LUK 21

Arongnu Pekna

(Mak. 12:41-44)

1Achongpu ngei na athieng inn sunga sumpang nga pekhlakka am ahul tunga Jisu na ann jui ah ri pha so. 2Hana mani kar sunga sara arongnu na neija peisa ani te hlakom riso. 3Amo na ril, “Keina nangei kolla rilla aminge na arong nu-na pek ka am mani ta hel so ae. 4Roulam chu adang ngei na pekka am hi chu mani adon anei chunga alem saruk pe ah ae, chuti weta na arongnu na pekka am chu maring ranga madon makhai so ae.”

Jisu Na Athieng Inn Sung Mang Ranga Rouril Na

(Mit. 24:1-2; Mak. 13:1-2)

5Arui ahre na athieng inn hina rou ha trong hlakka am, eja ah hra mo nu alungna phao anno Chungthieng ta malmashi ngei na pekka shi hi, chuti weta Jisu na ril. 6“Nangei ri eheilim hi apha ha wak jui ja chu alung akha na alung akha chunga dolla am mangno ae eheilimpa ha temma mang ange.”

Aol Ana

(Mit. 24:3-14; Mak. 13:3-13)

7“Arengpu” Manina sai, “Nahi etikka shuk kanga meh? Apha ha nei so ae ti dang ranga ejongpa riveta dang nea ang meh?”

8Jisu na manita ril, “Tlakka am mo nangei ta atu na vet pi no shu oh, leima tam phao hom mange hana kei ha amo inge hajong apha wakjuija nangei na manita jui no oh. 9Nangei na ral tara thei pha juija atri no oh, hajong ha masha ah shuk kange, chuti weta hajong hana atreem na so ae ta chu hal no oh.”

10Amona hata ril the song, “Ram akha na ram akha ta sul hlak kange, rengram akha na kom rangram akha ta ral ae ange. 11Hana apha ah atri pi lingnu nokka butang ange akha chu rai eja shukka wa ange, hana wan chunga kom atri alao eja kom shuk kange. 12Na limpa hina shukma tienga nangei ta mant na aol ana pe ange nangei ta synagogues sunga ruija lutveta mee ngei kut chunga pe ange hana rengpa maikunga kasarukka rui ja lut weta raen-inn sunga si ange. 13Nahina nangei taranga ahra rou sam rang ahra apha so ae. 14Chuna nangei na nangei ringrang alota ngak thukkang olla nangei lung hal no oh masha ah. 15Rouram chu hajong lungsin lungwar ha keina nangei ta pe ange hanajuija nangei ta anda ngei na sangne no rang rou ha. 16Nangei hi na nanu napa ngei na akha chu na-u-nanao ngeina natrongpi ngei na mee kolla pe ange hana ahre na chu athi phao pha ange. 17Kasarukka malmashi limpa na nangta an num mange no ae. 18Chuti weta nalu ah nasam akha phao mang ang no ae. 19Ratta ngirra am mo hana nangna nathei chakka nadongne jarra aring pha ang che ae.

Jerushalem Mangrang Jisu Na Rouril

(Mit. 24:15-21; Mak. 13:14-19)

20“Nangei na Jerushalem ma ahul tunga shiphai ngeita rijui apha ah, nangei dang ang chu Jerushalem hi mang ang nei so ae. 21Chuna Judija ah am manina mullon na tan shu oh, hana hupi sunga am ngei na shukka thingshu oh, hana husanao te ah am ngei nakom hupi ah lutno shu oh. 22Roulam chu jieksha lim ha diekka shuk ranga, ‘nanie rungnie ha chu aol ana ha pha ange.’ 23Nani rungnie ha chu eja ah atripi rungnie ang monu mamei naoron na am akha chu nao donna am ngei ta rang! 24Ahre ta chu champsai ah thattange akha chu adang ta na raen-inn sunga shi ange hana jat adangei na mapha ha pha malim chu Jerushalem ta kaetro nei ange.

Meesanaopana Jungrang

(Mit. 24:29-31; Mak. 13:24-27)

25“Apha hana chu ninu hlapa sunga akha chu arshi ngei karra adang rang akha shuk kange. Hana simlei ram lim ma leihap chatta akha chu tuipi tuijul tara na atri pi makhai shuk kange. 26Simleichunga shuk kang eja na atri pi jarra malmashi ngei na sor holnea ang no ae, roulam chu thangwan kom lingpi ange. 27Apha hana meesanaopa na mane jaitha hita sumphai karra jung manina ri ange. 28Chuna rou ngei hi shuk thou juija ngirthou weta nalu antau oh, roulam chu nataranga aringkato ha neiso ae.”

Theichang Kung Ta Achurang

(Mit. 24:32-35; Mak. 13:28-31)

29Jisu na mani ta na panteem hi ril. “Theichang kung akha chu thingkung adang ngei an no. 30Thingbu nanao chunga wakjui apha ah nangna dange asaupha hla neiso ae. 31Hita munha ah nalim hi shukka wakjuija nangna dango, ha chu Chungthieng rengram neija jung ang so ae.

32“Keina nangei kolla diekka rilla aminge atunpa pokhina am ngei hi thi happang no ae, narou lim hi shuk matienga. 33Aleiram lea thangwan chu tuikom ngei ae chuti weta karou chu etikkom atui ah amang ang no ae.

Hakka Am Ranga Tullu

34“Chuna bakka inn na naringchang taranga aephung salai dangno wa nalung hirra am no oh nanie rungnie hana changa mant no rang semsa ah am mo. 35Rouram chu hajong rungnie ha, aleiram amunt chang honna shuk kange. 36Chuna sarukka nalung semsa ae ah nei ah apha chang honna ae ah am lea chu nalim hi shukka wa halkom sanpi pha ah meesanaopa maikunga ngir pha ang che ae.”

37Nalei apha ah Jisu na athieng inn sunga chupi takpi ah amona jantieng apha pha lea chu Olieve mullon na thinge. 38Hana innthou chang honna malmashi ngei na athieng inn sunga marou matrong ngei thienge.

Zur Zeit ausgewählt:

LUK 21: CHOTBSI

Markierung

Kopieren