Mātaio 6

Te 'āpi'i'anga nō runga i te 'ōronga'anga 'apinga aro'a

1 # Māt 23.5 “Kia matakite 'oki, kia kore kōtou e rave 'ua i tā kōtou 'anga'anga tika ki mua i te aroaro o te tangata kia 'ākara'ia mai e rātou. Mē 'akapērā kōtou, kāre e rauka mai tā kōtou tūtaki mei tō kōtou Metua i te ao ra.

2“Kia 'ōronga rā koe ki tei ngere ra, auraka e 'akatangi i te pū i mua i a koe mei tā te au tangata tāpikipiki i roto i te au sūnago ē i runga i te au arāta'a ra kia 'akangāteitei'ia rātou e te au tangata. Koia mou tāku e 'akakite atu ki a kōtou na, kua rauka kātoatoa mai tā rātou tūtaki. 3Mē 'ōronga rā koe ki tei ngere ra, auraka tō'ou rima kaui kia kite i tā tō'ou rima katau e rave ra, 4kia muna ngaro rā tā'au 'ōronga'anga 'apinga aro'a, ē nā tō'ou Metua tei kite mai i tei rave muna'ia e 'ō mai i tā'au tūtaki.”

Te 'āpi'i'anga nō runga i te pure

(Luka 11.2-4)

5 # Luk 18.10-14 “Kia pure kōtou ra, auraka kōtou kia 'āite ki te au tangata tāpikipiki ra tei nanave tikāi i te pure tū 'ua i roto i te au sūnago ra ē i te au tāpae'anga arāta'a ra, kia 'ākarakara'ia mai rātou e te au tangata. Koia mou tāku e 'akakite atu ki a kōtou na, kua rauka kātoatoa mai tā rātou tūtaki. 6Mē pure rā koe, e 'aere ki roto i tō'ou pi'a, e tōpiri i te pā, ka pure ei ki tō'ou Metua i te ngā'i muna ra. Ē nā tō'ou Metua tei kite mai i tei rave muna'ia e 'ō mai i tā'au tūtaki.

7“Ē kia pure kōtou na, auraka 'e ma'ata te tuatua rikiriki pu'apingakore mei tā te au 'ētene ra, ko tei manako ē, nō te ra'i o te tuatua e 'akarongo'ia mai ei rātou. 8Auraka kōtou e 'āite ki a rātou ra, nō te mea, kua kite tō kōtou Metua i tā kōtou e 'inangaro ra i mua ake kōtou ka pati atu ei ki aia. 9E nā kō nei kōtou kia pure:

‘E tō mātou Metua i te ao ra,

kia 'akatapu'ia tō'ou ingoa,

10kia tae mai tō'ou bāsileia,

kia 'ākono'ia tō'ou anoano mei tei te ao na pērā katoa i te 'enua nei.

11'Ō mai i te kai e tau i a mātou i tēianei rā.

12E 'akakore mai i tā mātou au 'ara,

mei a mātou katoa i 'akakore i tā tei 'ara ki a mātou nei.

13Auraka e arataki i a mātou ki roto i te tīmata'anga,

e 'akaora rā i a mātou i te Kino.

[Nō'ou 'oki te bāsileia, ē te mana, ē te kakā, e tuātau 'ua atu. Āmene.]’#6.13 Kāre tēia potonga 'īrava i roto i te au tātā'anga 'ēvangelia ta'ito roa.

14 # Mār 11.25 “Nō te mea, mē 'akakore kōtou i tā te au tangata 'ara, ka 'akakore katoa mai tō kōtou Metua i te ao ra i tā kōtou. 15Kia kore rā kōtou e 'akakore i tā te au tangata ra 'ara, kāre katoa 'oki tō kōtou Metua i te ao ra e 'akakore mai i tā kōtou.”

Te 'āpi'i'anga nō runga i te 'akakore'angā kai

16“Kia 'akakore kōtou i te kai, auraka mei tā te tangata tāpikipiki tei 'akaraumātea i te mata ra. Nō te mea, kua 'akatūkē rātou i tō rātou mata, 'ei 'akaāri ki te tangata ē, tē 'akakore ra rātou i te kai. Koia mou tāku e 'akakite atu ki a kōtou na, kua rauka kātoatoa mai tā rātou tūtaki. 17Kāreka rā kia 'akakore koe i te kai, e pani koe i tō'ou ūpoko ma te 'ōrei i tō'ou mata, 18kia kore roa koe e kitea e te tangata ē, tē 'akakore kai ra koe, māri 'ua ko tō kōtou Metua i te ngā'i muna ra. Ē nā tō'ou Metua tei kite mai i tei rave muna'ia e 'ō mai i tā'au tūtaki.”

Te 'apinga nui o te rangi

(Luka 12.33-34)

19 # Iako 5.2,3 “Auraka e 'akaputu i te 'apinga nui i te 'enua nei nō kōtou, ki te ngā'i e pou ei i te 'u'u ē te pē, ē ki te ngā'i ka tomo te keikeiā ki roto e keiā. 20E 'akaputu rā i te 'apinga nui nā kōtou ki runga i te rangi, ki te ngā'i e kore e pou i te 'u'u ē te pē, ē kāre 'oki te keikeiā e tomo ki roto e keiā. 21Nō te mea, ko te ngā'i 'oki ē tei reira tō'ou 'apinga nui, tei reira katoa ia tō'ou ngākau.”

Te tūrama o te kōpapa

(Luka 11.34-36)

22“Ko te mata ko te lāmepa ia o te kōpapa. Mē tē meitaki ra tō mata, ka mārama kātoatoa ia tō'ou kōpapa. 23Mē tē kino ra tō'ou mata, ka pōiri kātoatoa ia tō'ou kōpapa. Mei te mea rā ē, e riro te mārama i roto i a koe 'ei pōiri, mei te a'a atura te ma'ata i te pōiri o taua pōiri ra!”

Ko te Atua ē te moni

(Luka 16.13)

24“Kāre e rauka i tēta'i tangata kia 'ākono i ngā pū e rua. Ka riro aia i te mākitakita atu i tēta'i ē te 'inangaro atu i tēta'i; mē kāre ra, ka 'akangāteitei atu aia i tēta'i, ē ka 'akava'ava'a 'oki i tēta'i. Kāre 'oki e rauka i a kōtou kia tāvini i te Atua ē i te moni.”

Auraka e apiapi

(Luka 12.22-31)

25“Ē tēianei e 'akakite atu au ki a kōtou, auraka e apiapi i tō kōtou ora nō tā kōtou ka kai, mē kāre ra ka inu, mē kāre ra nō te kāka'u tā tō kōtou kōpapa ka 'a'ao. Kāre āina ē, 'e ma'ata atu te ora'anga i te kai, ē te kōpapa i te kāka'u? 26E 'ākara ki te au manu o te reva: kāre rātou e tanu, kāre 'oki e kokoti, ē kāre e 'akaputuputu ki roto i ēta'i 'are vairangā kai; nā tō kōtou Metua i te ao ra e 'āngai i a rātou. Kāre āina ē, 'e meitaki ma'ata atu tō kōtou i tō rātou? 27Ko 'ai i a kōtou na e apiapi nei, e rauka kia 'akaroa atu i tōna ora 'e 'okota'i ake ora?

28“Ē, 'e a'a kōtou ka apiapi ei i te kāka'u? Ka 'ākara na i te lili o te kāinga nei e tupu ra. Kāre rātou e 'anga'anga ana, ē kāre 'oki e 'iro ana. 29#1 Arik 10.4-7; 2 Par 9.3-6Tē 'akakite atu nei rā au ki a kōtou, kāre roa a Sōlomona i tōna mānea 'ope i kāka'u'ia mei tēta'i o rātou nei. 30Mei te mea ē, i pērā te Atua i te 'akamānea'anga i te rākau rikiriki o te koro e vai nei i tēia rā, ē āpōpō e 'uri'ia ki roto i te umu, kāre āina aia e 'akakāka'u ma'ata mai i a kōtou, e te aronga 'akarongo meangiti nei?

31“Ē nō reira, auraka kōtou e apiapi, ka nā kō ei ra ē, ‘'E a'a tā mātou ka kai?’ Mē kāre ra, ‘'E a'a tā mātou ka inu?’ Mē kāre ra, ‘'E a'a tō mātou kāka'u ka 'a'ao?’ 32Nā te au 'ētene e kimi ra i ēia mea kātoatoa nei. Tē kite maira 'oki tō kōtou Metua i te ao ra ē, ka 'inangaro kōtou i ēia mea kātoatoa nei. 33E nā mua kōtou i te kimi i te bāsileia o te Atua ē te tuatua tika nāna ra, e kāpiti katoa'ia mai ēia mea kātoatoa ki a kōtou. 34Auraka e apiapi i tō āpōpō ra, nō te mea, nā tō āpōpō rāi e apiapi i tōna 'ua'orāi. Tē rava 'ua ra tō te au rā tātakita'i kino.”

Zur Zeit ausgewählt:

Mātaio 6: CIMRNT

Markierung

Kopieren