Jean Kete tënë na ndö ti Nzoni Tënë so Jean asu na mbeti
Kete tënë na ndö ti Nzoni Tënë so Jean asu na mbeti
Nzoni Tënë so Jean asu na mbeti, ambeni zo atene, Jean asu ni ndali ti abongbi ti azo ti Christ so ayeke na sese ti Sirii wala na sese ti Azii, so a iri ni laso Turkii. Molongo ti atënë ti ya ti mbeti ni, atënë ti ya ni nga na ambupa ni ayeke nde na ti atanga ti Nzoni Tënë. Ti hinga nda ti atënë ti yanga ti Jésus na nda ti sarango ye ti lo so angba na hondengo ni, so laa ayeke kota ye mingi na le ti Jean.
Akota ye so ayeke na ya ti mbeti so:
Kozo mbage ti mbeti ni (1 – 12) ayeke tene tënë ti akota ye ti dongo be mbarambara so Jésus asara. Aye ti dongo be ni so afa atene, Jésus ayeke Molenge ti Nzapa: kozo mbage ni ayeke tene nga tënë ti warango tere ti Jésus na mbeni makonzi ti azo ti sambelango Nzapa ti azuife (kota gere 3), tënë ti warango tere ti Jésus na mbeni wali ti kodro ti Samarii (kota gere 4) nga na tënë ti warango tere ti lo na azo ti kobela (kota gere 5 – 9). Na ya ti fango ye ti lo, Jésus ayeke fa so lo yeke mapa so ayeke mu fini na zo, lo yeke wabatango-taba so ayeke fa na azo lege so ague na Nzapa Babâ, lo yeke lumiere ndali ti azo ti dunia. Na lege so, Jésus ayeke fa na azo kue so lo yeke Molenge ti Nzapa biani.
Use mbage ti mbeti ni (13 – 21) ayeke fa na azo tënë ti ngoi so alingbi Jésus azia dunia so ti gue na Babâ ti lo. Jésus atene tënë na adisiple ti lo, lo mu na ala awango ndali ti ngoi so lo yeke duti ande na popo ti ala pepe (kota gere 13 – 16). Na pekoni, Jésus asambela Nzapa, Babâ ti lo ndali ti adisiple ti lo (kota gere 17).
Atënë so kue ayeke na ndö ti kuâ ti Jésus (kota gere 18 – 19), ambeni mingi akpa tere na ti so Matthieu, Marc na Luc atene tënë ni.
Na lango ti Pake, Jésus asi na adisiple ti lo ti fa na ala so lo yeke na fini (kota gere 20 – 21). Jean asu Nzoni Tënë ni titene azo so abaa Jésus pepe, ala nga alingbi ti ma na be na lo (20.29-31).
Nzoni Tënë so Jean asu na mbeti atene tënë ti azuife tongana bongbi ti azo so ayeke ti ala nde; tënë so abaa mbirimbiri amakonzi ti azuife ni. Ala ye tënë ti Jésus pepe, andaa Jésus wani ayeke zuife; akozo disiple ti lo nga ayeke azuife. Tongana Jésus ayeke tene tënë ti azuife, tënë ni abaa gi azo ti mara ti azuife oko pepe, tënë ni abaa nga azo so kue ake Jésus Christ, ataa ala yeke ti mara wa.
Na ya ti Nzoni Tënë so Jean asu na mbeti, mo yeke wara tënë ti dungo Jésus daa pepe; ngoi so lo to nda ti sara kua na le ti azo polele, mo yeke wara tënë ni daa pepe. Me na ya ti akozo tënë ti lo, Jean atene yongoro tënë na ndö ti Jésus Christ; lo tene: Jésus ayeke Tënë ti Nzapa; ngu na ngu, lo yeke na tere ti Nzapa (1.1-18). Jésus so ayeke Tënë ti Nzapa, lo ga zo biani si lo duti na popo ti azo. Tongaso si ala lingbi ti ga amolenge ti Nzapa. Na dutingo ti Jésus na ndö ti dunia so, songo ti lo na Babâ ti lo angba ngangu mingi.
Babâ laa atokua lo na ndö ti dunia so. Na lege ti Jésus, azo so kue ayeke gi Nzapa na nzoni be alingbi ti hinga lo.
Zur Zeit ausgewählt:
Jean Kete tënë na ndö ti Nzoni Tënë so Jean asu na mbeti: MNF2010
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
© La Société Biblique de Centrafrique 2010