CHABANGCHAM 3

Chamainagu Kadinpiu Makbo

1 # Mad 12.9; 20.2. Rapiu Tingwang niu dambo khaoring ruang gasu tuhoira kaniu haise pason sathubo-e. Kaniu siniu maipui khuga maniu-e, “Kareng lungga bambo singbang rasy ruangga khatra tiumakra Tingwang niu nanai khuga pachangjiu dinkhai makma?”

2Maipui siniu paokakge, “N-gangga bambo singbang rasyse makjiu, kareng lungga bambo singbang rasy hina anainiu tiubo sui-e. 3Sibo singbang rasy tiumakra, maksai niadi nia makra, Tingwang niu anai khuga dinkhai-e; sichiu maksai anai shairabo-e chiu-e.”

4Kaniu siniu paokakge, “Sise maji makge, nanai shai lakge. 5Tingwang niu sise dinbo rambara, nanainiu uibo rasy tiugap khaisai, nanaidi Tingwang kum mirabo-e, khatdi kawi kasa simi rabo-e, chiubo pah sibo jengniu tiutulo chiubo-e”.

6Maipui siniu singbangse dejiukha ngao wilo, parasydi dejiukha tiuwi ralo khatdi ningting misai dejiukha maisuang haralo chiubo maning sude. Sijengniu paniu charasyse railujiu tiusude, khatdi paniu pakina leng kasia pikhaide, sichiujiu padi tiulude. 7Panainiu sise tiukhai kaji-kari, panai chun thiupad mide, sichiujiu panaise panai pumruang-e chiubo simide, siga panainiu ndutniw charui lujiu panaitu topman sude.

8Sibonai chawanse Rapiu Tingwang niu kareng lungga tadwangbo panai chiusude, sichiujiu panaise pakhu gasu singbang hiuga nbai sude. 9Chiudi Rapiu Tingwang niu npiumai situ kujiu dinsude, “Nang delam bamlo?”

10Paniu paokakge, “Kareng lungga nang wangkinbo khuan chiuboga, natu pingjiu nbai bambo-e, palamra I hai apumruang bamniu-e.”

11Tingwang niu maniu-e, “Nang hai napumruang-e chiubo saoniu nakhuga dinjiulo? Iniu natu tiutulo chiubo rasyse nang tiumi jiuma?”

12Maipiu siniu paokakge, “Nangniu akhuga pikhaibo maipui siniu atu pijiu I tiumide.”

13 # 2 Co 11.3; 1 Ti 2.14. Rapiu Tingwang niu maipui khuga maniu-e, “Haise nangniu dekamjiu kam gulo?”

Paniu paokakge, “Kaniu siniu atu tiura sonjiu-e.”

Tingwang niu Ladzan Thiubo

14Sigasu Rapiu Tingwang niu kaniu khuga din-e, “Haijeng gasu nangtu sajai pirabo-e: khaoring hina ruang gasu nang naronna haibo siang phungrabo-e. Tuhoi gasu nang naganiu tonrabo-e, khatdi naringtingga tabui tiujiu nang lung rabo-e. 15#Mad 12.17.Iniu maipui nanai kakga marengbo pikhai rabo-e; pakai-pakik nai nakai-nakik hai tingtheng mikrejiu lung rabo-e. Pakai pakik siniu napi kampang rabo-e, khatdi nangniu paliu phimik machao rabo-e.”

16Sichiujiu paniu maipui khuga din-e, “Nangniu nawon phungbo tingga khatdi manabo tingga, magenthiu nkiura Iniu khaisan mide, Sichiujiu bamdi, naluni hina nakina khuga bamrabo-e, khatdi pahangga nang lungrabo-e.”

17 # Heb 6.8. Khatdi paniu maipiu khuga din-e, “Nangniu nanao kadin piulujiu, Iniu natu tiutulo chiubo rasy nang tiumide. Sichiujiu nangniu haise kammibo jengniu kadih-hai tasiang hangga wang mide. Nangniu karingthen nalai khaijiu nawon leng matanjiu lungra mide. 18Iniu chapiuniw nai tathu-kara pilung khaine, sichiujiu nkan piubuan nang tiurabo-e. 19Nangniu wahina kampad raleng nakasuangdui padjiu, natu damkhaibo taniang gase malanwang makthen matan rabo-e, Natu taniang gasu damkhaibo-e, siniu nang taniang mawilan rabo-e.”

20Adam#3.20: Adam: Hebrew ladga chamaina chiubo-e. niu panaotu Eve#3.20: Eve: Haise Hebrew ladga ringbo chiubo nai ncham-e, siniu chamaina hina chiu dinkhai lanbo-e. chiujiu ku-e, palamra pahai chamaina hina pui-e. 21Sichiujiu Rapiu Tingwang niu Adam nai pakhenpui leng chakhaogiu siniu chafai kamlujiu panaitu benkhai bide.

Adam nai Eve tu Kareng gasu Hathon Mibo

22 # Mad 22.14. Sichiujiu Rapiu Tingwang niu din-e, “Tuhoira chamaina hai aliu kum mide, khatdi pakhuga kawi-kasa sibo ningting bam mide. Patu pijiu karingbo singbang gasu charasyse raitiujiu tingtheng pilung khaimak rabo-e.” 23Sichiujiu Rapiu Tingwang niu patu Eden reng gasu hathon padlujiu patu damkhaibo taniang gase tatien tenjiu lungra kamkhaide. 24Sigasu paniu karenggu tingbanglamse pake machang marijiu bambo taobambo heng thin bambo karingbo wakhao khat situ khai mide. Sichiu kambo sira, sibo ringting pikhaibo singbang mungga mai khattudi pijiu wang manamak raleng-e.

Zur Zeit ausgewählt:

CHABANGCHAM 3: LIANBSI

Markierung

Kopieren