Genesis 9
9
Nan Nakitolagan Apo Dios Ken Noe
9:1-19, 28, 29
1Binindisyonan Apo Dios si Noe ya nan an-akna ay mangwani en, “Maganak kayo tasiyay nan ap-oyo et maiwakatda ay mentee isnan batawa. 2Am-in ay matmatago isnan batawa ya nan baybay et iyegyatda dakayo ay ipogaw 3tay itedko nan kalebbenganyo ay mang-isda ken daida ta maiyanay isnan molmola ay inbagak en menkatagon di ipogaw. 4Ngem masapol ay paayenyo nan am-in ay biyag isonga adiyo is-isda nan egay nakaan nan basana tay nan basa nan kad-an di leng-ag. 5-6Am-amed nan biyag di ipogaw is masapol ay paayenyo tay nasapoda ay kanegko isonga no waday menpatey is ipogaw et masapol ay mapatey abes. Nan animal ay menpatey is ipogaw et masapol ay mapatey ya nan ipogaw ay menpatey is ib-ana ay ipogaw et masapol ay mapatey gedan. 7Ngem dakayo et omanak kayo is ad-ado tasiyay wada kasin di mentee isnan batawa.”
8Intoloy Apo Dios ay mangwani ken Noe ya nan an-akna en, 9“Id wani wada nan isapatak ken dakayo ya nan ap-oyo is kasin 10ya nan am-in ay matmatago ay nakibala ken dakayo issan bapol. 11Isapatak ay adi kasin kapkapsong nan batawa ta adi kasin kaeng-engew nan am-in ay matmatago. 12Nan kailasinan nan naay insapatak ken dakayo am-in ay matmatago id wani ya is kasin 13et ipaeyko nan batikaang#9:13 Nan batikaang et nan naiyooged isnan daya ay nateketeken nan kololna. isnan daya. 14No menliliboo id daya ya mawada nan batikaang 15daket nemnemen nan insapatak ken dakayo ya nan am-in ay matmatago ay adi kasin kapkapsong nan batawa ta adi kasin kaeng-engew nan am-in ay wada isnan batawa. 16Owen, no wada nan batikaang id daya et ilaek daket nemnemen nan insapatak isnan am-in ay matmatago isnan batawa. 17Isonga no ilaenyo nan batikaang dayot nemnemen ay siya nan kailasinan din insapatak isnan am-in ay matmatago.”
18Nan an-ak Noe ay nakkey ken siya isnan bapol et da Sem, Ham ya si Jafet. (Si Ham et aman Canaan) 19Nan naayda ay tolo ay an-ak Noe nan kap-owan di am-in ay ipogaw isnan batawa. 28Issan nakwasan san layos et natatago pay si Noe is tolon gasot ya limampoo ay tew-en 29et siyam gasot ya limampoo nan tew-ena isdin nateyana.
Zur Zeit ausgewählt:
Genesis 9: xnn
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© 1984 (NT), Wycliffe Bible Translators, Inc. All rights reserved.
© 2005 (OT), Wycliffe Bible Translators, Inc. All rights reserved.
