Genesis 11

Nan Nangteknan Apo Dios Isnan Kalin Di Ipogaw

11:1-9

1Issan deey ay timpo et paliso nan kalin nan ipogaw isnan batawa. 2Idi omad-ad-ado nan ipogaw et maiwakatda enggana isnan nadadata ay logal ay Sinar dat mentee nan tap-ina isdi. 3-4Dadat men-asikwani ay men-et-etek, “Ala, mensapo tako is gawigawis ay ili isna. Mensaad tako pay is andoando is baey ay omdan id daya tasiyay masdaaw am-in nan ipogaw no ilaenda nan inikkan tako ya ta adi tako kaiwakat isnan batawa.” Isonga dadat men-ala is kolayeng et poowanda tasiyay komenteg ay kaneg bato dadapay men-ala is niket ay mang-ipket isnan kolayeng isnan mangtopinganda.

5Idi sas-aadenda di dat ilaen nan apo nan ili ya nan andoandoando ay baey ay sapsapowenda 6danat kanan, “Mabalin ay ikkanda na tay mapoponokda ya paliso nan kalida. Siya na nan menlogyan nan ik-ikkanda et awnitda itoltoloy ay aped mang-ikkan isnan laylaydenda no adida maipasaldeng 7isonga masapol ay tekneteknek nan kalida tasiyay adida menkinaawatan.” 8Et gapo tay adida menkinaawatan dadat isaldeng san sas-aadenda dat komaan nan tap-ina et omeyda isnan nateketeken ay ili isnan batawa. 9San ili ay deey et nangadnan is Babilonia tay isdi nan nangteketekenan nan apo isnan kalin di ipogaw tasiyay masis-iyanda.

Naayda nan ap-on Sem ay anak Noe. Si Sem nan aman Arpaksad. Si Arpaksad nan aman Sela. Si Sela nan aman Eber. Si Eber nan aman Peleg. Si Peleg nan aman Reu. Si Reu nan aman Serug. Si Serug nan aman Nahor. Si Nahor nan aman Tera.

Si Sem Enggana Ken Abram

11:27-32

27Si Tera nan aman da Abram, Nahor ya Haran. Si Haran nan aman da Lot, Milca ya si Iska 28ngem natey si Haran isnan ilida id Ur ay sakop di Babilonia dapay deda nan amana. 29Dat asawaen Nahor nan kaanakana ay si Milca ay anak Haran dapay asawaen Abram si Sarai 30ngem adi omanak.

31Isnan namingsan et inayagan Tera nan anakna ay si Abram, nan apona ay si Lot ay anak Haran ya nan inapona ay si Sarai ay asawan Abram et komaanda id Ur ay sakop di Babilonia et omeyda koma id Canaan ngem idi inomdanda id Haran dadat mentee isdi. 32Et isdi nan nateyan Tera issan kadowan gasot ya lima nan tew-ena.

Zur Zeit ausgewählt:

Genesis 11: xnn

Markierung

Kopieren