geŋonane daleo ramaine?”

23Pakimo Yohaneŋo iwa yale rake, propet Isaiyaŋo don iwa yale ra edange, “Naŋane kine iwa yale, na ŋei mane wane aŋa don kepe yaup papaino boka more iwa yale ramaike, ‘Waom wane numa koboine laponbi.’ ”

24Ŋei eŋe yemo Parisi edo taleonbi sarikoi. 25Eŋe Yohane qesonkakoi, “Ge Mesiya mida, me Elaiya mida, me propet mida, ŋo ge onoka wane ŋei doku tauwon okanmaine me?”

26Yohaneŋo edane rake, “Na dokuka tauwonmaile, keu ŋino mane okoramaike, ŋo ŋine eŋe mi detluk kamami. 27Eŋe ŋei yewa naŋane ŋadeno sarimaike, ŋo siluŋ na yalineŋo eŋane kiye kawe une yewa maine mi qe kokkale, me naŋane rokop mida, na eŋane qelit qeqe gemaile.”

28Masi iwa yemo Betani matko, Yordan Doku wane wazaino, kepe deine sasainoken, yewa wakonge. Kepe mat yewao Yohaneŋo ŋei ŋerep doku tauonge.

Yesu Eŋe Kaisale Wane Lama

29Kepe qaeki kaiwe maneo Yesuŋo Yohane wano ariki Yohaneŋo kaki paki rake, “Kaisale wane Lama yewa kau, oŋo kepe baŋem ŋei eŋane borikine oma on wareyakane sarike. 30Na ŋei weku yewa eŋane don kisi mo ŋidane iwa yale rakole, ‘Ŋei mane naŋane ŋadeno sarimaike, eŋe siluŋ naŋane suwaine, na yuwan nanmaike, onoka wane, na mi wakonbe oŋo mokaka kino kiyeke geke.’ 31Na noŋom alakan, eŋe mane mi detlukka more kakole, ŋo siluŋ sari more, ŋei ŋerep doku tau-wongole, yemo Israel ŋei ŋine don kisiine ra wakone sikan ŋunbe, ŋine eŋe ka more wetkaikei wane doku tauongole.”

32Yohane eŋe yale edangi paki rake, “Na kawe Asuŋo baluse yale qeliwo ŋine ket more kutino kito metke. 33Ŋo na noŋom eŋe mi det kakole. Ŋo siluŋ Kaisaleŋo ŋei ŋerep doku tau onikalane talenange. Paki so nolale rake, ‘Ge baŋ kanom Asuŋo ket more ŋei mane wane kutino kito mesiyake. Eso yewa oŋo Asurop ŋei ŋerep doku tau oniyake.’ 34Yohane eŋe rake, ‘Na ŋei yewa kakole, wane ŋidane ramaile, eŋe Kaisale wane Gipole.’ ”

Ŋei Natne Yesu Ŋadino Arikoi.

35Kepe qaeki kaiwe mama maneo Yohane eŋine so dokoine eŋane keuwo ŋine medewetkine etke eŋe koso yewaka okorakoi, 36Okorau Yesu eŋe ari lotkeki Yohaneŋo kaki paki rake. “Kauk, oŋo Kaisale wane Lama!”

37Yohaneŋo yewa raki medewetkine ere detkoik. Pakiso ere Yesu ŋadino mogare arikoik. 38Yesu eŋe zinge otki ŋadino ariuk qeson ore rake, “Ŋire onoka wane zuwage sarimamik?”

Ere rakoik, “Rabai,” ge diyawao gemaine? Rabai wane kine Ono dongo, kito ŋebo ŋebon.

39Paki so Yesuŋo etange, “Sariuk paki kauk.” Paki so ere Yesurop weneŋ ari more mat geke yewa kakoik. Kauk paki kaiwe korop yewa eŋerop gekoik. Yewa mo 4 kilok rarap naso yewao mapikkoi.

40Yohane wane don dere more Yesu ŋadino mogare arikoik, erano ŋine mane eŋetine Andreya, Saimon so Petoro wane ŋole. 41Paki so Andreyaŋo qeliŋone more ari eyaka tatine Saimon maratka more olale rake, “Ŋere Mesiya Kaisaleŋo birakaki ketke, eya marat kamaite, Mesiya yemo kine iwa yale, ŋeiwa Kaisaleŋo borikino ŋine ebu sayakane birakake.” 42Yale raki paki so Saimonŋo Yesu wano iwenkaki arikoik. Yesuŋo kaki paki rake, “Ge Saimon, Yohane wane gipole, geŋane eŋetŋone Sipas.” Eyamo eŋet kine weku Petoro yale, ŋo eya wane kine Ono dongo, “wesi”.

Yesuŋo Pilipŋo Nataniyel Etorake.

43Kepe qaeki Yesuŋo Galili kepeo ariyakane ewekke. Paki Pilip maratkaki paki olale rake, “Na sari mogat nannom!” 44Pilip eŋe Betsaida matko ŋine, Andreya so Petoro mat gekoik, yewa ŋineka, eŋe matene weku. 45Pilipŋo Nataniyel maratka olale rake, “Ŋene ŋei mane wane Moseŋo ra rokop dongo qeke, so propet edo yale waka qekoi, eya mo maratka maine. Eŋe yemo Yesu, Yosep wane gipole, Nazaret matko ŋine.”

46Nataniyelŋo qesone rake, “Nazaret mat ketkele eŋano ŋine kine kine mayakatne mane maine wakoniyake me?” Pakimo Pilipŋo mainge olatke, “Sari kanom.”

47Nataniyelŋo Yesu wano sariki, Yesuŋo kaki paki, iwa yale rake, “Eŋe kau, ŋeiwa iwa sarimaike, eŋe ŋei wele, eŋano isi don me tanik manik qotkoine mane mi pamaike, Israel kine pokaine, eŋano isi mane mi pamaike!”

48Pakimo, Nataniyelŋo Yesu qesonka rake, “Ge daleo okane more, naŋane kine detmaine?” Yesuŋo olale rake, “Ge Pilipŋo mi iwen gangi sari more, nemuyap bano merine, na naso eyao mo ganile.”

49Nataniyelŋo don eya dere more, eŋe iwa yale rake, “Kito ŋebo ŋebon, ge Kaisale wane gipole! Ge Israel wane Ŋei Waom!”

50Pakimo Yesuŋo donine turuŋine mainge olale rake, “Na iwa yale golalile, ge nemuyap bano metnom na sanka ganile, na eya golatpe detnom paki, ge don kine eya waneka na detluk nanmaine me? Ge kine kine zok suwaine iwa wane rokop yuwanmaike eya baŋ kaikene!” 51Paki so Yesuŋo koso edane rake, “Naŋane don iwa ŋidanbe detpi! ŋine baŋ kau qeli aŋaŋgi Kaisale wane aŋelo magu edo ŋei wane Gipolano wawa ketket okanikei.”

Zur Zeit ausgewählt:

Yohane 1: onsNT

Markierung

Kopieren