Daniɛl 5
5
Kafo ɲɛdiaa masaa Baltasar tuisi-o
1Paale pilɛ, mí masaa Baltasar tuisi kafo bɛndoo le vanaa bɛndua. À va vannda vàá pilɛ. Mó kol mɔiyan vanaa kan o hɔl. 2Ndóò ciiyo mɔima man kolɔɔ, mó dimi le ndu ɲɛm diandan n'sianion a ɲɛm diandan volin humbun Nebukanɛsar fuɲa ndɔ cua Yerusalɛm o Cɛi-Hala-o nin-ndon cuuo, haliko mi ndóò kol mɔiyan lenin nda vanaa bɛndua, laandaa ndɔa a sámáá ndɔa. 3Má hun a taalala n'sianila nda cua o Cɛi-Hala-o nin Yerusalɛm-ndan. O kon, mí masaa Baltasar, vanaa bɛndua, laandaa ndɔa a sámáá ndɔa a kol mɔiyan o taalala lan nin. 4Mɛɛ nda kol mɔiyan, má kandu piɔmaa nda cɔw a sianion, a volin humbon, a daɲan, a cilinndon, a yɔmnde a á powtan-nda lisaa.
5Fɔ́ɔ́fɔ̀, mí suon ba vanacieo n fula ceen, mí n kandu sɛvaa o cìì cɛi lemasaa coo, nɛɛ nda kɛsi ɲɛ kɛsiaa lafitina bɛndoo-a kɔɔli. Mí masaa ca ba vanaciee kon sɛvaa. 6Mí siòònde bii ndu taw háá mí hɔlaa ndɔa mangalan. Mí yiyannda ndɔlan la laasian, mí boondun caŋaa ndɔa n yɔɔlian, mí vulan la ɲiiya ndu nákà-nàkà. 7Mó yonda coocoo kpélén aa: «La veelul-la vanaa viamaa yavaa, vanaa mangalaa a vanaa soaa a loeon o kɔɔ-a!» Mí masaa dimul vanaa kɔlkalua kan Babilɔn aa: «Vana sina pɛ sɛvaa ho, mò cɔm ya kɔlɔ ndɔɔ, a vownin ndu volɔɔla báà kalala lemasalan, mà vow vɛlɛ yɔlɔn n'sianion ndu o labolo. I yɔngunin ndu fonda yàándɔɔ o masale nilen nin.» 8O kon, mí vanaa kɔlkalua va o ba masaa bɛngu-a kpow a sɔɔnguu, kɛ o pilɛ bɛɛ tiwba le sɛva kon a kɔlɔ ndɔɔ masaa tɛɛsiallo le. 9Mí siòònde cɔɔlu masaa biyɔɔ taw, mí hɔlaa ndɔa mangalan, mí vanaa bɛndua va ndu o ba bɛngu-a buulan taw-taw.
Daniɛl tɛɛsiaa sɛva kɔndɔfillo
10Mɛɛ kalaa masaa tuei sɔɔn mun, mó hun o cɛi kafo kon nin, mó dimul masaa aa: «Òó masaa, màá viow yoomu fɔ́! Yiyan nɔmndo laasian te. Kɔɔle nɔmnden le mangalan te. 11Langbanɔ pilɛ co o masale nɔmnden nin, o nɔ kɔlkalu halaa diandaa nin. O paale fuɲa nɔmnden, mí n ca ndu ɲɛ-tengaa, dɛnɛ sinaa a kɔlkalu velan a kɔlkalu halaa-o nin. Lelan, mí Nebukanɛsar fuɲa nɔm kɛsi ndu bolle vanaa viamaa yavaa, vanaa soaa a loeon o kɔɔ-a, mandea a vanaa mangalaa súúlan kpow. 12Mɛɛ kɔl kaamaa kon, dɛnɛ sinaa pɛɛkaa a sinapɛngoo le lɔma sɔlaan a vunduan tɛɛsiaa co Daniɛl kon nin yɛ, o nda ke diolan aa Bɛlsasar-o pɛɛn, veelu ndu mò cɔm nɔm sɛvaa ho a kɔlɔ ndɔɔ.»
13O kon, má hun a Daniɛl o masaa lo. Mí masaa ɲuna ndu aa: «Nɔm co Daniɛl fula o vanaa nda hin o biyɔɔ nin-nda tɛɛn-ndo ni, a fuɲa nuu hin fulaa Yuda-a? 14I tuei maa a nɔ kɔlkalu halaa, ɲɛ-tengaa a dɛnɛ sinaa, a nɔ kɔlkaloo hiovɔɔ ba. 15À cuu ya vanaa kɔlkalua a vanaa viamaa yavaa, haliko mi ndáà cɔm ya sɛvaa ho a kɔlɔ ndɔɔ, kɛ a tiwba le. 16I tuei maa nɔm, a tiwba le kɔlɔ lɔma sɔlaan cɔmndo a sɔɔn viannanndon tɛɛsiaa. Taa nɔla pɛ sɛvaa ho a kɔlɔ ndɔɔ tɛɛsiaa, a vownin nɔm volɔɔla báà kalala lemasalan, mà vow nɔm yɔlɔn n'sianion o labolo. O kon kɔɔli, i yɔngunin nɔm fonda yàándɔɔ o masale nilen nin.»
17Mí Daniɛl cua sɔɛi, mó mulul ndu aa: «Manda ɲɛm-kéan nɔmndon, te kon te yɔngu vanaa celen ɲɛm nɔm kɛndɛn mun. Ya yɛ, i co nɔm sɛvaa ho tɛɛsial, mì cɔm nɔm kɔlɔ ndɔɔ.
18Òó masaa! Mí Hala-Hiow-Ɲɔɔn-Kpow-vo yɔngu Nebukanɛsar fuɲa nɔm masalen, vanabɛnduyɛi, bɔɔbɔɔyɛi a biiloo. 19Le bɔɔbɔɔyɛi Hala ndóò yɔngu ndu ken-nde, vannda súúlan kpow, vanaa-mangalaa-isɔɔa a vanaa soaa sɔɔn mangalan yɛ́-yɛ́ɔn-nda kpow ndáà nɔ siòònde a ndu ni. Vana ndóò yeema pɛ le diyɔɔ, ndóò dii ndu, vana ndóò yeema pɛ le mɛiyo yoomu, ndóò mɛi kon yoomu. Vana ndóò yeema pɛ le heeloo, ndóò heelu ndu. Vana ndóò yeema pɛ le tuisio, ndóò tuisi ndu. 20Kɛ mó kuundian háá mí kɔl ndɔɔ pia a yongaa, mó kindi nilan. Lelan, mí Hala faŋa ndu o kpɛŋɛ ndɔ lemasaa coo. Mí biilu ndɔɔ hialun ndu. 21Má toaw ndu mó faŋan vanndacieea tɛɛn. Mí yiyan ivisiyaa luɛi ndu nin. Mó kɔ cal yondoo nin nda sofɛlɛa yondoa latulu. Mó dɔawnun balo a billo maa naw. Mí kɔɔle ndɔlen le lindan o kɛmndan nin háá mó sina maa Hala-Hiow-Ɲɔɔn-Kpow-vo nɔ masalen o ceendo coo o labɛngunin ni. O siinguu vana o yeema-o masaa. 22Nɔm Baltasar, po ndɔ, a sina sɔɛi ken válán, kɛ a tuisin tootoo le. 23Má simul Maalii co o halataala-o, má cua ɲɛm diandan va o cɛi ndɔɔ nin-ndon, má kol mɔiyan lenin niaa vanaa bɛndua nɔmnda, laandaa nɔmnda a sámáá nɔmnda. Mí la lisa piɔmaa cɔwnun a sianion, a volin humbon, a daɲan, a cilinndon, a yɔmnde a á powtan-nda. Piɔmaa niaa kan yɛ, a ci le, a tui le, a bii ɲɛ-ɲɛ bila le. Kɛ, má sooluu nda, má kɛɛ Hala nɔ yoomu nɔmndo a siɔdii nɔmndo o ba-o biiloo. 24Lelan, Hala kon vem baa ho mó sɛva sɔɛi he ni. 25Tofa vɔ diomnda sɛvan-ndan: Mɛnɛ! Mɛnɛ! Tekɛl! Farsin! 26Kɔlɔ ndɔɔ co hoo ni: ‹Mɛnɛ› kon co dimio ni aa ‹Cɔmndo›. Hala cɔm masale nɔmnden, mó cii len. 27Tekɛl! Kon co dimio ni aa: ‹Tuuvo (landɔɔ) o kiloo›. A tuunun o kiloo coo, kɛ a lusul lende le. 28Farsin! Kon co dimio ni aa: ‹Piɔwvo›. Masale nɔmnden le piɔwnun, mí le yɔngun yungoo Medii a yungoo Pɛrse.»
29Fɔ́ɔ́fɔ̀, mí Baltasar dimul buɛyaa ndɔa aa: «La vow Daniɛl volɔɔla báà kalala lemasalan. La vow yɔlɔn n'sianion ndu o labolo, mì la balu yondaa maa ndu cua fonda yàándɔɔ o masale nilen nin ni.»
30Icɔl kon, má dii Baltasar masaa Babilɔn.
Zur Zeit ausgewählt:
Daniɛl 5: BKG
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© Alliance Biblique en Guinée