Mattayo 4

Gidasisimsimda Yeesu

(Mark 1:12-13; Luk 4:1-13)

1Ng'atta ghwaat Yeesu Gurooorooda ea ghoahiitta dareapcheeda ak gwasimsim meang'nyeandeenda. 2Goluulda geaw eawooji haradam, eawa ea askweari, amaduw huydeanda ghwayeachchih. 3Ghwahidu headaannyi gichchea gwasimsim ak gwayeeshsha, Iiwosa Balleanda Aseetta giyami lagheangsu ghoaw mukkatte. 4Ghwasha nea gwayeeshsha, “Geang'war gideaba,

‘Siida mwoammu goobiideewa ng'eanyiida mukkatte akghwahit,

geaghus ng'asheanda rinna ghuutta Aseetta.’”

5Ng'atta ghwaat Meang'nyeandeenda mujiineeda Ghaydit ak goodiing'da uhuuda gheeda Sibatta Aseetta heeda geaw 6ak gwayeeshsha, “Iiwosi Balleanda Aseetta, gijaksi geaw ng'eanyi; aba gideaba geang'waar,

‘Gaygoojeagu malaykajeagaaschi aba badaydaang'u;

ak gayghwadeabwaneey geattinga nyaawa

amwalasa geashtaang'u lagheaneeda.’”

7Gwayeeshsha Yeesu, “Geang'waar gichcha gideaba, ‘Adisimsimi Ng'uttamiida was Aseettang'u.’” 8Ng'atta ghwaat gichcha Meang'nyeandeenda ak goodiing'da uhuuda giijeeda geaw muuchchi, ak goohiimsa daroorakka sean bea muunda ng'eanyiida ea miyeanoadaannyi, 9gwayeeshsha, “Haleanjeeni seaniin gaydagoonnyi iibeadi ak gighadoawannyaan.” 10Hean gwayeeshsha Yeesu, “Ng'amwana hiji Shattaani! aba gideaba geang'war, ‘Ghadoawana Ng'uttamiida was Aseattaang'u ak gibwadi niny nea gaba geaw.’” 11Hean ghwanung'wa heeda Meang'nyeandeenda ak ghapka malaykajeega ak gagadiyeesa.

Yeesu ghoang'eat gadiyeedaannyi aba Galilaaya

(Mark 1:14-15; Luk 4:14-15)

12Hean nea ghwayiiy gideaba Yohaana gwanda ghealooniga, gawa Galilaaya; 13ghabeawa Nasareetti ak gawa goobiida Gapernaumu mida ghuutta basooda, mida ng'eanyiida Sablon ea Naftaali, 14ak abeeda gwasa ng'asheanda ghayi rugu sibaneeda suguura Isaaya nea gwayi;

15“Ng'eanyiida Sablon ea ng'eanyiida Naftaali,

Naweeda gal basooda, gigheawda Jordaani,

Galilaayeeda Eemoojiga.

16Fukka ghayi abiitta jeeda misaneedean

nidaah weeshinda haw,

Nea gea ghayi abiitta ng'eanyiida ea jirooneeda miyeeda,

ea niibwaay weeshinda.”

17Ghang'eada damandida ghoang'eat Yeesu rukkwiideayeayda ng'asheega Aseetta nea gwayi, “Adukkuunana aba gideaba sugoochcheandumeeda humng'eeda nineekkiit.”

Yeesu gaguursa fii ang'wan leallu ghweayeega

(Mark 1:16-20; Luk 5:1-11)

18Damanda neayeewa aba ghuutta basooda Galilaaya, ghwadaa oorju iyyeenya bea ghaamwadagi, nea Simoneeda suguura Betro gil ea oorjeeda ghaamwat suguura Andereya, nea ghoabuutta gheareedanga nyaawa jeeda basooda; aba gideaba fuga leallu ghweayeega. 19Gwayeeshsha, “Ayeanni geeshteanyu ak gaydanung' ahuuwa fuga jea gwaleallu buuneeda.” 20Deagheatta gwanung'sa heeda gheareedanga nyaawa ak ghwaat geeshta. 21Gawa mwadi ak ghwadaa oorju iyyeenya bea ghaamwadagi, suuk Yokkobo balleanda Sebedaayo ea Yohaana oorjeeda ghaamwat, nea gwanda jeeda maleambooda sea Sebedayooyda was ghweanda nyaawa nea gwasin gheareedanga nyaawa, ak gaguursa. 22Deagheatta gwanung'usa heeda maleambooda ea ghweanda nyaawa ak ghwaat geeshta.

Yeesu goonealshi nea gwarukkwiida ng'asheanda Aseetta nea ghoahaap fuga miyeani

(Luk 6:17-19)

23Gwaneayeewa jeeda ng'eanyiida sean bea Galilaaya, nea goonealshi aba jeeda ghoorajeega nyaawa siinnealshachcheewa, nea gwarukkwiida giijasta miy bea sugoochcheandumeeda, nea ghoahaap geeyoonung'weakka sean ea sawanaduutka mideawa buuneeda. 24Gageawiit iittannyi aba ng'eanyiisean bea Sirya, geeyeassa fuga sean miyeani, bearji heeluutka geeyoonung'weakka ea gea mideawa sawanaduutka, ea gea bearji meangeenda, ea gea ahiili, ea gea abittu damealga, ak ghoahaap. 25Ghwaat geashtannyi emeetuw leabu ng'eanyiida Galilaaya ea Dekapoli ea Yerusaleemu ea Yudeeya ea gigheawda Jordaani.

Zur Zeit ausgewählt:

Mattayo 4: DTGANT09

Markierung

Kopieren