Матай 22

Неке кыюв тойдынъ акында таварых

1Иса халкты таварыхлар ман уьйреткенин бардыра берди: 2«Алладынъ Патшалыгы улына неке кыюв той эткен бир патшага усайды. 3Ол оьзининъ кулларын неке кыюв тойга конакларды шакырмага деп йиберген, тек олар келмеге унамаганлар.

4Сонда ол: „Мине зияпетимди аьзирледим: бугаларым, асыраган бузавларым сойылган, баьри де аьзир, неке кыюв тойга келинъиз деп, конакларга билдиринъиз“, – дегенди айтып, баска кулларын йибереди.

5Олар болса, шакырувга эс бермей, кими сабанына, кими сатув-алувына кетедилер. 6Баскалары онынъ кулларын ыслап тоьбелейдилер эм оьлтиредилер. 7Оны эситкенде, патша ашувланып, оьзининъ аскерин йибереди, кыянатшыларды оьлтиртеди, шахарларын да яктыртады.

8Сонъ кулларына: „Той асы аьзир, а шакырылганлар ога тийисли болмадылар, 9Сиз энди йоллар айкаскан ерлерге барынъыз, сонда кимди тапсанъыз да, баьрисин де неке кыюв тойга шакырынъыз“, – дейди. 10Соьйтип куллар, йолларга шыгып, баьри тапкан аьдемлерин: яманларды да, яхшыларды да йыядылар эм той уьйи конаклардан толады.

11Патша конакларга карамага кирип, онда той кийим киймеген бир аьдемди коьрип, 12Ога: „Дос! Той кийимсиз сен мунда калай киргенсинъ?“ – дейди. Киси уьндемейди.

13Ол заманда патша куллыкшыларына: „Онынъ колларын, аякларын байлап, тыс каранъалыкка тасланъыз. Онда аьдемлер йылап, тислерин кыршылдатаяклар“, – дейди.

14Сога коьре, шакырылганлар коьп, сайланганлар аз».

Урым императорына ясак

15Сонъ парисейлер кетип, Исады соьзлери мен кайтип ыслайык экен деп, кенъес эттилер. 16Олар Исага оьзлерининъ сокталарын эм патша Иродтынъ аьдемлерин йиберип: «Устаз! Сен туьз соьзли болып, Алладынъ йолына туьз уьйреткенинъди билемиз. Ким де болсын онынъ ойлаганына эс бермейсинъ, неге десе кимге де болсын сога ярамага куьреспейсинъ. 17Айт бизге: Сен кайтип ойлайсынъ? Кесарга#22:17 Кесар: урым императордынъ титулы. ясак тоьлемеге тийислиме яде тийисли тувылма?»

18Иса болса олардынъ яман ниетлерин билип: «Неге сынайсыз Мени, экиюзлилер? 19Ясакка берилетаган акшады Мага коьрсетинъиз», – деди. Исага бир динар аькелип бердилер. 20Иса: «Мунда кимнинъ суьврети эм кимнинъ аты язылган?» – деп сорады.

21«Кесардыкы», – дедилер.

Иса: «Солай болса, кесардыкын кесарга, Алладыкын Аллага беринъиз», – деди. 22Муны эситкенлей, парисейлер сейирсинип, Исады калдырып кеттилер.

Тирилуьв акында сорав

23Оьлгенлер тирилмес деп айтатаган садукейлер сол куьн Исага келип, булай деп сорадылар: 24«Устаз! Муса (Тауратта): „Баласы болмай, ким оьлсе, кардашы онынъ пишесин алып, оьлген кардашы уьшин тукым тувдырсын“, – деп айткан. 25Бизде ети кардаш бар эди. Бириншиси уьйленди, баласы болмай, пишесин экинши кардашына калдырып, оьлип кетти. 26Экиншиси де, уьшиншиси де, етиншисине дейим де соьйтип болды. 27Баьрисининъ артыннан хатын да оьлди. 28Солай болганда кыямет куьнинде сол хатын кайсысынынъ пишеси болаяк экен? Неге десе ол баьрисининъ де пишеси болган».

29Иса оларга явапка: «Не Кие Язувларды, не Алладынъ куьдиретин билмейсиз, онынъ уьшин янъыласыз. 30Неге десе тирилгеннен сонъ уьйленеек те, байга бараяк та тувыллар, олар Алладынъ коьктеги маьлеклериндей болаяклар. 31А оьлгенлердинъ тирилуьви акында Алладынъ сизге айтканын окымагансызба? 32Алла: „Мен Ибрагимнинъ, Исхактынъ эм Якуптынъ Алласыман“ деген. Алла оьлгенлердинъ тувыл, тирилердинъ Алласы», – деди.

33Халк соны эситкенде, Онынъ уьйретуьвине сейирсинди.

Энъ маьнели парыз

34Парисейлер, Иса садукейлердинъ авызларын тыйганын эситкенлей, бирге йыйылдылар. 35Сонъ олардынъ бири, Таурат аьлими, Оны сынап: 36«Устаз! Тауратта энъ маьнели парыз кайсы?» – деп сорады.

37Иса ога: «„Раббий Алланъды буьтин юрегинъ, янынъ, акылынъ ман суьй“. 38Бу – биринши эм де энъ маьнели парыз. 39Экиншиси ога усайды: „Ювыгынъды оьзинъди суьйгендей суьй“. 40Савлай Таурат та, пайхамбарлардынъ окувлары да бу эки парызга негизленедилер».

Масих кимнинъ улы?

41Парисейлер йыйылганда Иса: 42«Масихтинъ акында сиз кайтип ойлайсыз? Ол кимнинъ Улы?» – деп сорады.

Ога: «Дауттынъ», – дедилер.

43Иса: «Аьше неге Даут, Кие Рух пан коьнъилленип, Ога „Бий“ дейди?» – деп сорады. – 44«Даут: „Раббий меним Бийиме: Мен душпанларынъды аягынънынъ астына салганга дейим онъ янымда олтыр, деп айткан“, – деди. 45Соны ман, Даут Оны „Бий“ деп атайтаган болса, Ол Дауттынъ улы калай болар?» 46Сонъ бир аьдем де Исага бир соьз де айталмады. Сол куьннен баслап бир аьдем де Ога сорав бермеге йигери батпады.

Zur Zeit ausgewählt:

Матай 22: NOG

Markierung

Kopieren