Matiye 12

Zezu gəm pay naffete*

(Markus 2.23-28 / Luka 6.1-5)

1Yaŋ pay mbərən, pay naffete, Zezu atoŋguk kla dəv guli na alkamari (zev hay neti). May tay da gewleɗ nani, vini anzlaŋ kiyən taka taka, ampərəni. 2Adan Farisiyenɗe* awlanən vaska, anahsənən Zezu na: Gewleɗ nok tahəŋ wəɗɗaŋ wəza an dəslə naɗɗa pay naffet ɓa. 3Zezu azlansitike: Kəŋɗanən ɗaah ɓa sa an məs Davit agəɗə, ndəni dit ɗii nani may adaw detiŋ ɓa sa? 4Atoŋgoŋguk adəv gəla na Maŋgəlva, azəmənək wayan məɗiyən vi Maŋgəlva, ko vi tahəŋ də tive nawzəmən ɓa say malumɗe kaaka ma henziŋ apsit tive nawzəmən. 5Walla kəŋɗanən ɗaah adəv ɗerewel na ma henziŋ məs dəlveŋge tahəŋ wəɗɗaŋ wəza adəv gəla metiŋ naw zuliya* pay naffet ɓa sa? Daska tahəŋ wəpəl nən an ma henziŋ anahə, amma mbrayni ɓa. 6Əntatə nah sukum: An dəday ki gəla metiŋ naw zuliya də gakdak tayaŋka. 7An kəpprəmənək an məs wənəs andəkə: Ula saha nəŋgələ, wənna taw wəla zəga mamaya nəŋgəl ɓa, an vaski na kulenina va məɗɗaŋ mambray ɓa, dəɗɗaŋ mambray ɓa. 8Vi Wətən Ɗəffi* affən pay naffete.

Ɗəf məs van məmtəni

(Markus 3.1-6 / Luka 6.6-11)

9Zezu asilik sədaka, ambatka, agulko adəv gəla nakkal net Yahudiyenɗe maɓɓani. 10Ɗəf məs van məmtən taya dak. Ɗii nadəv gəla nan aŋgəlaŋ kawrəh Zezu də mambray vi adaɗɗa wəza an dəslə naɗɗa pay naffet* ɓa. Vi ni assohonən na: Ma henziŋ apanək tive na mbəl gən ɗəf pay naffet sa? 11Zezu azlan sit na: An ɗəf suwalaŋ kum, an tay də time taka kaaka'ə abətək avov pay naffet na kawgil gəni ɓa sa? 12Ɗəf kpak adayək ki time də sləma ɓasa, vi vaski lewi wəɗɗa wəza mogon pay naffete*. 13Yaŋ Zezu anahsən ɗəf nak na: Appar voko. Apparək vani akpaŋgək va van maɓɓani. 14Farisiyenɗe* agulyoŋko, akkalaŋka vi kaɗɗa kuket nawzan Zezu.

Gawla an məs Maŋgəlva aweli

15Adan Zezu apprəm kuket net vini, asilik səkəti nani, ambatka, ɗii diiɗa asbanənka. Ambəlgitik məs gbəgbaɗe pakə. 16Amma abayək meti, adasakaŋ aka wənnan ɓa. 17Də wən aski an məs kleŋ Ezay anah də sangən gesiŋ amna:

18Maŋgəlva amna: Aŋki gawla naw an məs nəweli,

an məs nəŋgəl neneken zu dəndən.

Wanəslən Əmpəs naw akani, wasaksən dələv

pak wənna kita an təstəssə.

19Agay na də ɗəf ɓa,

aŋgəsl na vamvəl ɓa, ɗəf tay napprəm wəlan aket tiveɗ ɓa,

20agrakan na wəŋzlan ngav an mətəŋ wəŋzlan nəŋ ɓa.

Amtan na pitirlak akən tədawɗəm tagay ɓa,

ha say an aziw ginik kita an gesiŋ.

21Dələv pak waɗumoŋ aka iya nani.

Va Zezu azlan sit məs kotorokɗe nani

(Markus 3.20-30 / Luka 11.14-23)

22Yaŋ akiyaŋ sənən daŋgar sən Zezu, goryomi pakə, vi tay də tuya. Zezu apetenke, apelke, awəlka. 23Agət sitik ɗii pakə, agətaŋka, anahaŋ na: Ɗəffəŋka, wətən Davitti* ɓa sa? 24Amma adan Farisiyenɗe* apprəmə nən vaska, anahaŋgək na: Ɗəffəŋka Belzebul məlĩ net tuyeŋɗe dəpsən sembe nawgil gən tuya. 25Amma Zezu asənək wəɗum neti, apsit na: Məlĩ pak an ɗii nan də slereŋ aweleŋgit ɓa, məlĩ nan warayə, walaŋ gəla awani di pakə, walla gəla awani di pakə, an ɗii nan dəslereŋ ɓa, aziw na ɓa kpakə. 26An Satan tayərɓəh tuya nani, an dəslereŋ dəndən zəknan ɓa, mbari məlĩ nan alziw di? 27Munokum tatə nahaŋ na də Belzebul nədawgil gən tuya. Ya an vaski na naway dədapsit sembe sit kirtukum nawgilgit tuyeŋɗe vet tam kandi? Kirtukum sən kiyit tahəŋ wərban sukumən na kəɗɗaŋgək mbrayen. 28Nawkpak də sembe na Əmpəs na Maŋgəlva nədawgil gən tuyeŋɗe, vi ndəni dərban na məlĩ na Maŋgəlva adek azokum.

29Ɗəf tay nawtoŋ eŋgil ana ɗəf gurom da, kaw hal ɓa, say dəɓɓruku gən dabəŋ, dəhal gən zigeɗ neŋgil annanda pakə.

30Ɗəf məs awsan də in ɓa, məzu zel nawi. Ɗəf məs də baah su wəkkal ɓa, watrayə. 31Vi vaski nədawnah sukum: Ɗii warəhaŋ wəviyan mbrayen net pak də wəpel mbrayen pakə. Amma məs dəzelen Əmpəs Salala arah na wəviyan mbrayen nan ɓa sam. 32Ko məs dəpel mbrayen aka Wətən Ɗəffa* warah wəviyan mbrayen nani, amma məs dəzelen Əmpəs Salala, arah na wəviyan mambray nan ɓa sam. Ko pay an kakaŋka, ko pay an dədazani.

Wəlaŋga də uwa nani

(Luka 6.43-45)

33An wəlaŋga mogoni uwa nan tam kawsan mogoni. An wəlaŋga nan mogoni ɓa uwa nan zlaŋ awsan mogon ɓa. Kawsəni wəlaŋga aza uwa nani. 34Munokum zemvit barwayɗe, mbar kədawɓapaŋ wəpeleŋ wənet zigeɗ mogeti yaŋ munokum zəknokum mbray kum di? Vi ma ɗəffa ana makra ɗəf nan adawpele. 35Ɗəf mogoni wagilgit zigeɗ moget səkəti wəzaɓet mogoni, ɗəf mbrayen wagilgit zigeɗ mbreyit səkəti naw zeɓet mbrayen. 36Əntatə nah sukum: Pay wəgrak dəlva, ɗii wazlanən aba kita aka wəpel ana met ɗarɗar apeleŋ pakə. 37Ɗərɓaga wəpel noki mətaw kita altaw kita akoko, an salala kənani walla məs mambray kənani.

Məsohoŋ sokene

(Markus 8.11-12 / Luka 11.29-32)

38Ɗiiyen naweleŋgit Məsənaŋ zəga na ma henziŋ dit Farisiyenɗe* anahsənənək Zezu: Məsən zəga mamaka kəgəɗ səm gən sokeneɗi, vi məsəngən na Maŋgəlva də slənuk gesiŋ. 39Zezu azlansitike: Ɗiiyen kakaŋkiŋki, mbreyitiŋ, məluvuluvuɗeŋ aza Maŋgəlva. Tahəŋ wəssohoŋ sokene, amma arəhaŋ na ɓa, say sokene na məs kleŋ Zonas. 40Va Zonas agəɗ pay hoku dəfəɗ hoku adəv kəlfa, vaski Wətən Ɗəf* tam adaɗɗa, pay hoku dəfəɗ hoku adəv magamasə. 41Pay wəgrak dəlva ɗii nawalaŋ gəla na Niniwe wasilyoŋ abet ɗiiyen dəpaŋka, kawtawən kita, vi ɗii na Niniwe atubiyaŋgək daga apprəmənən wəpel na Zonas. Yaŋ an dəday ki Zonas də gakdak tayaŋka. 42Pay wəgrak dəlva məlĩyaŋ na dohoŋ watəsil abet ɗiiyen dəpaŋka ka wəliti, vi tədek sə faraɗa vi kapprəm wəpel na Salmoŋ də wəsən nani. Yaŋ an dəday ki Salmoŋ də gakdak tayaŋka.

Wamilyo na tuya

(Luka 11.24-26)

43An tuya agilik səka ɗəffa, wabbal awra wakay təki naffete, an dərah ɓa, 44asna wanah na: Wanəmil adəv gəla naw məs nəgil sədəvən naka. An amilik adəvən, warəh məfaɗəni, məzaɓani, amma ɗəf tay adəvən ɓa. 45Asna wambatə, waki tuyeŋɗe meɓɓet buhul, mbreyit dayki an madabəŋ, wasoŋ adəv gəla nani. Wəsuwa na ɗəf nan wasan tuwãh dayki an dabəŋ. Vaski alsan sit ɗiiyen mambrayɗe dəpaŋka.

Milmiŋgiɗin Zezu dət mani

(Markus 3.31-35 / Luka 8.19-21)

46Pay Zezu adawpel tagay, may man dit milmiŋgiɗin azoŋko, aziweŋke appaka, metaka pel dəndən. 47Ɗəf maɓɓan apsən Zezu na: Mok dit milmiŋgiɗuk yeŋ ziwziw appaka, metaka pel di'isi. 48Zezu apsən na: Nawattə əmma di? Mədəŋgaŋ milmiŋgiɗu di? 49Yaŋ Zezu arbet gewleɗ nan də vani, amna: Eŋkiŋ may əmma dit milmiŋgiɗwa. 50Vi ɗəffan dəgəɗ əŋgla na Affu an na disiŋ, ndəni məlmu mizilin gəm məguluŋguta gəm əmma.

Zur Zeit ausgewählt:

Matiye 12: GDRNT85

Markierung

Kopieren